មន្ត្រីអាជ្ញាធរជាតិប្រយុទ្ធប្រឆាំងគ្រឿងញៀន បានឲ្យដឹងថា បទល្មើសគ្រឿងញៀនសរុបជាង ៥ពាន់ករណី ត្រូវបានសមត្ថកិច្ចបង្ក្រាបបាននៅទូទាំងប្រទេសចាប់តាំងពីដើមខែមករា រហូតដល់ត្រឹមថ្ងៃម្សិលមិញនេះ។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វិរិទ្ធ បានប្រាប់វីអូឌីតាមទូរស័ព្ទឲ្យដឹងថា បទល្មើសគ្រឿងញៀនសរុប ៥ ៤៧៨ករណី ត្រូវបានសមត្ថកិច្ចបង្ក្រាបបាននៅទូទាំងប្រទេសគិតត្រឹមថ្ងៃទី១៦ ខែកញ្ញា ឆ្នាំនេះ ក្នុងនោះបទល្មើសជួញដូរគ្រឿងញៀនមានដល់ទៅ ៣ ៥៥០ករណី។
បើតាមមន្ត្រីរូបនេះ អាជ្ញាធរបានឃាត់ខ្លួនជនល្មើសបានចំនួន ១០ ៩៦២នាក់ ក្នុងនោះស្រី ៩១៦នាក់ និងជនបរទេស ២១៥នាក់ ហើយជនបរទេសទាំងនោះមានសញ្ជាតិ ១៥ផ្សេងគ្នា។
លោកបានដឹងបន្តថា ចំនួនអ្នកប្រើប្រាស់គ្រឿងញៀន គិតត្រឹមឆមាសទី១ឆ្នាំនេះ បានថយចុះពីចំនួន ២០ ៥២១នាក់នៅឆមាសទី១ឆ្នាំ២០១៧ មកនៅត្រឹម ១៣ ៧៤៨នាក់ នៅឆមាសទី១ឆ្នាំនេះ។
សារព័ត៌មាននគរបាលជាតិ បានដកស្រង់សម្ដីអគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន អ្នកស្រី ជ័យ បុប្ផា ដែលបានថ្លែងនៅឯប្រទេសថៃនៅថ្ងៃនេះថា អ្នកប្រើប្រាស់គ្រឿងញៀននៅទូទាំងប្រទេស មានចំនួនសរុប ១៨ ១០៤នាក់ ក្នុងនោះ អ្នកញៀនគ្រឿងញៀនដែលទទួលបានសេវាសុខាភិបាលសាធារណៈ មានចំនួនត្រឹមតែ ៣ ១០១នាក់ប៉ុណ្ណោះ។
អ្នកស្រី ជ័យ បុប្ផា បានឲ្យដឹងបន្ថែមថា ក្នុងនោះ អ្នកញៀនគ្រឿងញៀនដែលទទួលបានសេវាតាមមណ្ឌលបណ្ដោះអាសន្ន មានចំនួនដល់ទៅ ១២ ៦៩៥នាក់ ខណៈអ្នកញៀនគ្រឿងញៀនដល់ទៅ ២ ៣០៨នាក់ទៀត ពុំទទួលបានសេវាព្យាបាលនោះឡើយ៕
