អាជ្ញាធរខេត្តសៀមរាបរកឃើញថា ករណីបាក់អគារភោជនីយដ្ឋានមួយដែលបាក់សង្កត់កម្មករឲ្យស្លាប់ និងរបួស មានជាប់ពាក់ព័ន្ធនឹងមន្ដ្រីនគរបាលជាន់ខ្ពស់ម្នាក់របស់ខេត្តនេះ ដោយថា ការសាងសង់នោះពុំបានសុំច្បាប់អនុញ្ញាត។
កាលពីយប់ម៉ោង ១រំលងអាធ្រាត្រថ្ងៃទី១៥ ខែកញ្ញា អគារភោជនីយដ្ឋាន «ស៊ុបនាគ» ដែលមានទីតាំងនៅខាងមុខមន្ទីរពេទ្យបង្អែកខេត្ត ស្ថិតក្នុងភូមិមណ្ឌល១ សង្កាត់ស្វាយដង្គំ និងបានបណ្ដាលឲ្យកម្មករម្នាក់ស្លាប់ និង ៤នាក់ទៀតរងរបួស ខណៈពួកគេដេកយាមនៅក្នុងអគារនេះ។
អភិបាលខេត្តសៀមរាប លោក ឃឹម ប៊ុនសុង ប្រាប់ VOD នៅថ្ងៃនេះថា អគារដ៏ចំណាស់នេះ ត្រូវបានលក់ទៅឲ្យលោក លី គង់ស៊្រុន ដែលជាស្នងការរងនគរបាលខេត្តសៀមរាប ហើយថា ម្ចាស់អគារនេះក៏មិនបានសុំច្បាប់អនុញ្ញាតចំពោះការសាងសង់នោះឡើយ។
អភិបាលខេត្តសៀមរាបរូបនេះ អះអាងថា អាជ្ញាធរពាក់ព័ន្ធកំពុងដោះស្រាយបញ្ហានេះហើយ និងថា អាជ្ញាធរក៏នឹងមានវិធានការចំពោះអ្នកម៉ៅការសំណង់ និងម្ចាស់អគារនេះផងដែរ។
អភិបាលខេត្តសៀមរាប លោក ឃឹម ប៊ុនសុង
វីអូឌីមិនអាចទាក់ទងស្នងការរងនគរបាលខេត្តសៀមរាប លោក លី គង់ស្រ៊ុន បានទេ រហូតមកទល់ម៉ោងចេញផ្សាយនេះ។
អភិបាលខេត្តសៀមរាប លោក ឃឹម ប៊ុនសុង ក៏បានផ្ញើរបាយការណ៍អំពីករណីបាក់រលំអគារនេះទៅរដ្ឋមន្ត្រីក្រសួងមហាផ្ទៃ លោក ស ខេង ផងដែរកាលពីថ្ងៃម្សិលមិញនេះ។
ប៉ុន្តែ អភិបាលខេត្តរូបនេះ ពុំបានបញ្ជាក់ពីគ្មានវិធានការណាមួយជាក់លាក់ ទៅលើម្ចាស់គម្រោងសំណង់អគារដែលបាក់រលំនេះឡើយ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ រិះគន់ថា បញ្ហានេះកើតឡើងច្រើនក្នុងសង្គមកម្ពុជា ដោយសារភាពធ្វេសប្រហែស មន្ដ្រីអនុវត្តច្បាប់មួយចំនួនបានរំលោភអំណាច និងបំពានច្បាប់។
លោកថា ដើម្បីបង្កាបញ្ហានេះកុំឲ្យកើតមានជាថ្មី គឺលុះត្រាស្ថាប័ន ឬអាជ្ញាធរពាក់ព័ន្ធមានភាពសកម្មក្នុងការងាររបស់ខ្លួន ដោយមិនប្រកាន់បក្ខពួក និងខ្លាចអំណាចបុណ្យសក្ដិបុគ្គលណាឡើយ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ
កម្មករម្នាក់ បានស្លាប់ ហើយកម្មករ ៤នាក់ផ្សេងទៀត បានរងរបួស និងត្រូវបានបញ្ជូនទៅសង្គ្រោះនៅឯមន្ទីរពេទ្យ បន្ទាប់ពីអគារភោជនីយដ្ឋាននៅម្ដុំតំបន់ទេសចរណ៍ផាប់ស្ទ្រីតនេះ បានបាក់រលំកាលពីយប់ឈានចូលថ្ងៃទី១៥ ខែកញ្ញាចុងសប្ដាហ៍កន្លងមកនេះ៕