សាលាដំបូងរាជធានីភ្នំពេញ បានសម្រេចបន្តសវនការរបស់ខ្លួនលើសំណុំរឿងប្រឆាំងនឹងមន្ត្រីការពារសិទ្ធិមនុស្សនៃសមាគមអាដហុក នៅព្រឹកថ្ងៃនេះ ខណៈសាក្សីសំខាន់ ២រូប ពុំបានបង្ហាញខ្លួនក្នុងសវនការនោះឡើយ។
ក្រុមមន្ត្រីការពារសិទ្ធិមនុស្ស ៤រូបនៃសមាគមអាដហុក មានលោក នី សុខា លោក យី សុខសាន្ត អ្នកស្រី លឹម មុន្នី និងលោក ណៃ វ៉ាន់ដា ត្រូវបានតុលាការចោទថា បានសូកប៉ាន់សាក្សីពាក់ព័ន្ធនឹងរឿងអាស្រូវស្នេហាមេដឹកនាំបក្សប្រឆាំង លោក កឹម សុខា ដែលត្រូវបានទម្លាយថា មានទំនាក់ទំនងស្នេហាជាមួយនារីអ៊ុតសក់ឈ្មោះ ខុម ចាន់តារាទី ហៅ ស្រីមុំ កាលពីឆ្នាំ២០១៦។
សំណុំរឿងចោទប្រកាន់លើមន្ត្រីការពារសិទ្ធិមនុស្សទាំងនេះ ត្រូវបានសាលាដំបូងរាជធានីភ្នំពេញ សម្រេចបើកសវនការជំនុំជម្រះនៅព្រឹកថ្ងៃអង្គារនេះ ក្រោមការឃ្លាំមើលពីសំណាក់ក្រុមមន្ត្រីសិទ្ធិមនុស្សជាតិ អន្តរជាតិ និងមន្ត្រីស្ថានទូតអាល្លឺម៉ង់ ស៊ុយអែត អាមេរិកប្រចាំនៅកម្ពុជា។
ក្នុងសវនការនៅព្រឹកនេះ ក្រុមមន្ត្រីសិទ្ធិមនុស្សទាំង ៤រូប បានស្នើទៅតុលាការឲ្យកោះហៅអ្នកនាង ខុម ចាន់តារាទី ហៅ ស្រីមុំ និងអតីតមេធាវីសមាគមអាដហុក អ្នកស្រី ទ្រី ឈួន។
ក្រុមមន្ត្រីអាដហុកបានអះអាងថា សាក្សីទាំងពីររូបនេះ មានសារៈសំខាន់ចំពោះសំណុំរឿងចោទប្រកាន់លើពួកគេ ដោយថា សាក្សីទាំងពីរនោះ បានទម្លាក់កំហុសទៅលើពួកគាត់ បណ្ដាលឲ្យពួកគាត់ជាប់ពន្ធនាគារ ប៉ុន្តែ ចៅក្រមជំនុំជម្រះ នៅតែសម្រេចបន្តសវនការដដែល។
ចៅក្រមជំនុំជម្រះ បានឆ្លើយតបថា តុលាការបានកោះហៅសាក្សីទាំង ២រូបនេះរួចហើយ ប៉ុន្តែ ពួកគេពុំបានចូលទៅបង្ហាញខ្លួននោះឡើយ ខណៈអះអាងថា សាក្សីទាំង ២រូបនេះ បានផ្លាស់ប្ដូរទីលំនៅរបស់ពួកគេ។
មន្ត្រីទាំង ៤រូប និងអគ្គលេខាធិការរងគណៈកម្មាធិការជាតិរៀបចំការបោះឆ្នោត គ.ជ.ប. លោក នី ចរិយា ដែលជាអតីតមន្ត្រីសមាគមអាដហុកផងដែរនោះ ត្រូវបានសមត្ថកិច្ចចាប់ដាក់ឃុំកាលពីដើមខែឧសភាឆ្នាំ២០១៦ រហូតដល់ពួកគេត្រូវបានដោះលែងឲ្យនៅក្រៅឃុំកាលពីចុងខែមិថុនាឆ្នាំ២០១៧៕
