លោកនាយករដ្ឋមន្ត្រី ហ៊ុន សែន បានបញ្ចេញប្រតិកម្មថា គ្មានអន្តរជាតិណាថ្លើមធំហ៊ានព្យួរអាសនៈកម្ពុជាដូចការលើកឡើងនោះទេ ហើយថា ការផ្ទេរលោក កឹម សុខា មកឃុំខ្លួនក្នុងផ្ទះវិញ ក៏មិនមែនដោយសារតែសម្ពាធអន្តរជាតិដែរ។
ក្នុងពិធីជួបសំណេះសំណាលជាមួយកម្មករ នៅខេត្តកំពង់ស្ពឺ នាថ្ងៃពុធនេះ លោក ហ៊ុន សែន ថ្លែងដោយមិនបញ្ចេញឈ្មោះថា នៅប៉ុន្មានថ្ងៃនេះ មានអ្នកឃោសនាថា អន្តរជាតិនឹងព្យួរអាសនៈកម្ពុជានៅអង្គការសហប្រជាតិជាតិ ប៉ុន្តែ លោកថា ការលើកឡើងនេះជាការភូតកុហក។
លោកនាយករដ្ឋមន្ត្រី ហ៊ុន សែន
កាលពីថ្ងៃទី១៥ ខែកញ្ញា លោក សម រង្ស៊ី សរសេរលើហ្វេសប៊ុករបស់លោកថា អាសនៈកម្ពុជានៅអង្គការសហប្រជាជាតិ ត្រូវដាក់ឲ្យនៅទំនេរ រង់ចាំការបោះឆ្នោតឡើងវិញ។
លោក សម រង្ស៊ី សរសេរទៀតថា ក្នុងន័យនេះ ត្រូវបណ្តេញតំណាងរបប ហ៊ុន សែន មិនឲ្យអង្គុយអាសនៈនេះទៀតទេ។
មួយវិញទៀត លោក ហ៊ុន សែន បានថ្លែងទៀតថា ការប្តូរទីតាំងឃុំខ្លួនលោក កឹម សុខា ពីពន្ធនាគារមកឃុំនៅក្នុងផ្ទះវិញ មិនមែនរបបដឹកនាំលោករងសម្ពាធណាមួយពីអន្តរជាតិនោះទេ ប៉ុន្តែលោកថា ជាគោលដៅមនុស្សធម៌ដើម្បីសុវត្ថិភាពពិរុទ្ធជន។
លោកនាយករដ្ឋមន្ត្រី ហ៊ុន សែន
អ្នកវិភាគនយោបាយ និងជាអ្នកស្រាវជ្រាវពីការអភិវឌ្ឍសង្គមលោក បណ្ឌិត មាស នី បង្ហាការព្រួយបារម្ភថា បើរដ្ឋាភិបាលងាកចេញពីក្រុមប្រទេសលោកសេរី ដោយសារតែការជំរុញឲ្យស្តារប្រជាធិបតេយ្យឡើងវិញ ហើយចាប់យកមហាអំណាចចិនតែមួយ លោកថា កម្ពុជាអាចនឹងជួបវិបត្តិធ្ងន់ធ្ងរទៅថ្ងៃអនាគតខាងផ្នែកសេដ្ឋកិច្ច និងវិបត្តិសង្គម។
អ្នកវិភាគនយោបាយ និងជាអ្នកស្រាវជ្រាវពីការអភិវឌ្ឍសង្គមលោក បណ្ឌិត មាស នី
សភាអឺរ៉ុប ដែលមានសមាជិក២៨ប្រទេស កាលពីសប្តាហ៍មុន បានពន្យាអនុវត្តវិធានការ ដាក់ទណ្ឌកម្ម ដោយទុកពេលឲ្យរដ្ឋាភិបាលថ្មីរបស់កម្ពុជា ពិចារណាពីការស្តារប្រជាធិបតេយ្យឡើងវិញ រួមទាំងទាមទារឲ្យទម្លាក់បទចោទលើអតីតមេដឹកនាំបក្សប្រឆាំង លោក កឹម សុខា និងលោក សម រង្ស៊ី និងទាមទារសងអាសនៈឃុំសង្កាត់ទាំងអស់ ឲ្យគណបក្សប្រឆាំងឡើងវិញជាដើម។
ប៉ុន្តែ លោក ហ៊ុន សែន ក្នុងពិធីនេះដែរ អះអាងថា របបដឹកនាំរបស់លោក នឹងមិនរណបបរទេសណានោះឡើយ ហើយថា ការបោះឆ្នោតនៅកម្ពុជាក៏មិនត្រូវការស្តង់ដារអន្តរជាតិអ្វីដែរ៕