ក្នុងពិធីសម្ពោធរឿង«ណូលីណូឡា»គេឃើញតារាសម្ដែង កញ្ញា ឌុច លីដា បង្ហាញខ្លួនព្រមជាមួយនឹងស្នាមញញឹម ផ្ទុយស្រឡះទាំងស្រុងពីការលើកឡើងថានាង និងផលិតកររឿងនេះផ្ទុះរឿងចម្រូងចម្រាស់នឹងគ្នា ដោយមានទាំងការប៉ាន់ស្មានថានឹងអវត្តមានក្នុងថ្ងៃសម្ពោធរឿង។
ជាមួយនឹងការបង្ហាញខ្លួន នាងបានប្រកែកថាមិនធ្លាប់មានរឿងណាមួយជាមួយ«មហាហង្ស»ឡើយ។
កញ្ញា ឌុច លីដា និយាយថា ការលើកឡើងថានាង និងផលិតករមហាហង្សមានរឿងជាមួយគ្នា ដោយសារតែនាងមកថតមិនគោរពពេលវេលា ឬអោយថ្ងៃចេញថតមិនគ្រប់គ្រាន់ រហូតធ្វើអោយភាពយន្តរឿង«ណូលីណូឡា» យឺតយ៉ាវការផលិត និងមានរឿងទាស់សម្ដីគ្នាជាមួយអ្នកផលិត គឺមិនមានទាល់តែសោះ។
តារាសម្ដែង កញ្ញា ឌុច លីដា
ឌុច លីដា បន្តថា បើនាងមានរឿងល្អក់កករជាមួយផលិតកម្មមហាហង្ស គឺនាងមិនមកចូលរួមសម្ពោធក្នុងរឿង«ណូលីណូឡា»កាលពីថ្ងៃទី១៨ កញ្ញានោះទេ បើទោះជាក្នុងរឿងនេះ នាងគឺជាតួឯកធំ ជាមួយគ្នានឹងតួអង្គអ្នកនាង ភិន សុដាលីស ដែលជាកូនស្រីផលិតកម្ម។
អ្នកនាងបានទាំងសរសើរថាសកម្មភាពក្នុងការបង្ហាញខ្លួនថតអោយផលិតកម្មមហាហង្សលើកដំបូង មានតែការយោគយល់នោះផង កុំថាដល់មានផ្ទុះរឿងចម្រូងចម្រាស់ ដូចអ្វីដែលបានលេចឮ។
នាងរំពឹងយ៉ាងខ្លាំងថា ភាពយន្តរឿង«ណូលីណូឡា»ដែលនាងសម្ដែងភាគច្រើននៅខេត្តសៀមរាប ហើយត្រូវអ្នកនិពន្ធអោយសម្ដែងច្រឡឺមផង កាចផង ហើយចុងក្រោយរូបនាងគឺជាតួដែលបង្ហាញពីក្ដីស្រឡាញ់ និងបានចូលរួមផ្សព្វផ្សាយវប្បធម៌នៅខេត្តសៀមរាបនោះ នឹងទទួលជោគជ័យ ដោយនាងបញ្ជាក់ថាខ្លួនប្រឹងសម្ដែងអស់ពីសមត្ថភាព ដែលផ្ទុយពីការយល់ថារូបនាងមានរឿងជាមួយផលិតករក្នុងពេលសម្ដែង ហើយខំប្រឹងសម្ដែងអោយតែចប់របៀបឧបកិច្ច។
ដូចគ្នានឹងការអះអាងថា លោក អ៊ិន សុភិន ម្ចាស់ផលិតកម្មក៏បានប្រកែកដែរថា កញ្ញា ឌុច លីដា អត់មានករណីចម្រូងចម្រាស់ក្នុងពេលថតរឿងដូចអ្វីដែលធ្លាប់លេចឮនោះទេ ដោយលោកបញ្ជាក់ថាសម្រាប់តួផ្សេងគឺពិតជាមាននូវបញ្ហាពេលវេលា និងអោយថ្ងៃថតមិនត្រូវគ្នា បង្ការការលំបាកដល់ការផលិតមែន ប៉ុន្តែសម្រាប់តារាស្រី ឌុច លីដា គឺអត់មានទេ ដោយមានតែខំធ្វើការបានល្អ ថ្វីដ្បិតតែយន្តរឿង«ណូលីណូឡា» ត្រូវបានពន្យារការថត។
លោកថាកញ្ញា ឌុច លីដា ធ្វើការលើកដំបូងអោយផលិតកម្មមហាហង្ស អត់មានបញ្ហាដូចតារាល្បីមួយចំនួននោះទេ ខណៈដែលលោកក៏នឹងគ្រោងផ្ដល់រឿងអោយសម្ដែងជាលើកទី២ បន្ទាប់ពីយល់ឃើញថាភាពយន្តដែលនាងសម្ដែងជាមួយកូនស្រីរបស់លោក គឺអ្នកនាង ភិន សុដាលីស លើកដំបូង មានភាពស៊ីសង្វាក់គ្នា ហើយក្រោយពេលកាត់ខ្សែបូរ ក៏មានអ្នកទស្សនាភាគច្រើនសរសើរថាល្អមើល ដែលធ្វើអោយលោករំពឹងខ្លាំងនៅពេលលក់សំបុត្រដាក់បញ្ចាំងចាប់ពីថ្ងៃទី២០ កញ្ញា នោះ៕