របាយការណ៍មួយបង្ហាញថា កុមារអាយុក្រោម១៥ឆ្នាំនៅលើពិភពលោកស្លាប់ម្នាក់រាល់៥វិនាទី ដោយសារតែមូលហេតុនានាដែលគេអាចការពារបាន។
របាយការណ៍ប្រចាំឆ្នាំ២០១៨ ស្តីពីកម្រិតនិងនិន្នាការនៃអត្រាមរណៈប្រមាណរបស់កុមារប្រចាំឆ្នាំ២០១៨ ដែលជារបាយការណ៍ធ្វើឡើងរួមគ្នារវាង មូលនិធិកុមាររបស់អង្គការសហប្រជាជាតិហៅកាត់ថាយូនីសេហ្វ អង្គការសុខភាពពិភពលោក នាយកដ្ឋានប្រជាសាស្ត្ររបស់អង្គការសហប្រជាជាតិ និងធនាគាពិភពលោក ឲ្យដឹងថាកុមារប្រមាណ ៦,៣ លាននាក់ដែលមានអាយុក្រោម ១៥ឆ្នាំបានស្លាប់ក្នុងឆ្នាំ ២០១៧។
តាមប្រភពខាងលើ កុមារភាគច្រើនដែលមានអាយុក្រោម ៥ ឆ្នាំបានស្លាប់ដោយសារតែមូលហេតុដែលអាចការពារបានឬអាចព្យាបាលបានដូចជាភាពស្មុគស្មាញក្នុងកំឡុងពេលសម្រាលជំងឺរលាកសួត ជំងឺរាគរូស និងជំងឺគ្រុនចាញ់ជាដើម។ ដោយឡែកចំពោះកុមារអាយុចន្លោះពី ៥ ទៅ ១៥ ឆ្នាំ គ្រោះផ្សេងៗជាពិសេសការលង់ទឹកនិងគ្រោះថ្នាក់ចរាចរណ៍ ជាមូលហេតុចំបងនៃការស្លាប់របស់ពួកគេ ។
របាយការណ៍ដែលចេញកាលពីថ្ងៃទី១៨ខែកញ្ញាដដែលនេះ ក៏បានបញ្ជាក់ផងដែរថាការស្លាប់នោះកើតឡើងភាគច្រើននៅអាយុ៥ឆ្នាំដំបូងរបស់កុមារ។
នៅទូទាំងពិភពលោកនៅឆ្នាំ ២០១៧ ពាក់កណ្តាលនៃការស្លាប់របស់កុមារក្រោមអាយុ៥ ឆ្នាំបានកើតឡើងនៅក្នុងអនុតំបន់សាហារ៉ានៅទ្វីបអាហ្វ្រិក និង ៣០% ទៀតនៅអាស៊ីខាងត្បូង។ នៅអាហ្វ្រិកក្នុងអនុតំបន់សាហារ៉ាកុមារម្នាក់ក្នុងចំណោមកុមារ១៣នាក់បានស្លាប់មុនអាយុ៥ឆ្នាំ ។ ចំណែកឯនៅក្នុងបណ្តាប្រទេសដែលមានប្រាក់ចំណូលខ្ពស់ កុមារម្នាក់ក្នុងចំណោមកុមារ១៨៥នាក់បានស្លាប់មុនអាយុ៥ឆ្នាំ។
វេជ្ជបណ្ឌិតព្រីនសេសណូណូស៊ីមេឡេឡាជំនួយការអគ្គនាយកសុខភាពគ្រួសារស្ត្រីនិងកុមារប្រចាំអង្គការសុខភាពពិភពលោកបាននិយាយថាទារកនិងកុមាររាប់លាននាក់មិនគួរស្លាប់ជារៀងរាល់ឆ្នាំដោយសារតែខ្វះលទ្ធភាពទទួលបានទឹកអនាម័យចំណីអាហារត្រឹមត្រូវឬសេវាសុខាភិបាលមូលដ្ឋាននោះទេ ។ វេជ្ជបណ្ឌិតរូបនេះបន្តថាយើងត្រូវផ្តល់អាទិភាពដល់ការផ្តល់សេវាសុខភាពដែលមានគុណភាពសម្រាប់កុមារគ្រប់រូបជាពិសេសនៅអំឡុងពេលសំរាលនិងឆ្នាំដំបូងៗរបស់កុមារដើម្បីផ្តល់ឱ្យពួកគេនូវឱកាសដ៏ល្អបំផុតដើម្បីអាចរស់នៅនិងលូតលាស់បាន។
ទោះយ៉ាងណាក៏ដោយ អត្រាមរណៈប្រមាណរបស់កុមារបានថយចុះជាបន្តបន្ទាប់ចាប់តាំងពីឆ្នាំ១៩៩០មក។ ចំនួននៃការស្លាប់របស់កុមារអាយុក្រោម៥ឆ្នាំ បានធ្លាក់ចុះយ៉ាងខ្លាំងពី ១២,៦ លាននាក់នៅឆ្នាំ ១៩៩០ ដល់ ៥,៤ លាននាក់ក្នុងឆ្នាំ ២០១៧ ។ ចំនួននៃការស្លាប់កុមារដែលមានអាយុចន្លោះពី ៥ ទៅ ១៤ ឆ្នាំបានធ្លាក់ចុះពី ១,៧ លាននាក់ដល់ក្រោម ១ លាននាក់ក្នុងរយៈពេលដូចគ្នា៕