លោក ហ៊ុន ម៉ាណែត បានស្នើតែងតាំងមេបញ្ជាការរងកងទ័ពជើងគោក ៥រូប បន្ទាប់ពីពួកគេលាលែងតំណែងជានាយរងសេនាធិការចម្រុះ កាលពីសប្តាហ៍មុន។
អ្នកនាំពាក្យក្រសួងការពារជាតិ លោក ឈុំ សុជាតិ បានឲ្យដឹងថា មន្ត្រីយោធាជាន់ខ្ពស់៦រូប ត្រូវបានមេបញ្ជាការកងទ័ពជើងគោក លោក ហ៊ុន ម៉ាណែត ស្នើតែងតាំងជាមេបញ្ជាការរងនិងនាយសេនាធិការរងបន្ថែមលើមុខងាររបស់ខ្លួន ដោយថា ស្របតាមច្បាប់ស្វ័យប្រវត្តិ។
លិខិតស្នើសុំតែតាំងចុះថ្ងៃទី១៧កញ្ញាដែល VOD ទទួលបាននៅថ្ងៃនេះ មេបញ្ជាការកងទ័ពជើងគោក លោក ហ៊ុន ម៉ាណែត ស្នើទៅអគ្គមេបញ្ជាការ នៃកងយោធពលខេមរភូមិន្ទ សុំតែតាំងឧត្តមសេនីយ៍ឯកប្រាំនាក់ជាមេបញ្ជាការរងកងទ័ពជើងគោកបន្ថែមលើមុខងារបច្ចុប្បន្ន រួមមាន លោក កែវ ធី មេបញ្ជាការកងពលធំលេខ២ លោក ស្រី ឌឹក មេបញ្ជាការកងពលធំលេខ៣ លោក ព្រហ្ម ផេង មេបញ្ជាការកងពលតូចអន្តរាគមន៍លេខ១ លោក ម៉ៅ សុផាន់ មេបញ្ជាការកងពលតូចថ្មើរជើងលេខ៧០ និងលោក ចាប ភក្តី មេបញ្ជាការកងពលតូចទ័ពឆ័ត្រយោងពិសេសលេខ៩១១។
លិខិតដដែលក៏បានស្នើតែតាំងឧត្តមសេនីយ៍ទោ ឈរ សុខា ដែលមានតួនាទីជាមេបញ្ជាការកងពលតូចដឹកជញ្ជូនលេខ៩០ បន្ថែមជានាយសេនាធិការរងកងទ័ពជើងគោកផងដែរ។
អ្នកនាំពាក្យក្រសួងការពារជាតិ លោក ឈុំ សុជាតិ បានឲ្យដឹងបន្ថែមនៅថ្ងៃនេះថា នេះគឺជាការអនុវត្តរបស់ក្រសួងការពារជាតិដោយស្របតាមច្បាប់ដោយស្វ័យប្រវត្តិ។
អ្នកនាំពាក្យក្រសួងការពារជាតិ លោក ឈុំ សុជាតិ
អ្នកនាំពាក្យរូបនេះពន្យល់បន្ថែមពីចម្ងល់ដែលសួរពីគោលការណ៍ថ្មីរបស់ក្រសួងដែលចង់ឲ្យមន្ត្រីទាហានកាន់តួនាទីតែមួយថា នេះគ្រាន់តែជាគំនិតចង់បាននៅឡើយទេ តែនឹងធ្វើកំណែទម្រង់តាម ជំហានៗបន្តទៀត។
ក្រុមឧត្ដមសេនីយ៍ទាំងនោះ ទើបតែបានស្នើសុំលាលែងពីតំណែងរបស់ពួកគេ បន្ទាប់ពីក្រសួងការពារជាតិបានផ្ទេរអង្គភាពយោធាចំនួន៥ និងកងពលតូចដឹកជញ្ជូនលេខ៩០បន្ថែមអង្គភាពមួយទៀត ដាក់ឲ្យស្ថិតនៅក្រោមបញ្ជារបស់មេបញ្ជាការកងទ័ពជើងគោក ដែលដឹកនាំដោយកូនប្រុសច្បងលោកនាយករដ្ឋមន្ត្រី ហ៊ុន សែន គឺលោកឧត្ដមសេនីយ៍ ហ៊ុន ម៉ាណែត៕