លោកនាយករដ្ឋមន្រ្តីកម្ពុជា ហ៊ុន សែន នឹងដឹកនាំគណៈប្រតិភូកម្ពុជាចូលរួមកិច្ចប្រជុំលើកទី៧៣ នៃមហាសន្និបាតអង្គការសហប្រជាជាតិ និងកិច្ចប្រជុំផ្សេងទៀតនៅសប្តាហ៍ក្រោយនេះ។
ក្រសួងការបរទេសនិងសហប្រតិបត្តិការអន្តរជាតិ បានចេញសេចក្តីប្រកាសព័ត៌មាននៅថ្ងៃនេះឲ្យដឹងថា លោក ហ៊ុន សែន នឹងចូលរួមមហាសន្និបាតអង្គការសហប្រជាជាតិ ក្រោមមូលបទ« ធ្វើឲ្យអង្គការសហប្រជាជាតិមានសារៈសំខាន់ពាក់ព័ន្ធជាមួយប្រជាជនទាំងអស់ ភាពអ្នកដឹកនាំសកល និងការទទួលខុសត្រូវរួម សំរាប់សង្គមប្រកបដោយសន្តិភាព សមធម៌ និងនិរន្តរភាព» ចាប់ពីថ្ងៃទី២៥ ដល់ ២៩ កញ្ញាឆ្នាំ២០១៨ នៅក្នុងទីក្រុងញូយ៉ក។
ក្នុងសេចក្តីថ្លែងការណ៍ដដែលបានបានលើឡើងថា លោក ហ៊ុន សែន នឹងធ្វើសេចក្តីថ្លែងការណ៍ដែលផ្តោតទៅលើការវិវត្តនាពេលថ្មីៗ និងសមិទ្ធិផលសំខាន់ៗដែលរដ្ឋាភិបាលកម្ពុជាសម្រេចបាន។
លើសពីនេះ សេចក្តីប្រកាសព័ត៌មានដដែលបានឲ្យដឹងថា លោក ហ៊ុន សែននឹងមានជំនួបពិភាក្សាទ្វេភាគីដាច់ដោយឡែកជាមួយនឹង អគ្គលេខាធិការអង្គការសហប្រជាជាតិ គឺ លោកអង់តូនីញ៉ូ ហ្គូតេរ៉េស នាយករដ្ឋមន្រ្តីប៊ុលហ្គារី នាយករដ្ឋមន្រ្តីនេប៉ាល់ និងជំនួបពិភាក្សាដោយមិត្តភាពជាមួយប្រមុខរដ្ឋ និងរដ្ឋាភិបាលនៃប្រទេសមួយចំនួនទៀត។
ក្រៅពីនោះលោក ហ៊ុន សែន ក៏នឹងជួបជាមួយសហគមន៍ខ្មែរដែលរស់នៅសហរដ្ឋអាមេរិច និងកាណាដាផងដែរ។
នេះជាលើកទី២ហើយដែល លោក ហ៊ុន សែន ចូលរួមកិច្ចប្រជុំថ្នាក់អន្តរជាតិបន្ទាប់ពីការបោះឆ្នោតជ្រើសរើសតំណាងរាស្រ្តអាណត្តិទី៦មក ដែលលើកទីមួយគឺលោកចូលរួមក្នុងវេទិកាសេដ្ឋកិច្ចពិភពលោកកាលពីសប្តាហ៍មុននៅប្រទេសវៀតណាម។
