ក្រុមបណ្ដាញសហគមន៍ព្រៃឡង់នៅតាមខេត្តមួយចំនួន អះអាងថា បទល្មើសព្រៃឈើក្នុងតំបន់ព្រៃឡង់នៅតែបន្តកើនឡើង បើទោះបីជារដ្ឋាភិបាលបានដាក់តំបន់នោះ ជាតំបន់ការពារដែលមានកិច្ចសហការពីអាជ្ញាធរមូលដ្ឋានក៏ដោយ។
បណ្ដាញសហគមន៍ព្រៃឡង់ខេត្តកំពង់ធំ លោក អេន ប្លោក ប្រាប់វីអូឌីនៅថ្ងៃនេះថា កន្លងមក ជនល្មើសបានកាប់ឈើនៅក្នុងព្រៃជ្រៅប៉ុណ្ណោះ ប៉ុន្តែថ្មីនេះឈើធំៗដែលនៅជាប់ផ្លូវពួកគាត់ធ្វើដំណើរឆ្លងកាត់នោះត្រូវបានក្រុមឈ្នួញកាប់អស់ដែរ។ លោកបង្ហាញការខកចិត្តចំពោះអាជ្ញាធរដែលមិនអាចទប់ស្កាត់បទល្មើសព្រៃឈើបាន ដោយសារ ពេលទៅពួកគាត់ចុះ ល្បាតក្នុងតំបន់ព្រៃឡង់នៅសប្តាហ៍នេះ ជនល្មើសរត់គេចខ្លួនបាត់អស់ ដោយបន្សល់ទុកតែភស្តុតាងនៅទីតាំងដែលជនល្មើសបានអាររំលំ។
បណ្ដាញសហគមន៍ព្រៃឡង់ខេត្តកំពង់ធំ លោក អេន ប្លោក
បណ្ដាញសហគមន៍ព្រៃឡង់នៅខេត្តក្រចេះ លោក ឯក សុវណ្ណា លើកឡើងថា ការកាប់ឈើនៅតំបន់ព្រៃឡង់នាពេលបច្ចុប្បន្នមិនមានការថយចុះនោះឡើយ ។ លោកបន្តថា បច្ចុប្បន្ន អ្នកដែលរកស៊ីទិញឈើពីក្រុមឈ្នួញដែលបានកាប់នៅតំបន់ព្រៃឡង់នោះ គឺមានតួនាទីជា មន្ត្រីកងរាជអាវុធហត្ថ និងម្ចាស់ក្រុមហ៊ុននៅក្នុងស្រុកព្រែកប្រសព្វខេត្តក្រចេះតែម្ដង។
បណ្ដាញសហគមន៍ព្រៃឡង់នៅខេត្តក្រចេះ លោក ឯក សុវណ្ណា
វីអូឌីមិនអាចសុំការបំភ្លឺពីប្រធានមន្ទីរបរិស្ថានខេត្តកំពង់ធំលោក សុខ កក្កដា បានទេ ដោយលោកចុចផ្ដាច់ភ្លាមៗបន្ទាប់ពីប្រាប់ស្ថាប័នសារព័ត៌មាន។
មន្ត្រីនាំពាក្យក្រសួងបរិស្ថាន លោក នេត្រ ភក្ត្រា សុំមិនធ្វើអត្ថាធិប្បាយចំពោះរឿងនេះ ដោយលោកស្នើឲ្យក្រុមបណ្ដាញសហគមន៍ដាក់របាយការណ៍មកកាន់ក្រសួង។
មន្ត្រីនាំពាក្យក្រសួងបរិស្ថាន លោក នេត្រ ភក្ត្
ប្រធានអង្គការកិច្ចការពិសេសសិទ្ធិមនុស្សកម្ពុជាដែលសកម្មក្នុងការការពារព្រៃឈើ លោកអ៊ួច ឡេង មានប្រសាសន៍ថា មូលហេតុដែលនាំឲ្យបទល្មើសព្រៃឈើនៅតែកើនឡើងជាបន្តបន្ទាប់ដោយមិនអាចទប់ស្កាត់បាននោះ ដោយសារ អាជ្ញាធរមូលដ្ឋាន និងមន្ត្រីធំៗនៅក្នុងជួររដ្ឋាភិបាលជាអ្នករកស៊ីឈើ។
ប្រធានអង្គការកិច្ចការពិសេសសិទ្ធិមនុស្សកម្ពុជាដែលសកម្មក្នុងការការពារព្រៃឈើ លោកអ៊ួច ឡេង
សហគមន៍ព្រៃឡង់ និងមន្ត្រីបរិស្ថានខេត្តកំពង់ធំ និងក្រចេះ បានចុះល្បាតព្រៃឡង់កាលពីថ្ងៃទី ១៦ – ១៩ ខែកញ្ញា ឆ្នាំ២០១នេះ។ ពួកគេចុះល្បាតនៅតំបន់ព្រៃឡង់ ក្នុងមួយខែ ២ ទៅ ៣ ដង ដោយក្នុងមួយដងពួកគេចុះល្បាតរយៈពេល ៣ យប់ ៤ ថ្ងៃ។
កាលពីដើមខែមីនា ឆ្នាំ២០១៨ ក្រសួងបរិស្ថាន សហការជាមួយអង្គការពាក់ព័ន្ធនានា និងក្រុមហ៊ុនជប៉ុន បានចុះកិច្ចព្រមព្រៀងដែលមានទឹកប្រាក់ប្រមាណ១លាន៥សែនដុល្លារ សម្រាប់គម្រោងការអភិរក្ស ព្រៃឈើតំបន់ព្រៃឡង់ ក្នុងគោលបំណង រួមគ្នាការពារ និងអភិរក្សព្រៃឈើតំបន់ព្រៃឡង់។
តំបន់ព្រៃឡង់ស្ថិតក្នុងភូមិសាស្រ្តខេត្តចំនួន៤គឺ កំពង់ធំ ស្ទឹងត្រែង ព្រះវិហារ និងក្រចេះ ដែលមានផ្ទៃដីព្រៃឡង់សរុប ៤៣១.៦៨៣ ហិកតា ដែលក្នុងនោះ ផ្ទៃដីចំនួន ១២០.០០០ហិកតា ត្រូវបានដាក់ក្នុងគម្រោងអភិរក្សគ្របដណ្តប់តំបន់ព្រៃឡង់ទាំងមូល។
