នាយករដ្ឋមន្ត្រីកម្ពុជាលោក ហ៊ុន សែន និងមន្ត្រីជាន់ខ្ពស់មួយចំនួនទៀត នឹងទៅប្រទេសវៀតណាម នៅថ្ងៃពុធស្អែកនេះ ដើម្បីគោរពវិញ្ញាណក្ខន្ធ អតីតប្រធានាធិបតីវៀតណាម លោក ត្រាន់ ដាយក្វាង ។
ប្រធានាធិបតីវៀតណាម លោក ត្រាន់ ដាយក្វាង អាយុ៦២ឆ្នាំ បានទទួលមរណភាព កាលពីថ្ងៃទី២១កញ្ញា ដោយជំងឺ ។
សេចក្តីប្រកាសព័ត៌មានចុះឲ្យដឹងថា លោកនាយករដ្ឋមន្ត្រី ហ៊ុន សែន ឧបនាយករដ្ឋមន្ត្រី លោក ស ខេង ឧបនាយករដ្ឋមន្ត្រីលោកស្រី ម៉ែន សំអន និងមន្ត្រីមួយចំនួនទៀត នឹងទៅគោរពវិញ្ញាណក្ខន្ធ អតីតប្រធានាធិបតីលោក ត្រាន់ ដាយក្វាង នៅប្រទេសវៀតណាម។
កាលពីថ្ងៃទី២១កញ្ញាកម្ពុជា បានផ្ញើលិខិតរំលែកទុក ដល់ប្រទេសវៀតណាមដែលបានបាត់បង់ថ្នាក់ដឹកនាំកំពូលនេះ។
សារលំលែកទុក្ខ របស់កម្ពុជា បានបង្ហាញការសោកស្តាយ និងបានចាត់ទុកថាមរណៈភាព របស់មេដឹកនាំវៀតណាមរូបនេះ ជាការបាត់បង់ដ៏ធំធេង នូវថ្នាក់ដឹកនាំ ដែលបានបូជាអស់កម្លាំងកាយចិត្ត ដើម្បីលើកកម្ពស់សុខមាលភាពរបស់ប្រជាជនវៀតណាម និងទំនាក់ទំនងជាភាតរៈរបស់កម្ពុជា៕