ក្នុងពិធីប្រគល់អំណោយរួមមាន តុ កៅអី និងសម្ភារសិក្សា ដល់សិស្ស និងលោកគ្រូអ្នកគ្រូ នៅសាលាបឋមសិក្សាតាម៉ៅ ស្ថិតនៅភូមិតាម៉ៅ ឃុំស្រក ស្រុកកំពង់សៀម ខេត្តកំពងចាម កាលពីថ្ងៃទី២៩ កញ្ញា តារាសម្ដែងលោក អូន ឧស្សាហ៍ ដែលរួមដំណើរជាមួយនឹងផលិតករ និងតារាៗរបស់មហាហង្ស បានអះអាងថា តារាសិល្បៈពិតជាមានឥទ្ធិពលខ្លាំងណាស់ ក្នុងការបំផុសអោយមានការយកចិត្តទុកដាក់ភាគចំពោះក្មេងៗ នៅក្នុងសហគមន៍ក្រីក្រដាច់ស្រយាល។
លោកថាតារាសិល្បៈកាន់តែច្រើនបានចាប់អារម្មណ៍បញ្ចេញសកម្មភាពក្នុងគម្រោងសប្បុរសធម៌ ប៉ុន្តែមិនមានច្រើនទេ ដែលផ្ដោតការចុះជួយនៅក្នុងតំបន់ដាច់ស្រយាល ដោយសម្រុកតែធ្វើសកម្មភាពផ្ដល់ជំនួយនៅក្នុងតំបន់ប្រជុំជន។
ក្នុងនាមជាផលិតករមួយរូបប្រចាំផលិតកម្មនៅមហាហង្ស លោកថាបានគៀរគរតារាច្រើនណាស់ អោយចូលរួមចុះទៅកាន់សហគមន៍ដោយផ្ទាល់ខ្លួនជាមួយខ្លួន ប៉ុន្តែមិនមានតារាច្រើនទេចាប់អារម្មណ៍ចំណាយពេល ក្រៅតែពីផ្ដល់តែថវិកាបរិច្ចាគ។
លោកថាតារាសិល្បៈ គឺជាបុគ្គលដែលមានឥទ្ធិពលខ្លាំងបំផុត សម្រាប់ក្មេងៗដែលមានកង្វះខាតក្នុងតំបន់ដាច់ស្រយាល ដោយសារតែវត្តមានទៅដល់របស់តារាសិល្បៈ ហើយបានឃើញដោយផ្ទាល់ពីជីវភាពរបស់ក្មេងៗ និងពលរដ្ឋ គឺមិនខុសពីជួយផ្សព្វផ្សាយពីសហគមន៍ទាំងនោះ អោយក្រុមសប្បុរជនបានឃើញ បានដឹង ដែលជួយអោយពួកគេងាយទទួលអំណោយលើកក្រោយៗបំពេញតម្រូវការ។
ជាក់ស្ដែងនៅក្នុងសហគមន៍ក្នុងខេត្តកំពង់ចាម ដែលលោកទៅដល់ គឺក្មេងៗភាគច្រើនស្ទើរមិនមានកងជិះទៅសាលានោះផង កុំថាឡើងខ្វះដល់សម្ភារសិក្សា និងបញ្ហាកង្វះខាតជីវភាព។
លោកនិយាយថា«បើតារាច្រើនឡើង ចំណាយពេលចុះមកដល់ផ្ទាល់ៗ ខ្ញុំថាប្រសើរជាងពួកគាត់ជួយជាលុយឆ្ងាយណាស់ ហើយខ្ញុំថាបើតារាមួយចំនួនងាកពីធ្វើសប្បុរសធម៌នៅតំបន់ប្រជុំជន មកតំបន់ដាច់ស្រយាលអ៊ីចឹងវិញ គឺពិតជាប្រសើរណាស់ ដោយសារក្មេងៗដែលខ្វះខាតនៅក្នុងតំបន់សហគមន៍ ពួកគាត់សប្បាយចិត្តណាស់ ពេលឃើញសប្បុរសជនមកដល់ម្ដង!»។
លោកអះអាងថា បើសំដៅលើការងារមមាញឹក លោកថារូបលោករវល់ចង់ជាងតារាល្បីៗភាគច្រើននោះផង ដោយសារតែលោក ក្រៅពីជាតារាសម្ដែង និងមានជំនួញផ្ទាល់ខ្លួនប្រចាំគ្រួសារ ក៏មាននាទីជាអ្នកគ្រប់គ្រងទូទៅប្រចាំផលិតកម្មមហាហង្ស ដែលមានការទទួលខុសត្រូវខ្ពស់លើការផលិតភាពយន្ត និងគ្រប់គ្រងតួ ដែលលោកបញ្ជាក់ថាសូម្បីតែក្នុងពេលធ្វើដំណើរតាមរថយន្ត និងអង្គុយហូបអាហារជាដើម ក៏តម្រូវអោយលោកត្រូវលើកទូរស័ព្ទដោះស្រាយបញ្ហាជុំវិញនោះដែរ។
ងាកទៅកាន់វេទិកាប្រគល់អំណោយនោះវិញ លោក អូន ឧស្សាហ៍ បញ្ជាក់ថា គឺថវិកាដែលបានពីកញ្ចប់របស់ផលិតកម្មមហាហង្ស ដោយមួយផ្នែកទៀតបានពីការបរិច្ចាគពីក្រុមការងារ ពីតារាសិល្បៈ និងពីសប្បុរសជន។
អំណោយដែលលោក បានរួមចំណែកយកមកប្រគល់ជូននោះ រួមមានតុ កៅអី សម្ភារសិក្សា និងថវិកា សរុបជាទឹកប្រាក់ចំនួនប្រមាណ៦ពាន់ដុល្លារ ដោយការ ផ្ដល់ជំនួយជាទ្រង់ទ្រាយរបស់ផលិតកម្មមហាហង្សនេះ គឺដោយសារតែខាងសហគមន៍បានដាក់សំណើរសុំអោយម្ចាស់ផលិតកម្មជួយសល់សាលា ស្របគ្នាដែលខាងផលិតកម្មក៏មានប្រាក់សប្បុរសធម៌បម្រុងទុក។
លោកថាវត្តមានរបស់តារាសិល្បៈ ដែលចេញធ្វើសកម្មភាពសប្បុរសធម៌នៅតាមសហគមន៍ដាច់ស្រយាល គឺមិនខុសពីផ្ដល់ពីភាពគំរូរបស់ខ្លួនក្នុងក្រសែភ្នែកមហាជននោះទេ ទើលទទូចថាបើមានការចូលរួមច្រើនស្រុះដៃគ្នា គឺជារឿងល្អបំផុត៕
