ក្រោយឈ្នះពិន្ទុលើកីឡាករ ឡុង រ៉ាមី មកពីក្លិបខ្លារខិនមានរិទ្ធិ កីឡាករ លាភ រដ្ឋា មកពីក្លិបដីឡូតិ៍មានរិទ្ធិ ខេត្តបន្ទាយមានជ័យ ត្រូវគេមើលឃើញថាមានសំណាងក្ដាប់តំណែងជើងឯករងដោយស្វ័យប្រវត្តិ ដោយសារតែលោកគឺជាបេក្ខភាពមួយរូបក្នុងចំណោម២នាក់ ត្រូវឡើងទៅប្រកួតក្នុងវគ្គផ្ដាច់ព្រ័ត្រនៅប៉ុស្ដិ៍លេខ៥ ក្នុងព្រឹត្តិការណ៍ ជើងឯក TV5 BOXING KNOCK OUT SERIES ( K-Cement) សម្រាប់ប្រភេទទម្ងន់៦០គីឡូក្រាម។
យ៉ាងណាមិញ កីឡាកររូបនេះ បានអះអាងថាទោះជាការប្រកួតលើកក្រោយត្រូវប្ដូរគ្រោះថ្នាក់យ៉ាងណា ក៏លោកត្រូវតែប្ដូរយកជើងឯកអោយបានដាច់ខាតនោះដែរ ដោយសារតែកាលពីប្រកួតជើងឯកលើកមុនលោកបានត្រឹមតែជើងឯករងម្ដងហើយ។
លោក សេង កដិកា អ្នករៀបចំការប្រកួត បានថ្លែងប្រាប់ថា ក្រោយដណ្ដើមបានឱកាសក្នុងវគ្គពាក់កណ្ដាលផ្ដាច់ព្រ័ត្រ កីឡាករ លាភ រដ្ឋា មិនខុសពីក្ដាប់បានតំណែងជើងឯករងដោយស្វ័យប្រវត្តិនោះទេ ដែលលោកប្រកាសថាតំណែងជើងឯក ឬជើងឯករង សុទ្ធតែជាតំណែងមិនធម្មតានោះទេ សម្រាប់បេក្ខភាពដែលបានចូលប្រកួតតាំងពី៣២នាក់ រហូតនៅសល់តែ២នាក់ចុងក្រោយ ដើម្បីឡើងដណ្ដើមយកតំណែងជើងឯក។
លោកថាការប្រកួតដែលបានធ្វើឡើង កាលពីថ្ងៃសៅរ៍ទី ២៩ កញ្ញា គឺការប្រកួតដែលសូម្បីតែលោកក៏បុកពោះជំនួសអ្នកប្រកួតនោះដែរ ជាពិសេសនៅពេលកីឡាករ លាភ រដ្ឋា និងកីឡាករ ឡុង រ៉ាមី ដែលសុទ្ធតែមិនធ្លាប់បរាជ័យកន្លងមកមុនប៉ះគ្នា ត្រូវប្រកួតយកចាញ់ឈ្នះ ដើម្បីយកតែម្នាក់អោយឡើងប្រកួតដណ្ដើមជើងឯក។
លោកថាពេញចិត្តការប្រកួតរបស់គូទាំងពីរ មុនពេលរកឃើញលទ្ធផលចាញ់ឈ្នះ ជាពិសេសក្នុងពេលកីឡាករម្ខាងៗ បញ្ចេញអស់ពីសមត្ថភាពរៀងខ្លួន ព្រោះតែចង់បានជ័យជម្នះ។
លោកសម្ដែងការអបអរដែលកីឡាករអ្នកឈ្នះ ត្រូវបានតំណែងជើងឯករង ដោយមិនបាច់ប្រឹង តែលោកក៏មិនជឿថាកីឡាករ លាភ រដ្ឋា សុខចិត្តយកត្រឹមលេខ២ ហើយមិនប្រឹងយកលេខ១ សម្រាប់បញ្ចប់ការប្រកួតនោះឡើយ ដោយសារតែការប្រកួតកាលពីលើកមុន គេបានត្រឹមតែជើងឯករងម្ដងហើយ ដែលមានន័យថាធ្លាប់បាត់ឱកាសជើងឯក និងទឹកប្រាក់៤ពាន់ដុល្លារ។
លោកថាចំណាត់ថ្នាក់លេខ១ក្រៅពីទទួលបានពានជើងឯក ក៏ទទួលបានទឹកប្រាក់រហូតដល់៤ពាន់ដុល្លារផងដែរ ដោយមិនរាប់បញ្ចូលប្រាក់លើកទឹកចិត្តពីអ្នកគាំទ្រផង ប៉ុន្តែសម្រាប់ចំណាត់ថ្នាក់ជើងឯករង គឺបានតែ១៥០០ដុល្លារប៉ុណ្ណោះ ទើបលោកយល់ថាបើលាភ រដ្ឋា មិនប្រឹង ហើយធ្វើអោយភ្លាត់តំណែងជើងឯកម្ដងទៀត គឺពិតជាគួរអោយស្ដាយ។
លាភ រដ្ឋា និយាយថាកាលពីការប្រកួតជើងឯករបស់ប៉ុស្ដិ៍លេខ៥ កាលពីរដូវកាលមុន លោកក៏បានទទួលឱកាសឡើងទៅប្រកួតនៅវគ្គផ្ដាច់ព្រ័ត្របែបនេះផងដែរ ប៉ុន្តែក្រោយការប្រឹងប្រែងលោកបានត្រឹមតែចំណាត់ថ្នាក់ជើងឯករងប៉ុណ្ណោះ ដោយសារតែដៃគូដែលោកប៉ះជាមួយគឺមិនធម្មតា។
យ៉ាងណាមិញ លោកថាសម្រាប់ការប្រកួតលើកនេះ គឺលោកមានជំនឿច្រើនជាងមុន ដោយសារតែខ្លួនកាន់តែមានបទពិសោធន៍ ហើយសំខាន់បំផុត គឺលោកបានដាក់កំហិតខ្លួនឯងជាងមុន ដោយប្រឹងហាត់យប់ថ្ងៃៗតាំងពីបានឡើងប្រកួតក្នុងវគ្គ១ភាគ៤ ដោយក្រោយបានជ័យជម្នះលើកនេះ ក៏នឹងប្រឹងហ្វឹកហាត់អោយខ្លាំងផងដែរ ដើម្បីទៅកាន់វគ្គផ្ដាច់ព្រ័ត្រ។ លោកបានព្រលយថាបើបានត្រឹមតំណែងជើងឯករងម្ដងទៀត គឺលោកនឹងឈប់ចូលប្រកួតក្នុងការដណ្ដើមជើងឯកណាមួយទៀតហើយ៕
