អតីតមេដឹកនាំគណបក្សប្រឆាំង លោក សម រង្ស៊ី បានទាមទារឲ្យរដ្ឋាភិបាលងាកមកស្ដារប្រជាធិបតេយ្យឡើងវិញ បន្ទាប់ពីសភាអឺរ៉ុបជូនដំណឹងពីការចាប់ផ្ដើមដំណើរការដកប្រព័ន្ធអនុគ្រោះពន្ធពីកម្ពុជា។
ប្រធានចលនាសង្គ្រោះជាតិ លោក សម រង្ស៊ី ដែលកំពុងរស់នៅនិរទេសខ្លួននៅក្រៅប្រទេស បានសរសេរលើហ្វេសប៊ុករបស់លោកកាលពីម្សិលមិញថា រដ្ឋាភិបាលរបស់លោកនាយករដ្ឋមន្ដ្រី ហ៊ុន សែន ត្រូវងាកមកស្ដារលទ្ធិប្រជាធិបតេយ្យឡើងវិញជាបន្ទាន់ ដូចជាការដោះលែងលោក កឹម សុខា ឲ្យមានសេរីភាពទាំងស្រុង អនុញ្ញាតឲ្យគណបក្សសង្គ្រោះជាតិដំណើរការឡើងវិញ និងផ្ដល់តំណែងក្រុមប្រឹក្សាឃុំសង្កាត់ទាំងអស់ ដែលប្រជាពលរដ្ឋបានបោះឆ្នោតឲ្យគណបក្សសង្គ្រោះជាតិ។
លោក សម រង្ស៊ី សរសេរនៅលើហ្វេសប៊ុកថា៖ «ជំរុញឲ្យលោក ហ៊ុន សែន វិលត្រឡប់មកដើរលើផ្លូវប្រជាធិបតេយ្យវិញ គឺដោះលែងលោក កឹម សុខា ជាបន្ទាន់ និងអនុញ្ញាតិឲ្យគណបក្សសង្គ្រោះជាតិដំណើរការឡើងវិញ ហើយទទួលបានឡើងវិញនូវតំណែង ដែលប្រជាពលរដ្ឋ បានបោះឆ្នោតប្រគល់ជូនសកម្មជនគណបក្សសង្គ្រោះជាតិ ទូទាំងប្រទេសកម្ពុជា»។
ក្នុងសេចក្តីប្រកាសព័ត៌មានកាលពីថ្ងៃសុក្រទី៥ ខែតុលាកន្លងមកនេះ គណៈកម្មការអឺរ៉ុបបានជូនដំណឹងដល់កម្ពុជា និងប្រទេសមីយ៉ាន់ម៉ាអំពីការចាប់ផ្ដើមដំណើរការការដកប្រព័ន្ធអនុគ្រោះពីប្រទេសទាំងពីរនេះ ដោយថា បានប្រព្រឹត្តអំពើរំលោភសិទ្ធិមនុស្សធ្ងន់ធ្ងរ។
ក្នុងសេចក្តីប្រកាសព័ត៌មាននោះ សហភាពអឺរ៉ុបលើកឡើងថា កម្ពុជាមិនបានធ្វើឲ្យប្រសើរឡើងនូវបញ្ហាសិទ្ធិមនុស្សរបស់ខ្លួនឡើយ បើទោះបីជាគណៈកម្មការស្វែងរកការពិតរបស់អឺរ៉ុបបានស្រាវជ្រាវ និងផ្តល់អនុសាសន៍ឲ្យមានការកែប្រែក៏ដោយ៕