ការប្រកួតជើងឯកនៅប៉ុស្ដិ៍លេខ៥ កាលពីថ្ងៃទី១៣ តុលា កីឡាករ លាភ រដ្ឋា បានក្លាយជាម្ចាស់ជើងឯកក្នុងការប្រកួតជ្រើសរើសជើងឯកក្នុងប្រភេទទម្ងន់៦០គីឡូក្រាមដូចការចង់បាន បើទោះជាជ័យជម្នះរបស់លោកបានកើតឡើងមានគឺដោយសារតែភាគីម្ខាងទៀតភ្លាត់ស្នៀត ព្រោះតែសម្រុកវាយខ្លាំង ហើយភ្លេចការពារខ្លួន។
លោកបានបង្ហាញអោយឃើញពីក្ដីស្រម៉ៃ ដែលលោកបញ្ជាក់ថាគឺជាអ្វីដែលលោកចង់បានតាំងពីឡើងរេញដំបូងៗ និងបានតម្លៃខ្លួនទាប។
កីឡាករ លាភ រដ្ឋា និយាយថា ការប្រដាល់កន្លងមកលោកបានត្រឹមតែតម្លៃខ្លួនត្រឹមតែដូចកីឡាករក្នុងស្រុកជើងថ្មីមួយចំនួនប៉ុណ្ណោះ បើទោះជាលោកឡើងរេញជាច្រើនប្រកួតមកហើយ ដោយមានទាំងលទ្ធផលល្អច្រើនជាងលទ្ធផលបរាជ័យ។
លោកថាការប្រកួតមួយលើកៗ បើទូទាត់លាត់សើយ បូករួមជូនអ្នកអោយទឹករួចរាល់ គឺសល់តែរង្វង់២០ម៉ឺនជាងប៉ុណ្ណោះ ដែលតម្លៃទទួលបាននេះ មិនស្មើនឹងការលះបង់ដែលលោកខំធ្វើដំណើរតាំងពីខេត្តបន្ទាយមានជ័យមកប្រកួតផ្លូវឆ្ងាយនោះផង។
លោកថាជីវិតជាកីឡាករ បានត្រឹមល្អមើលពេលនៅលើរេញប៉ុណ្ណោះ ប៉ុន្តែនៅពីក្រោយការបប្រកួត គឺរូបលោកគ្រាន់តែជាកម្មករស៊ីឈ្នួលរកប្រាក់ ដូចជាការលីសែងដើម្បីដូរប្រាក់ប៉ុណ្ណោះ។
លោកថាខ្លួនស្រឡាញ់ការប្រដាល់ គឺដោយសារតែចង់ល្បីឈ្មោះ និងសំខាន់គឺបានរកប្រាក់ ដែលលោកយល់ថាទោះជាត្រូវគេវាយបែកមុខបែកមាត់ក៏ធូរជាងទៅធ្វើការនៅថៃ និងស៊ីឈ្នួលគេនាពេលកន្លងមក។
លោកថាខ្លួនត្រូវធ្វើដំណើរពីខេត្តបន្ទាយមានជ័យគ្រប់លើកអោយតែមានការប្រកួត លើកលែងមានការផ្គូរផ្គងអោយប្រកួតជាប់អាទិត្យគ្នាទើបលោកស្នាក់នៅភ្នំពេញ ដោយសុំផ្ទះបងប្អូន ឬ មិត្តភ័ក្រ្តស្នាក់អាស្រ័យ គឺដោយសារតែចង់ល្បីនៅក្នុងពិភពប្រដាល់ និងចង់រកលុយពីការងារនេះអោយបានកាន់តែច្រើននោះឯង។
លាភ រដ្ឋា បានបង្ហាញអារម្មណ៍ត្រេកអរយ៉ាងខ្លាំង ដែលទទួលបានចំណាត់ថ្នាក់លេខ១ក្នុងការប្រកួតជ្រើសរើសជើងឯកកាលពីថ្ងៃសៅរ៍នោះ ដោយបានទាំងទឹកប្រាក់៤ពាន់ដុល្លារផង ថាជាអ្វីដែលលោកសប្បាយចិត្តខ្លាំង។
លោកថាការពិតការបរាជ័យកន្លងមកក្នុងព្រឹត្តិការណ៍ជ្រើសជើងឯងនៅប៉ុស្ដិ៍លេខ៥ សមតែលោកដកខ្លួនមិនប្រកួតរដូវកាលនេះទេ ប៉ុន្តែមកពីមិនអស់សង្ឃឹម និងចង់រកលុយអោយបានច្រើនក្រោយពេលល្បីឈ្មោះ ទើបចេះតែរុញអោយលោកពុះពារចូលប្រកួត។
យ៉ាងណាមិញ លោកថាបើខ្លួនមិនបានចូលប្រកួតក្នុងព្រឹត្តិការណ៍ជ្រើសរើសជើងឯកដែលទើបនឹងបញ្ចប់នេះទេ ក៏ប្រហែលមិនបានទឹកប្រាក់៤ពាន់ដុល្លារ និងបានក្លាយជាជើងឯកនោះដែរ ខណៈដែលលោករំពឹងថាក្រោយពេលកាន់ពាននឹងទទួលបានឱកាសឡើងរេញបានញឹក និងបានឡើងប្រកួតលើរេញជាមួយកីឡាករបរទេសផង ដើម្បីទទួលបានទឹកប្រាក់តម្លៃខ្លួនខ្ពស់ ដែលមួយប្រកួតគឺអាចបានដល់រង្វង់ជាង៣០០ដុល្លារនោះ។
លោកថាអ្វីដែលលោកចង់បានពីការលើកពាននេះ គឺបានឡើងរេញអោយញឹក ទទួលបានលុយអោយច្រើន ដើម្បីកុំអោយលោកពិបាកដដើរស៊ីឈ្នូលគេបន្ថែម ហើយពិបាកខ្លួន៕
