សភាពាណិជ្ជកម្មអឺរ៉ុបប្រចាំកម្ពុជាបានបង្ហាញក្ដីបារម្ភអំពីផលប៉ះពាល់យូរអង្វែង និងការពង្រីកវត្តមានរបស់មហាអំណាចចិនមកលើកម្ពុជា បើអឺរ៉ុបឈានដល់វិធានការកាត់ផ្ដាច់ប្រព័ន្ធអនុគ្រោះពន្ធពីកម្ពុជាមែននោះ។
ក្នុងលិខិតមួយដែលផ្ញើជូនទៅគណៈកម្មាការអឺរ៉ុបទទួលបន្ទុកកិច្ចការពាណិជ្ជកម្ម លោកស្រី Cecilia Malmström កាលពីថ្ងៃម្សិលមិញ សភាពាណិជ្ជកម្មអឺរ៉ុបប្រចាំកម្ពុជា ហៅកាត់ថា EURO CHAM បានទទូចឲ្យសហភាពអឺរ៉ុបពិចារណាឡើងវិញចំពោះវិធានការរបស់ខ្លួន ដែលអាចឈានទៅកាត់ផ្ដាច់ប្រព័ន្ធអនុគ្រោះពីកម្ពុជា។ EURO CHAM ថាទណ្ឌកម្មនេះនឹងបង្កផលប៉ះពាល់យូរអង្វែងមកលើផលប្រយោជន៍ពាណិជ្ជកម្មរបស់សហភាពអឺរ៉ុប និងគោលជំហររបស់អឺរ៉ុបក្នុងការជំរុញគោលការណ៍លទ្ធិប្រជាធិបតេយ្យ ខណៈចិនកំពុងពង្រីកវត្តមានរបស់ខ្លួនក្នុងប្រទេសកម្ពុជា និងនៅក្នុងតំបន់ផងនោះ។
សភាពាណិជ្ជកម្មអឺរ៉ុបប្រចាំកម្ពុជាលើកឡើងក្នុងលិខិតនោះទៀតថា សហភាពអឺរ៉ុបគួរបន្ដកិច្ចសហប្រតិបត្តិការណ៍ជាមួយរដ្ឋាភិបាលកម្ពុជាបន្ដទៀត ជាជាងការអនុវត្តវិធានការកាត់ផ្ដាច់ប្រព័ន្ធអនុគ្រោះពន្ធនេះ។
កាលពីថ្ងៃទី៥ខែតុលាកន្លងទៅ គណៈកម្មការអឺរ៉ុបបានជូនដំណឹងដល់កម្ពុជាអំពីការចាប់ផ្ដើមដំណើរការដកប្រព័ន្ធអនុគ្រោះ EBA ដោយចោទថា រដ្ឋាភិបាលកម្ពុជាបានប្រព្រឹត្តអំពើរំលោភសិទ្ធិមនុស្សនិងសិទ្ធិការងារធ្ងន់ធ្ងរ។ សហភាពអឺរ៉ុបលើកឡើងថា កម្ពុជាមិនបានធ្វើឲ្យប្រសើរឡើងនូវបញ្ហាសិទ្ធិមនុស្សរបស់ខ្លួនឡើយ បើទោះបីជាគណៈកម្មការស្វែងរកការពិតរបស់អឺរ៉ុបបានស្រាវជ្រាវ និងផ្តល់អនុសាសន៍ឲ្យមានការកែប្រែក៏ដោយ៕
