តារាសម្តែងនិងចម្រៀងកម្ពុជាដែលមានជម្ងឺខូចក្រលៀនបានអះអាងថា អាហារបំប៉ន និងផលិតផលធ្វើឲ្យស្បែកសបង្កឲ្យពួកគេខូចក្រលៀន ដែលតម្រូវឲ្យមានការវះកាត់ជាបន្ទាន់។
ក្នុងរយៈពេលចុងក្រោយ គេកត់សម្គាល់ថា តារាវ័យក្មេងច្រើនឡើងបានក្លាយជាអ្នកជម្ងឺខូចក្រលៀន ដោយតម្រូវឲ្យពួកគេវះកាត់បន្ទាន់ដើម្បីបន្តជីវិត ហើយមានអ្នកខ្លះបាត់បង់ជីវិត។ ក្នុងនោះតារាចម្រៀងកញ្ញា ខេមរៈ ស្រីពៅ បានទទួលមរណភាពកាលពីខែមុន ព្រោះតែជំងឺខូចក្រលៀនរបស់នាងព្យាបាលមិនទាន់ពេល។ យ៉ាងណាមិញ អ្វីដែលគេចាប់អារម្មណ៍ គឺមូលហេតុដែលនាំអោយខូចក្រលៀនទាំងវ័យក្មេងរបស់តារាទាំងនោះ មានប្រភពស្រដៀងគ្នា គឺការប្រើប្រាស់អាហារបំប៉ន និងផលិតផលថែសម្ផស្ស។
លោក យូ ឌីស្កូ ដែលបានវះកាត់ដូរក្រលៀនបានជោគជ័យមុនគេនៅក្នុងប្រទេសឥណ្ឌាបានអះអាងថា មូលហេតុដែលលោកមានជំងឺខូចក្រលៀនកាលពីមួយរយៈមុន គឺបណ្ដាលមកពីលោកប្រើថ្នាំអាហារបំប៉នច្រើនពេក ដោយក្នុងនោះលោកក៏បានប្រើថ្នាំដើម្បីឲ្យសាច់ស្អាត និងខ្ចីក្នុងពេលមិនទាន់ផ្ទុះជំងឺនោះផង។ លោកត្រូវគេដឹងថា គឺជាអតីតអ្នកតំណាងលក់ផលិតផលអាហារសុខភាព ឬហៅថាអាហារបំប៉ន ដោយលោកបានសារភាពថា នៅក្នុងរយៈពេលនោះ លោកបានប្រើថ្នាំដែលជាប្រភេទអាហារបំប៉នយ៉ាងច្រើននៅក្នុងពេលនេះ ហើយក្រោយមកក៏មានជំងឺខូចក្រលៀនទាំងគូតែម្ដង។
បន្ទាប់ពី លោក យូ ឌីស្កូ ធ្លាក់ខ្លួនឈឺធ្ងន់ មហាជនជួយរៃអង្គាសថវិកាគ្នាឲ្យលោកបានវះកាត់ដូរក្រលៀនម្ខាងនៅក្នុងប្រទេសឥណ្ឌា។ លោកត្រូវលាងឈាម២ដងក្នុងមួយអាទិត្យនៅមុនពេលធ្វើទុក្ខធ្ងន់។ យ៉ាងណាមិញ មកដល់ពេលនេះអាការៈរបស់លោកបានជាសះស្បើយហើយ បើទោះជាលោកត្រូវប្រើថ្នាំជំនួយក្រលៀនដែលបានដូរអស់មួយជីវិត។
កញ្ញា ខេមរៈ ស្រីពៅ ដែលទើបតែបានបញ្ចប់ពិធីបូជាសព ក៏ត្រូវបានលោក ខេមរៈ សិរីមន្ត ជាបងប្រុសបានអះអាងថា ក៏មានជំងឺខូចក្រលៀនដូចគ្នាផងដែរ។ លោកថា ប្អូនស្រីរបស់លោកចាប់ផ្ដើមមានជំងឺក្រលៀននេះ ដោយសារតែការញ៉ាំថ្នាំឲ្យស និងថ្នាំជាច្រើនប្រភេទទៀត ដើម្បីថែរក្សាសម្រស់ផង និងដោយសារតែនាងឧស្សាហ៍ប្រើថ្នាំពេលមានអាការៈឈឺផង។
លោក ខេមរៈ សិរីមន្ត បានបន្តថា ប្អូនស្រីរបស់ខ្លួនមានជំងឺធ្វើទុក្ខប្រមាណ៤ឆ្នាំមកហើយ ហើយដោយសារតែនាងមិនក្លាហានក្នុងការទៅទទួលការព្យាបាលនៅពេទ្យ ទើបបណ្ដាលឲ្យនាងសង្គ្រោះលែងបាន បើទោះជាបានបញ្ជូនទៅវះកាត់ក្រលៀននៅឥណ្ឌា។ លោកបានទទូចកុំអោយមហាជន ជាពិសេសតារាៗជំនាន់ក្រោយប្រើថ្នាំសាច់ស្អាត ថ្នាំសម្រក និងអាហារបំប៉នជាដើម។ លោកបញ្ជាក់យ៉ាងខ្លីថា បើប្អូនស្រីរបស់លោកមិនប្រើថ្នាំច្រើនប្រភេទនោះទេ ក៏មិនបណ្ដាលឲ្យខូចក្រលៀន និងបណ្ដាលឲ្យមានជំងឺផ្សេងៗមកបៀតបៀននោះដែរ។
មិនខុសគ្នាដែរ តារាសម្ដែងអ្នកនាង នៅ ណាវីន ដែលទើបត្រលប់មកពីវះកាត់ក្រលៀននៅក្នុងប្រទេសឥណ្ឌាបានថ្លែងកាលពីថ្ងៃទី១០ ខែកុម្ភៈ នៅព្រលានយន្តហោះថា អ្នកនាងក៏មានជំងឺខូចក្រលៀនទាំងសងខាងផងដែរ ដោយក្នុងពេលមិនទាន់មានលទ្ធភាពវះកាត់ដូរក្រលៀន គឺអ្នកនាងមិនចង់រស់នោះទេ ដោយសារតែការធ្វើទុក្ខពិបាកពេក។
អ្នកនាង នៅ ណាវីន ចាប់ផ្ដើមមានជំងឺខូចក្រលៀន ដោយសារតែកាលពីមុនទម្លាប់ញ៉ាំថ្នាំឲ្យស និងញ៉ាំថ្នាំសម្រក ខណៈដែលថ្នាំងងុយគេង ក៏អ្នកនាងទទួលទានច្រើនក្នុងពេលមិនស្រួលខ្លួន។ អ្នកនាងថា ថ្នាំទាំងនោះត្រូវបានគ្រូពេទ្យប្រាប់ថា គឺជាមូលហេតុបណ្ដាលឲ្យក្រលៀននាងខូច ហើយនាងក៏សប្បាយចិត្តផងដែរ ដែលមានលទ្ធភាពវះកាត់ដាក់ក្រលៀនថ្មីបានម្ខាង បើទោះជាត្រូវលេបថ្នាំអស់មួយជីវិត។ អ្នកនាងថា ថ្នាំឲ្យស្បែកស ថ្នាំឲ្យសាច់ស្អាត ថ្នាំសម្រក និងថ្នាំងងុយគេងជាដើម ប្រសិនបើអាចជៀសបានគឺគួរតែជៀស ដោយសារតែនាង និងអ្នកដែលមានជំងឺខូចក្រលៀនផ្សេងទៀត សុទ្ធតែមកពីហេតុផលហ្នឹង៕
កែតម្រូវ៖ ត្រង់កថាខណ្ឌទី៥ នៃអត្ថបទខាងលើនេះ លោក ខេមរៈ សិរីមន្ត មិនបានមានប្រសាសន៍ដូចការចុះផ្សាយកាលពីម៉ោង១៤និង០៦នាទីនោះទេ ហើយកថាខណ្ឌនេះ ត្រូវបានផ្ទៀងផ្ទាត់ឡើងវិញ និងត្រូវបានកែសម្រួលនៅម៉ោង៥និង៥៧នាទី ដូចខ្លឹមសារខាងក្រោមនេះ៖
«កញ្ញា ខេមរៈ ស្រីពៅ ដែលទើបតែបានបញ្ចប់ពិធីបូជាសព ក៏ត្រូវបានលោក ខេមរៈ សិរីមន្ត ជាបងប្រុសបានអះអាងថា ក៏មានជំងឺខូចក្រលៀនដូចគ្នាផងដែរ។ លោកថា ប្អូនស្រីរបស់លោកចាប់ផ្ដើមមានជំងឺក្រលៀននេះ ដោយសារតែការប្រើថ្នាំញឹកញាប់ ដោយលោកបញ្ជាក់ថា ជាពិសេសគឺថ្នាំបំបាត់ការឈឺចាប់ ក្រោយពេលប្អូនស្រីរបស់លោកមានបញ្ហាជើងក្រោយពេលរាំហើយភ្លាត់ឆ្អឹង។ លោកក៏ចង់សំដៅថា ការញ៉ាំថ្នាំឲ្យស អាហារបំប៉នមួយចំនួន និងថ្នាំថែរក្សាសម្រស់ក៏ជាមូលហេតុដែលធ្វើអោយមានបញ្ហាក្រលៀនផងដែរ។»
