លោកនាយករដ្ឋមន្ត្រី ហ៊ុន សែន ចំណាយលុយជាង ១៨៥លានរៀល ឬប្រហែល ៤៦ ២៥០ ដុល្លារ ឲ្យទៅកម្មករនៅរោងចក្រមួយ ក្នុងទិវាពលកម្មអន្តរជាតិ១ឧសភានេះ ។
តាមហ្វេសប៊ុកនាយករដ្ឋមន្ត្រី រោងចក្រ«យីដា» ស្ថិតនៅស្រុកកៀនស្វាយ ខេត្តកណ្តាល បានរៀបចំពិសាអាហារជុំគ្នា និងរាំលេងកំសាន្ត នៅថ្ងៃពុធនេះ ហើយថា កម្មវិធីនេះមានកម្មករប្រមាណ ៣៧០០នាក់ចូលរួម។
លោកនាយករដ្ឋមន្ត្រី ថ្លែងក្នុងកម្មវិធីនេះថា៖ «ពូបាននាំមកជំនួយសម្រាប់ក្មួយៗថ្ងៃនេះ ជូនក្មួយៗទំាង ៣៧០០នាក់ ក្នុងម្នាក់ៗ៥ម៉ឺនរៀល»។
បើតាមនាយករដ្ឋមន្ត្រី រោងចក្រ ១ ២៨៧ផ្សេងទៀត បានរៀបចំកម្មវិធីដូចគ្នានេះនៅទូទាំងប្រទេស ហើយថា មានកម្មករប្រមាណ៧៩ម៉ឺននាក់ចូលរួម។ លោកបញ្ជាក់ថា ចំនួននេះកើនជាងឆ្នាំមុន ២៦ម៉ឺននាក់ បើទោះបីឆ្នាំនេះ កម្មករខ្លះចេញទៅហែក្បួនដាក់ញត្តិក៏ដោយ។