អាជ្ញាធរក្រុងសិរីសោភ័ន បានឲ្យដឹងថា ទំហំនៃការខូចខាតមានតម្លៃដល់ទៅជាង ៣០ម៉ឺនដុល្លារ ក្រោយពីផ្សារមួយស្ថិតក្នុងខេត្តបន្ទាយមានជ័យ ត្រូវភ្លើងឆាបឆេះស្ទើតែទាំងស្រុងកាលពីទៀបភ្លឺនាថ្ងៃនេះ។
អភិបាលក្រុងសិរីសោភ័ណ លោក ហុល រ៉ៃយ៉ា តូបចំនួន ៦៧របស់អាជីវករនៅផ្សារអូរអំបិល ដែលស្ថិតក្នុងក្រុងសិរីសោភ័ណ ត្រូវភ្លើងឆាបឆេះនៅម៉ោងប្រហែល ៤ព្រឹកថ្ងៃអាទិត្យនេះ។
អភិបាលក្រុងរូបនេះ បានអះអាងថា អគ្គិភ័យនេះបណ្ដាលមកពីការឆ្លងចរន្តអគ្គិសនី ហើយថា សមត្ថកិច្ចបានពន្លត់ភ្លើងរួចហើយ ក្រោយពីរថយន្តពន្លត់អគ្គភ័យ ៨គ្រឿង ត្រូវបានបញ្ជូនឲ្យទៅបង្ក្រាបអគ្គិភ័យនេះ។
លោកបន្ដថា៖ «ផ្ទុះសេខ្សែភ្លើង ហើយឆេះអស់៦៧តូប ប្រើប្រាស់ឡានទឹក ៨គ្រឿង។ កំពុងសុំគោលការណ៍ឯកឧត្តមអភិបាលបន្ថែម ប៉ុន្ដែ ក្នុងអំឡុងពេលនេះ កំពុងតែសម្អាតសិន»។
បើតាមអភិបាលក្រុងសិរីសោភ័ណរូបនេះ អគ្គិភ័យបានបង្កការខូចខាតជាទឹកប្រាក់ទំហំជាង ៣០ម៉ឺនដុល្លារអាមេរិក ហើយថា អាជ្ញាធរកំពុងដោះស្រាយជួយសម្របសម្រួលដល់ក្រុមអាជីរករ ដែលតូបរបស់ពួកគេ ត្រូវបានភ្លើងឆេះ៕
