តំណាងពលរដ្ឋ អះអាងថា អ្នកភូមិប្រមាណ៤០០នាក់នៅស្រុកកណ្តាលស្ទឹង ខេត្តកណ្តាល បានប្រមូលផ្តុំគ្នាតវ៉ាមុខសាលាស្រុកនៅព្រឹកនេះ ដើម្បីស្នើទៅអាជ្ញាធរស្រុកឲ្យដោះស្រាយបញ្ហាដីធ្លីរបស់ពួកគេដែលរងផលប៉ះពាល់ដោយគម្រោងអភិវឌ្ឍន៍ព្រលានយន្តហោះថ្មីរបស់ក្រុមហ៊ុន OCIC។
លោក ភោគ ផាន់នី ដែលអះអាងថា ជាតំណាងពលរដ្ឋប្រាប់ វី.អូ.ឌី ថា ដី៨៣ហិកតាជាដីក្រុមសាមគ្គីរបស់ប្រជាសហគមន៍នៅឃុំអំពៅព្រៃ ត្រូវបានគេលួចលក់តៗគ្នាទៅឲ្យក្រុមហ៊ុនអភិវឌ្ឍន៍ព្រលានយន្តថ្មី គឺក្រុមហ៊ុន OCIC ច្រើនឆ្នាំហើយ ដោយអាជ្ញាធរមិនបានដោះស្រាយជូនពលរដ្ឋឡើយ។
លោក បន្ថែមថា៖ «ដីនោះជាដីក្រុមសាមគ្គី ដែលមេឃុំចាស់គាត់បានកំណត់ចែកជាដីក្រុមសាមគ្គីមួយផ្នែក ដីព្រៃសហគមន៍រួមឃុំមួយផ្នែក និងដីបឹងរួមឃុំមួយផ្នែក។ វាមានពីរបីចំណុះនោះ។ ហើយដល់ពេលឥលូវនេះ ខ្ញុំយកដីក្រុមសាមគ្គីដែលមិនទាន់ដោះស្រាយហ្នឹងមកឲ្យអាជ្ញាធរដោះស្រាយ ព្រោះដីក្រុមសាមគ្គីនេះមិនអាចពលរដ្ឋណាអាចលក់តែម្នាក់ឯងបានទេ។ បើលក់ត្រូវតែទទួលបានផលប្រយោជន៍ក្នុងក្រុមទាំងអស់ហ្នឹង ប៉ុន្តែ ក្រុមគាត់អត់ទាន់ទទួលបានសំណងហ្នឹង គាត់ស្នើឲ្យខ្ញុំដាក់សំណើទៅអាជ្ញាធរស្រុកអន្តរាគមន៍ទៅក្រុមហ៊ុនដោះស្រាយបញ្ចប់ចំណុចសេសសល់ហ្នឹង»។
ពលរដ្ឋម្នាក់ទៀត លោក យ៉ែម យ៉ាត ឲ្យដឹងថា កាលឆ្នាំ១៩៨៤ អាជ្ញាធរមូលដ្ឋាននៅឃុំអំពៅព្រៃ បានកំណត់ដីរួមជូនពលរដ្ឋប្រើប្រាស់ និងអាស្រ័យផល គឺមានដីព្រៃសហគមន៍ ដីបឹងសហគមន៍ និងដីក្រុមសាមគ្គីសហគមន៍ ដែលដីទាំងអស់នោះសុទ្ធតែកំពុងរងផលប៉ះពាល់ពីគម្រោងអភិវឌ្ឍន៍ព្រលានយន្តថ្មីរបស់ក្រុមហ៊ុន OCIC។
លោក បន្តថា៖ «ពួកយើងតវ៉ានៅកន្លែងស្រុកហ្នឹង ចង់ឲ្យស្រុកអន្តរាគមន៍ទៅក្រុមហ៊ុនចេញមកដោះស្រាយជូនពលរដ្ឋមក ព្រោះដីនេះជាដីរបស់ប្រជាពលរដ្ឋទេ មិនមែនជាដីរបស់ឈ្មួញទេ ដីអាជ្ញាធរចាស់ពីដើមបែងចែកឲ្យក្រុមសាមគ្គីតើ! អ៊ីចឹង សូមឲ្យខាងសុរិយោដីស្រុកហ្នឹងជួយដោះស្រាយឲ្យពលរដ្ឋមក តាមតម្លៃសមស្របណាមួយមក ព្រោះម្ចាស់ដើមមិនបានលក់ទេ»។
កាលពីចុងឆ្នាំ២០១៨ ពលរដ្ឋជាង២ពាន់គ្រួសារនៅឃុំអំពៅព្រៃនេះ ធ្លាប់ទទួលបានសំណងគោលនយោបាយម្នាក់១០០ដុល្លារម្តងមកហើយជុំវិញជម្លោះដីបឹងរួមសហគមន៍ជាង៤០០ហិកតា ដែលពួកគេចោទថា អាជ្ញាធរមូលដ្ឋានឃុបឃិតគ្នាលួចលក់ទៅឲ្យក្រុមហ៊ុនឯកជនមួយ។
អភិបាលស្រុកកណ្តាលស្ទឹង លោក បូ ណារ៉េត មានប្រសាសន៍ថា បញ្ហានេះគឺមានភាពស្មុគ្រស្មាញពិបាកដោះស្រាយណាស់ ដោយថា រឿងនោះវាបានកន្លងផុតទៅជាច្រើនឆ្នាំហើយដោយពលរដ្ឋទើបតវ៉ា ប៉ុន្តែ យ៉ាងណា លោកនឹងពិនិត្យមើលឯកសាររបស់អ្នកភូមិសិន ថាត្រូវដោះស្រាយបានឬក៏អត់។
លោក បន្ថែមថា៖ «សម្រាប់ឃុំអំពៅព្រៃ ដោះស្រាយយ៉ាងម៉េចក៏មិនចប់ដែរ។ មូលហេតុមកពីប្រជាពលរដ្ឋ មកដល់ដំណាក់កាលនេះហើយដីវាមានការប្រែប្រួល ហើយនិយាយរួម ដីនៅម្តុំនេះ វាអត់មានដីណាទំនេរទេ។ វាសុទ្ធតែដីក្រុមហ៊ុនដែលបានទិញពីប្រជាពលរដ្ឋក្នុងសហគមន៍។ ប៉ុន្តែ បើលោកយល់ឃើញថា ចំណុចនេះចំណុចនោះមិនទាន់បានទិញ ចាំខ្ញុំយកឯកសារគាត់មកពិនិត្យមើលសិនលទ្ធផលម៉េច ចាំជំរាបប្រាប់គាត់វិញ»។
វី.អូ.ឌី មិនអាចសុំការឆ្លើយតបពីម្ចាស់ក្រុមហ៊ុន OCIC បានទេជុំវិញរឿងនេះ។
អាកាសយានដ្ឋានលំដាប់អន្តរជាតិថ្មី ដែលរដ្ឋាភិបាលគ្រោងនឹងសាងសង់ មានទីតាំងនៅក្រុងតាខ្មៅ និងស្រុកកណ្តាលស្ទឹង ខេត្តកណ្តាល និងផ្នែកខ្លះក្នុងស្រុកបាទី ខេត្តតាកែវ។ វាគ្រប់ដណ្ដប់លើផ្ទៃដីទំហំប្រមាណ ២ ៦០០ហិកតា និងគ្រោងចំណាយប្រាក់ ១ ៥០០លានដុល្លារ ហើយស្ថិតក្រោមការគ្រប់គ្រងរបស់ក្រុមហ៊ុន ខេមបូឌា អ៊ែរផត អ៊ិនវេសមិន។
ថវិការបស់ក្រុមហ៊ុននេះ បានមកពីប្រាក់កម្ចីធនាគារបរទេសចំនួន ១ ១០០ លានដុល្លារ កម្ចីពីភាគទុនក្រុមហ៊ុន OCIC ចំនួន ២៨០លានដុល្លារ និងដើមទុនចុះបញ្ជីចំនួន ១២០លានដុល្លារ ក្នុងទុនវិនិយោគទាំងនោះមាន ៩០ភាគរយជារបស់ក្រុមហ៊ុន OCIC និង ១០ភាគរយទៀត ជារបស់រដ្ឋលេខាធិការដ្ឋានអាកាសចរស៊ីវិល តំណាងរាជរដ្ឋាភិបាលកម្ពុជា៕