ធនាគារពិភពលោកព្រមានថា កម្ពុជាប្រឈមនឹងការខាតបង់ទឹកប្រាក់ចន្លោះពី៥១៣លានដុល្លារ ដល់៦៥៤លានដុល្លារ ប្រសិនជាបាត់បង់ប្រព័ន្ធអនុគ្រោះពន្ធរបស់អឺរ៉ុប EBA ។
ក្នុងរបាយការណ៍បច្ចុប្បន្នភាពសេដ្ឋកិច្ចកម្ពុជាចេញផ្សាយថ្ងៃ៦ ឧសភា នេះ ធនាគារពិភពលោកបានវាយតម្លៃថា ប្រសិនជាប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ (EBA) ត្រូវបានដកហូតពីកម្ពុជានោះ វិស័យកាត់ដេរត្រូវប្រឈមនឹងការខាតបង់ជាង៣៨១លានដុល្លារ ស្បែកជើងត្រូវប្រឈមនឹងការខាតបង់ជាង១២៨លានដុល្លារ ខណៈអង្ករដែលត្រូវបានអឺរ៉ុបចាប់ផ្ដើមយកពន្ធហើយនោះត្រូវខាតបង់ជាង១៤៤លានដុល្លារ។
ចំនួនពន្ធគយដែលអឺរ៉ុបនឹងយកពីផលិតផលពីកម្ពុជាមាន ១២ភាគរយទៅលើផលិតផលកាត់ដេរ ១៦ភាគរយពីផលិតផលស្បែកជើង អង្ករ២៦,២ភាគរយ និងកង់១០ភាគរយ។
ធនាគារពិភពលោកលើកឡើងក្នុងសេចក្ដីប្រកាសព័ត៌មានរបស់ខ្លួននៅថ្ងៃនេះផងដែរថា៖ « លទ្ធភាពដែលកម្ពុជានឹងអាចបាត់បង់ភាពអនុគ្រោះនាំទំនិញចូលទីផ្សារអឺរ៉ុបដោយរួចពន្ធក្រោមប្រព័ន្ធអនុគ្រោះពន្ធ EBA ទំនងជានឹងអាចបន្ថយល្បឿននៃការនាំចេញពីកម្ពុជា » ។
បើតាមធនាគារពិភពលោក ផលិតផលកាត់ដេរ ស្បែកជើង កង់ និងអង្ករ ដែលកម្ពុជានាំចេញទៅអឺរ៉ុបមានតម្លៃប្រមាណ៤ ៦៧០លានដុល្លារក្នុងឆ្នាំ២០១៨។
កាលពីដើមឆ្នាំ២០១៩នេះ លោក ហ៊ុន សែន បានប្រកាសពីយុទ្ធនាការពង្រឹងឯករាជ្យភាពរបស់កម្ពុជាតាមរយៈវិធានការជួយដល់ធុរកិច្ចមួយចំនួន ដែលលោកថាបើទោះបីជាគ្មានឬមានប្រព័ន្ធអនុគ្រោះពន្ធក៏កម្ពុជានៅតែទៅមុខ។
ក្នុងវេទិការដ្ឋាភិបាលនិងវិស័យឯកជន កាលពីថ្ងៃទី២៩ មីនាកន្លងទៅ លោកនាយករដ្ឋមន្ត្រី ហ៊ុន សែន បានបញ្ជាក់នៅចំពោះមុខអ្នករកស៊ីនៅស្រុកខ្មែរទាំងអស់ថា កម្ពុជានឹងសម្រេចគោលដៅ ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ខាងមុខ ទោះគ្មានប្រព័ន្ធអនុគ្រោះពន្ធរបស់សហភាពអឺរ៉ុបក៏ដោយ ។
លោកថា៖ «បើទោះបីជាត្រូវរឹតក្រមានឹងចង្គេះ ដើម្បីស៊ីឲ្យតិចក៏ត្រូវតែធ្វើដែរ ក៏ត្រូវតែរឹតដែរ ដើម្បីការពារឯករាជ្យរបស់ប្រទេស។ បើនរណាមួយហ៊ានឱនក្បាលលិឍជើងគេ ដើម្បីទទួលបានភាពអនុគ្រោះមិនបាច់ធ្វើមេដឹកនាំគេទេ»។
ទោះជាយ៉ាងណា កាលពីថ្ងៃទី២ ឧសភា ម្ចាស់ម៉ាក និងអ្នកបញ្ជាទិញចំនួន២០ស្ថាប័ន រួមមាន Adidas Gap Nike New balance ជាដើម បានស្នើទៅលោក ហ៊ុន សែន បង្ហាញពីឆន្ទៈពិតប្រាកដក្នុងការគោរពសិទ្ធិមនុស្ស សិទ្ធិសហជីព និងសង្គមស៊ីវិលក្នុងប្រទេសកម្ពុជា និងធ្វើយ៉ាងណារក្សាប្រព័ន្ធអនុគ្រោះពន្ធនេះឲ្យបាន។
សហភាពអឺរ៉ុប កាលពីខែកុម្ភៈ ឆ្នាំ២០១៩នេះ បានប្រកាសរាប់ថ្ងៃថយក្រោយលើវិធានការព្យួរជាបណ្ដោះអាសន្នប្រព័ន្ធអនុគ្រោះពន្ធពាណិជ្ជកម្ម EBA ពីកម្ពុជា ក្រោយពីប្លុកលោកសេរីមួយនេះរកឃើញថា រដ្ឋាភិបាលបានបរាជ័យក្នុងការស្ដារស្ថានភាពសិទ្ធិមនុស្ស និងលទ្ធិប្រជាធិបតេយ្យ៕
