អ្នករាយការណ៍ពិសេសអង្គការសហប្រជាជាតិថ្លែងថា លោកស្រីទទួលបានញត្តិច្រើនពីប្រជាពលរដ្ឋមានជម្លោះដីធ្លីទូទាំងប្រទេស ហើយបានយកបញ្ហាទាំងអស់នេះប្រាប់ទៅរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា។
បន្ទាប់ពីប្រជុំពិភាក្សាជាមួយរដ្ឋមន្ត្រីក្រសួងដែនដី លោក ជា សុផារ៉ា កាលពីម្សិលមិញ លោកស្រី រ៉ូណា ស្មីត បានឲ្យ VOD ដឹងថា លោកស្រីបានលើកយកបញ្ហាជម្លោះដីធ្លីជាច្រើនដែលរួមមានបញ្ហាស្មុគស្មាញនៃជម្លោះដីធ្លីក្នុងខេត្តកោះកុង និងការផ្ដល់ប័ណ្ណកម្មសិទ្ធិដីធ្លីផងនោះ ដើម្បីពិភាក្សាជាមួយរដ្ឋមន្ត្រីក្រសួងដែនដី។
លោកស្រីថា៖ «ខ្ញុំបានលើកឡើងករណីនៅកោះកុង ហើយខ្ញុំនៅតែបន្តទទួលបានញាត្តិជាច្រើន ពីក្រុមផ្សេងគ្នាទៀតនៅក្នុងប្រទេសកម្ពុជា ដើម្បីស្វែងរកដំណោះស្រាយដី។ ហើយខ្ញុំបានរៀបរាប់ករណីនៅក្នុងខេត្តកោះកុង និងភាពស្មុគស្មាញនៃស្ថានភាពនេះ»។
ទោះជាយ៉ាងណា លោកស្រី រ៉ូណា ស្មីត ទទួលស្គាល់ថា ក្រសួងមានការជឿនលឿនច្រើនក្នុងការដោះស្រាយបញ្ហានេះ។
ក្នុងសេចក្ដីប្រកាសព័ត៌មានរបស់ក្រសួងដែនដីកាលពីម្សិលមិញ លោក ជា សុផារ៉ា បានបញ្ជាក់ថារហូតមកដល់ពេលនេះ ក្រសួងបានដោះស្រាយបញ្ហាវិវាទដីធ្លីបានជាង៨ពាន់ករណី នៅសល់ជាង២០០០ករណីមិនទាន់ដោះស្រាយ ដោយព្យាយាមនឹងដោះស្រាយបន្តផងដែរ។
ប្រធានការិយាល័យផ្នែកអង្កេតអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា មូលហេតុដែលពលរដ្ឋតែងតែឡើងមកតវ៉ានៅក្រសួង គឺមកពីអស់ជំនឿទៅលើដំណោះស្រាយរបស់ថ្នាក់ក្រោមជាតិ ដោយលោកជំរុញឲ្យរដ្ឋត្រូវពង្រឹងអំណាច និងយន្តការថ្នាក់ក្រោមជាតិឡើងវិញឲ្យបានខ្លាំង។
លោកថា៖ «អ៊ីចឹង គឺត្រូវពង្រឹងយន្តការនៃការដោះស្រាយនៅថ្នាក់ស្រុកខេត្តហ្នឹងឲ្យមានប្រសិទ្ធភាព។ ទីពីរ ត្រូវតែពង្រឹងយន្តការ បានន័យថា ការផ្ដល់អំណាចជាមួយយន្តការដែលមានស្រាប់ហ្នឹង ដើម្បីឲ្យដោះស្រាយបញ្ហាដីធ្លីហ្នឹងឲ្យមានប្រសិទ្ធភាព ហើយបញ្ហាសំខាន់បំផុតនោះគឺអ្នកដែលមានសិទ្ធិអំណាចហ្នឹងមិនត្រូវខ្លាចអំណាចរបស់អ្នកដែលមានបញ្ហាដីធ្លី(ជាមួយពលរដ្ឋ) នោះទេ។»
កាលពីដើមខែឧសភានេះ ក្រសួងដែនដីបានប្រកាសថា ក្នុងរយៈពេល ៤ខែដើមឆ្នាំ២០១៩ ក្រសួងទទួលបណ្ដឹងជម្លោះដីធ្លីបានជាង១ម៉ឺនបណ្ដឹង ហើយភាគច្រើននៃបណ្ដឹងទាំងនោះត្រូវបានដោះស្រាយរួចរាល់ហើយ ខណៈបានចុះបញ្ជីដីធ្លីបាន ៣ភាគ៤ នៃចំនួនក្បាលដីសរុប ៧លានក្បាលដីនៅទូទាំងប្រទេសចាប់ពីដើមខែមករារហូតដល់ដំណាច់ខែមេសាកន្លងមកនេះ៕
