ប្រធានសហភាពការងារកម្ពុជា លោក អាត់ ធន់ អំពាវនាវរកកិច្ចអន្តរាគមន៍ដោះលែងតំណាងសហជីពរបស់ខ្លួន ពីររូប ដែលកងរាជអាវុធហត្ថស្រុកអង្គស្នួល ខេត្តកណ្តាល ឃាត់ខ្លួន ខណៈមានការប៉ះទង្គិចជាមួយសហជីពមួយទៀត ពេលចុះពន្យល់កម្មករឲ្យចូលសមាជិកសហជីព។
កាលពីថ្ងៃទី៧ ខែឧសភា កងរាជអាវុធហត្ថស្រុកអង្គស្នួល ចាប់ឃាត់ខ្លួនមន្ត្រីសហជីព៤នាក់ ក្រោយពីពួកគេបានវាយតប់គ្នានៅក្បែររោងចក្រ QMI ។ ប៉ុន្តែ ក្រោយមកសមត្ថកិច្ចបានដោះលែងមនុស្សពីរនាក់វិញ។
រោងចក្រ QMI ស្ថិតនៅតាមបណ្តោយផ្លូវជាតិលេខ៤ ស្រុកអង្គស្នួល ខេត្តណ្តាល ។
លោក អាត់ ធន់ អះអាងថា មនុស្សពីរនាក់ដែលសមត្ថកិច្ចដោះលែងនោះ ជាភាគីសហជីពម្ខាងទៀត ដែលថាបានបង្កជម្លោះវាយតប់ក្រុមការងារលោកមុន។ ប្រធានសហជីពរូបនេះ បង្ហាញការខកចិត្តថា ការបន្តឃាត់ខ្លួនតែមន្ត្រីរបស់លោកជារឿងអយុត្តិធម៌ មិនអាចទទួលយកបាន និងស្នើឲ្យដោះលែងវិញ។
លោកថា៖ «យើងចង់ឃើញការដោះស្រាយរឿងហ្នឹង ដោយបញ្ចប់រឿង ដោះលែងឲ្យគាត់មានសេរីភាពវិញ ហើយបន្តបើកការស៊ើបអង្កេតទៅថា មានមូលហេតុអ្វីបានពួកគេ [សហជីពមួយទៀត] មកបង្ករឿងជាមួយយើង។ ហើយបើឃាត់ ត្រូវឃាត់ទាំងសងខាង មិនមែនអ៊ីចឹងទេ។ នេះវាបង្ហាញការរើសអើងពេញទំហឹង»។
VOD មិនអាចទាក់ទងមេបញ្ជាការកងរាជអាវុធហត្ថស្រុកអង្គស្នួល ដើម្បីសុំការអត្ថាធិប្បាយជុំវិញករណីនេះបាននៅឡើយទេ។
បើតាមលោក អាត់ ធន់ មុនមានការវាយតប់គ្នា ក្រុមការងាររបស់លោកបានចុះជួបកម្មកររោងចក្រ QMI ដើម្បីពង្រីកសមាជិក ក្នុងបំណងឲ្យពួកគេបានចូលរួមជំរុញលក្ខខណ្ឌការងារក្នុងរោងចក្រនេះ។ ប៉ុន្តែ លោកថា ក្រុមសហជីពមួយក្រុមទៀតនៅរោងចក្រនេះ បានចេញមករករឿងពួកគាត់នៅខាងក្រៅរោងចក្រ រហូតមានការបះទង្គិចគ្នា។
