លោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ជំរុញទៅក្រសួងយុត្តិធម៌ ឲ្យទប់ស្កាត់អំពើពុករលួយនៅវិស័យតុលាការ ដើម្បីធានាដល់គោលដៅការអភិវឌ្ឍដោយចីរភាព។
ក្នុងសន្និសីទសារព័ត៌មាននាថ្ងៃព្រហស្បតិ៍ម្សិលមិញ លោកស្រី រ៉ូណា ស្មីត ថ្លែងថា គោលដៅអភិវឌ្ឍប្រកបដោយចីរភាព និងបទដ្ឋានសិទ្ធិមនុស្ស រដ្ឋាភិបាលកម្ពុជាចាំបាច់យកចិត្តទុកដាក់បន្ថែមទៀតក្នុងការប្រយុទ្ធប្រឆាំងទៅនឹងអំពើពុករលួយ ដូចមានក្នុងយុទ្ធសាស្ត្រចតុកោណដំណាក់កាលទី៤នេះ។
លោកស្រី រ៉ូណា ស្មីត លើកឡើងទៀតថា ករណីនេះ ស្ថាប័នតុលាការជាប់ពាក់ព័ន្ធជាពិសេសនឹងបញ្ហានេះ ដោយថា ស្ថាប័នតុលាការខ្លួនឯងជាគន្លឹះធានាឲ្យមានគណនេយ្យភាព។
លោកស្រីថា៖ «ខ្ញុំលើកទឹកចិត្តក្រសួងយុត្តិធម៌ឲ្យពិនិត្យមើលឲ្យបានលម្អិតលើសុចរិតភាពរបស់តុលាការ និងអំពើពុករលួយនៅក្នុងវិស័យតុលាការ»។
VOD មិនអាចទាក់ទងអ្នកនាំពាក្យក្រសួងយុត្តិធម៌ លោក ជីន ម៉ាលីន និងលោក គឹម សន្តិភាព បានទេនៅល្ងាចថ្ងៃព្រហស្បតិ៍ម្សិលមិញ ខណៈទូរសព្ទចូលតែគ្មានអ្នកទទួល។
លោកស្រី រ៉ូណា ស្មីត បង្ហាញពីការព្រួយបារម្ភផងដែរពីការប៉ះពាល់ដល់សិទ្ធិជនសង្ស័យនៅពេលចំណាត់ការបង្គាប់ឲ្យឃុំខ្លួនបណ្តោះអាសន្ន ធ្វើឲ្យពន្ធនាគារចង្អៀតណែនយ៉ាងខ្លាំងនោះ ។
លោកស្រី ស្នើក្រសួងយុត្តិធម៌គួរលើកទឹកចិត្តចៅក្រមឲ្យធានាថា ការឃុំខ្លួនមនុស្សនៅក្នុងពន្ធនាគារជាជម្រើសចុងក្រោយបំផុត។
