បណ្ដាញបក្សនយោបាយអន្ដរជាតិមួយ ដែលមានទំនាក់ទំនងជាមួយនឹងរដ្ឋាភិបាលកម្ពុជា បានទាមទារជាថ្មីឲ្យសហភាពអឺរ៉ុបប្រកាន់ជំហរ«យុត្តិធម៌» ជុំវិញការព្រមានដកប្រព័ន្ធអនុគ្រោះពន្ធពីកម្ពុជា។
ក្នុងសេចក្ដីថ្លែងការណ៍ចុះថ្ងៃទី១០ ខែឧសភា ដែល VOD ទើបតែទទួលបាននៅថ្ងៃនេះ អង្គការអ្នកប្រជាធិបតេយ្យនិយមកណ្តាលអន្តរជាតិ (IDC-CDI) ជំរុញឱ្យសហភាពអឺរ៉ុបពិចារណាឡើងវិញចំពោះវិធានាការរបស់ខ្លួន ដែលព្រមានដកប្រព័ន្ធអនុគ្រោះពន្ធពីកម្ពុជា។
បណ្ដាញបក្សនយោបាយអន្តរជាតិមួយនេះ បានលើកឡើងថា រដ្ឋាភិបាលដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានខិតខំអនុវត្តតាមលក្ខខណ្ឌរបស់សហភាពអឺរ៉ុប និងលក្ខខណ្ឌសិទ្ធិមនុស្សផ្សេងទៀតទាក់ទងនឹងសិទ្ធិនយោបាយ សិទ្ធិការងារ និងបើកចំហរសិទ្ធិសេរីភាពសង្គមស៊ីវិល។
ក្នុងសេចក្ដីថ្លែងការណ៍ដដែលនោះ អង្គការ IDC-CDI យល់ថា វិធានការឈានទៅដក EBA ពីកម្ពុជា នឹងធ្វើឲ្យប៉ះពាល់ដល់ការងាររបស់កម្មកររោងចក្រប្រមាណ ១លាននាក់ និងថា ប្រព័ន្ធអនុគ្រោះពន្ធ EBA បានជួយយ៉ាងច្រើនដល់ផ្នែកសេដ្ឋកិច្ចនៃរបបប្រជាធិបតេយ្យក្នុងប្រទេសកម្ពុជា។
អង្គការ IDC-CDI យល់ថា កម្ពុជាជាប្រទេសដែលទើបចេញពីសង្គ្រាម និងមានការអភិវឌ្ឍតិចតួច បានទទួលអត្ថប្រយោជន៍ពីប្រព័ន្ធអនុគ្រោះពន្ធនេះ។
ម្យ៉ាងទៀត អង្គការ IDC-CDI យល់ថា លទ្ធិប្រជាធិបតេយ្យ គឺជាដំណើរការវែងឆ្ងាយ ហើយថា ការកើនឡើងនៃចំនួនប្រជាជនវណ្ណៈកណ្ដាល បានរួមចំណែកយ៉ាងច្រើនដល់តម្លៃលទ្ធិប្រជាធិតេយ្យ និងការស្ដារលទ្ធិប្រជាធិបតេយ្យឡើងវិញ។
ការទាមទាររបស់សហជីពអន្ដរជាតិមួយនេះ គឺបន្ទាប់ពីសហភាពអឺរ៉ុប កាលពីថ្ងៃទី១១ កុម្ភៈ ឆ្នាំ២០១៩ បានប្រកាសអំពីការចាប់ផ្ដើមដំណើរការដែលឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ពីកម្ពុជា បន្ទាប់ពីមើលឃើញការធ្លាក់ចុះនៃលទ្ធិប្រជាធិបតេយ្យ បញ្ហាសិទ្ធិមនុស្ស និងនីតិរដ្ឋ នៅក្នុងរយៈពេល ១៨ខែចុងក្រោយមកនេះ។
សហភាពអឺរ៉ុបគូសបញ្ជាក់ទៀតថា ខ្លួនបានជួបពិភាក្សាដោយស្មោះត្រង់ជាមួយភាគីកម្ពុជា និងរំពឹងថា រដ្ឋាភិបាលនឹងកែលម្អបញ្ហាទាំងអស់ដែលជាក្ដីកង្វល់ និងជម្រុញឲ្យរដ្ឋាភិបាលកម្ពុជា ចាត់វិធានការចាំបាច់នានាជាបន្ទាន់ ដើម្បីរក្សាប្រព័ន្ធអនុគ្រោះពន្ធ EBA របស់អឺរ៉ុបនេះ។
ប៉ុន្ដែ ក្នុងដំណើរទស្សនកិច្ចលើកទី៧មកកាន់ប្រទេសកម្ពុជា អ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត ក៏បានឆ្លើយតបនឹងសំណួរអ្នកសារព័ត៌មានជុំវិញបញ្ហានេះផងដែរ ដោយអ្នកស្រីថា រដ្ឋាភិបាលរបស់លោក ហ៊ុន សែន គឺជាអ្នកធ្វើសេចក្ដីសម្រេចចិត្ត ជុំវិញការកែលម្អបញ្ហាកាតព្វកិច្ចសិទ្ធិមនុស្ស និងលទ្ធិប្រជាធិបតេយ្យ ដើម្បីបន្ដទទួលបានប្រព័ន្ធអនុគ្រោះពន្ធ EBA របស់អឺរ៉ុប៕
