មន្ត្រីអះអាងថា រដ្ឋាភិបាលពុំទាន់អាចឆ្លើយបានយ៉ាងណានៅឡើយទេរហូតមកដល់ថ្ងៃនេះ បន្ទាប់ពីលោក ទ្រី ភាព ស្នើសុំស្តារទន្លេមេគង្គដល់ព្រំដែនកម្ពុជា-វៀតណាម ដោយថា រង់ចាំសិក្សាមើលបញ្ហាច្រាំងទន្លេនោះសិន។
កាលពីចុងខែមេសាកន្លងមកនេះ ក្រុមហ៊ុន ទ្រី ភាព អេនជីនារីង អែន ខនស្រ្តាក់សិន របស់លោកឧញ៉ា ទ្រី ភាព បានស្នើសុំគោលការណ៍ទៅរដ្ឋាភិបាលចុះបូមស្តារ និងធ្វើច្រាំងទន្លេមេគង្គចាប់ពីចំណុចក្អមសំណ ច្រកព្រំដែនកម្ពុជា-វៀតណាម ដល់ចំណុចភូមិសាស្រ្តព្រំប្រទល់ខេត្តកំពង់ចាម ក្រចេះ និងតាមទន្លេបាសាក់។
មួយសប្ដាហ៍ក្រោយមក ទីស្តីការគណៈរដ្ឋមន្រ្តីបានរុញសំណើនោះទៅឲ្យរដ្ឋមន្រ្តីក្រសួងធនធានទឹក និងឧតុនិយម លោក លឹម គានហោ ឲ្យពិភាក្សាជាមួយស្ថាប័នពាក់ព័ន្ធ និងផ្តល់យោបល់ត្រឡប់។
អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា ប្រាប់ វី.អូ.ឌី នៅថ្ងៃនេះ ថា រហូតមកពេលនេះ ក្រសួងធនធានទឹកពុំទាន់បានឆ្លើយតបត្រឡប់ទៅរដ្ឋាភិបាលទេជុំវិញសំណើរបស់ក្រុមហ៊ុន ទ្រី ភាព នោះ ដោយលោកថា រង់ចាំឲ្យក្រុមការងារជំនាញចុះទៅសិក្សាពីបញ្ហាច្រាំងទន្លេសិន។
លោក ចាន់ យុត្ថា ប្រាប់ថា៖ «យើងឃើញទន្លេរបស់យើងរាប់រយឆ្នាំហើយ យើងមិនដែលធ្វើការស្តារ តើមានទាស់ខុសអី? យ៉ាងម៉េច? ល្បាប់ប៉ះពាល់ដល់ចរន្តទឹកអីយ៉ាងម៉េច? អាហ្នឹងយើងអត់ទាន់ដឹង ទាល់តែសិក្សាហើយបានយើងដឹង»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ បានបង្ហាញក្តីបារម្ភពីផលប៉ះពាល់បរិស្ថាន និងផលប្រយោជន៍ប្រជាពលរដ្ឋនៅតាមដងទន្លេ ហើយលោកស្នើទៅរដ្ឋាភិបាលគួរតែសិក្សាឲ្យបានស៊ីជម្រៅអំពីភាពចាំបាច់ក្នុងការផ្តល់ឲ្យក្រុមហ៊ុន ទ្រី ភាព ធ្វើការបូមស្តារទន្លេមេគង្គនេះ។
លោក សន ជ័យ មានប្រសាស៍ថា កន្លងមកមានក្រុមហ៊ុនមួយចំនួនបានស្នើសុំរដ្ឋាភិបាលធ្វើអាជ្ញាកម្មបូមខ្សាច់ ហើយបានធ្វើឲ្យបាក់ច្រាំងទន្លេ និងបង្កផលប៉ះពាល់ដល់ប្រជាពលរដ្ឋដែលរស់នៅតាមដងទន្លេនោះ ដោយពុំទាន់ទទួលបានដោះស្រាយនៅឡើយទេ។
លោកបន្ថែមថា៖ «អ៊ីចឹង ខ្ញុំគិតថា យើងមើលឃើញផលប៉ះពាល់ច្រើនជាងផលប្រយោជន៍ដែលទទួលបានមកវិញ។ ផល់ប៉ះពាល់ដែលមានស្រាប់មិនទាន់បានដោះស្រាយផង អ៊ីចឹងទៅ ប្រសិនបើមានការអនុញ្ញាតរបស់រដ្ឋាភិបាល ហើយមានផលប៉ះពាល់បន្ថែមទៀតនោះ ខ្ញុំគិតថា វានឹងធ្វើឲ្យបញ្ហានោះកើតឡើងកាន់តែធ្ងន់ធ្ងរថែមទៀត»។
ក្រុមហ៊ុនរបស់លោក ទ្រី ភាព ត្រូវបានរកឃើញថា ជាប់ពាក់ព័ន្ធនៅក្នុងជំនួញឈើខុសច្បាប់រាប់លានម៉ែត្រគូប ដែលត្រូវបាននាំចេញទៅកាន់ប្រទេសវៀតណាម និងចិន។
កាលឆ្នាំ២០១៥ អង្គការ Global Witness បានរកឃើញថា លោក ទ្រី ភាព ដែលគេស្គាល់ថាជាអ្នកជំនួញឈើដ៏ល្បីឈ្មោះនៅកម្ពុជា បានកាប់ឈើខុសច្បាប់ពីតំបន់សំខាន់ៗនៅកម្ពុជា និងបាននាំចេញទៅប្រទេសចិនប្រមាណ ៩០០ម៉ែត្រគូបក្នុងមួយថ្ងៃ។
របាយការណ៍នោះបន្តថា លោក ទ្រី ភាព ជាអ្នកគ្រប់គ្រងលើបណ្តាញកាប់ឈើខុសច្បាប់ ដោយពឹងផ្អែកលើការចូលដៃពីសំណាក់មន្រ្តីរដ្ឋាភិបាល កងកម្លាំងប្រដាប់អាវុធ នគរបាល និងគយ ដើម្បីកាប់ឈើដ៏កម្រនៅទូទាំងប្រទេស និងបញ្ជូនដាក់កប៉ាល់ទៅទីក្រុងហុងកុង៕