កម្ពុជា និង នេប៉ាល់ ប្តេជ្ញាពង្រីកសក្តានុពលវិស័យទេសចរណ៍រវាងគ្នាទៅវិញទៅមក តាមរយៈការបង្កើតជើងហោះហើរដោយផ្ទាល់ពីប្រទេសមួយទៅប្រទេសមួយ។
នាយករដ្ឋមន្ត្រីនេប៉ាល់ លោក ខេ ភី សាម៉ា អូលី កាលពីថ្ងៃចន្ទម្សិលមិញ បានជួបនាយករដ្ឋមន្ត្រីកម្ពុជា លោក ហ៊ុន សែន នៅរាជធានីភ្នំពេញ ក្នុងដំណើរទស្សនកិច្ចរបស់លោកមកកាន់កម្ពុជា។
ក្នុងជំនួបនោះ លោក ហ៊ុន សែន ឱ្យដឹងតាមហ្វេសប៊ុកថា លោកជំរុញឱ្យមានកិច្ចព្រមព្រៀងទៅលើវិស័យដឹកជញ្ជូន អាកាសចរណ៍ រវាងប្រទេសទាំងពីរ។
នាយករដ្ឋមន្ត្រីកម្ពុជា ប្រាប់នេប៉ាល់ទៀតថា សក្តានុពលទេសចរណ៍របស់កម្ពុជា គឺអង្គរវត្ត និងប្រាសាទជាច្រើន រីឯនេប៉ាល់ ជាទឹកដីដែលព្រះពុទ្ធបានប្រសូត្រ ជាសក្តានុពលទេសចរណ៍ដូចគ្នា។
លោក ហ៊ុន សែន ក៏បានលើកឡើងទៀតថា៖ «សភាពាណិជ្ជកម្មនៃប្រទេសទាំងពីរ អាចចុះអនុស្សារណៈនៃការយោគយល់គ្នា ដើម្បីពង្រឹងកិច្ចសហប្រតិបត្តិការរវាងវិស័យឯកជន និងវិស័យឯកជននៃប្រទេសទាំងពីរដែលអាចធ្វើការជាមួយគ្នាបាន»។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី ហៅការពង្រីកយន្តការទាក់ទាញភ្ញៀវទេសចរបរទេសឱ្យមកធ្វើដំណើរកម្សាន្តនៅកម្ពុជា ជាផ្នែកមួយជួយជំរុញដល់កំណើនសេដ្ឋកិច្ច។
ប៉ុន្តែ អ្នកឃ្លាំមើលរូបនេះ ផ្តល់ជាយោបល់ថា បើរដ្ឋាភិបាលមិនបានពង្រីកសេវាក្នុងស្រុកដោយខ្លួនឯងទេ លោកថា ពលរដ្ឋជាម្ចាស់ស្រុកទទួលបានផលតិចតួចបំផុតពីវិស័យទេសចរណ៍នេះ ដោយលោកលើកឧទាហរណ៍ ភ្ញៀវទេសចរចិន ជាដើម។
លោក មានប្រសាសន៍ថា៖ «យើងមើលពីផលប្រយោជន៍របស់ពលរដ្ឋខ្មែរ ដែលបានមកពីទេសចរណ៍ ប្រៀបធៀបទេសចរណ៍អឺរ៉ុប និងទេសចរណ៍ចិននេះ យើងឃើញថា ប្រជាពលរដ្ឋខ្មែរទទួលបានផលប្រយោជន៍តិចណាស់បើគិតមែនទែនទៅ ពីទេសចរចិន។ ព្រោះភ្ញៀវរបស់ចិនកាលណាគេមក អ្វីៗជាសេវាកម្មរបស់គេគឺចិនគ្រប់គ្រងទាំងអស់ តាំងពីចុះពីលើយន្តហោះ រហូតចូលសណ្ឋាគារ ចេញពីសណ្ឋាគារដើរទៅមើលទីតាំងផ្សេងៗរហូតវិលមកវិញ ចូលបាយ ក៏បាយរបស់ចិនដែរ»។
បើតាមហ្វេសប៊ុកនាយករដ្ឋមន្ត្រីជាការឆ្លើយតប នាយរដ្ឋមន្ត្រីនៃប្រទេសនេប៉ាល់បានឯកភាពទៅលើសំណើ និងយោបល់របស់កម្ពុជា។
ប្រទេសនេប៉ាល់ មានទំនាក់ទំនងការទូតជាមួយកម្ពុជាចាប់ផ្តើមនៅឆ្នាំ១៩៦៤មក ប៉ុន្តែ បានកាត់ផ្តាច់វិញនៅពេលកម្ពុជាមានសង្គ្រាមផ្ទៃក្នុង។
រហូតបច្ចុប្បន្ន ប្រទេសទាំងពីរមិនទាន់បានដាក់អគ្គរដ្ឋទូតនៅក្នុងប្រទេសរៀងខ្លួននៅឡើយទេ ប៉ុន្តែក្នុងកិច្ចពិភាក្សានោះ ភាគីទាំងពីរសង្ឃឹមថា កម្ពុជា និងនេប៉ាល់ នឹងដាក់ឱ្យមានអគ្គរដ្ឋទូតក្នុងប្រទេសរៀងៗខ្លួនឡើងវិញ។
កាលពីឆ្នាំ២០១៨ ភ្ញៀវទេសចរមកកាន់កម្ពុជាមានចំនួនជាង ៦លាន ២សែននាក់ កើនឡើង១១ភាគរយបើធៀបនឹងឆ្នាំ២០១៧ ហើយផ្ដល់ចំណូលឲ្យកម្ពុជាចំនួន ៤៣៥៦ លានដុល្លារ៕
