ស្នងការរាជធានីភ្នំពេញកំពុងសិក្សាស្វែងរកឧបករណ៍បច្ចេកវិទ្យាសម្រាប់ពង្រឹងសន្តិសុខនៅក្នុងប្រទេសចិន ដើម្បីយកមកប្រើប្រាស់សម្រាប់ដោះស្រាយបញ្ហាគ្រោះថ្នាក់ចរាចរណ៍ និងបង្ក្រាបបទល្មើសនៅក្នុងរាជធានីភ្នំពេញ។
លោក ស ថេត បញ្ជាក់ថា លោកចាប់អារម្មណ៍កាមេរ៉ាសុវត្ថិភាពតាមដងផ្លូវ ជាបច្ចេកវិទ្យាចុងក្រោយរបស់ចិន ដែលអាចជួយពង្រឹងសន្តិសុខនៅភ្នំពេញ។ នេះបើតាមហ្វេសប៊ុក លោក ស ថេត ចុះផ្សាយកាលពីថ្ងៃទី១៣ ខែឧសភា។
លោក ស ថេត៖ «ខ្ញុំបានចាប់អារម្មណ៍កាមេរ៉ាសុវត្ថិភាពដែលអាចថតបានចម្ងាយ១០គីឡូម៉ែត ហើយយើងបំពាក់នៅរាជធានីភ្នំពេញ វានឹងមានប្រយោជន៍សម្រាប់ដឹងហេតុការណ៍បានទាន់ហេតុការណ៍។»
លោក ស ថេត បញ្ជាក់ទៀតថា បើក្នុងករណីគ្រោះថ្នាក់ចរាចរណ៍កាមេរ៉ាសុវត្ថិភាពនោះអាចវិភាគលើជនបង្កថា តើពាក់អាវពណ៌អី ឡានពណ៌អី ស្លាកលេខ និងសក់ជនបង្ក ជាដើម។ លោកបញ្ជាក់ថា ការប្រើប្រាស់ឧបករណ៍ទាំងនេះ អាចកាត់បន្ថយកម្លាំងតាមដងផ្លូវ។
