មន្រ្តីអង្គការសហប្រជាជាតិ បានជំរុញឲ្យប្រទេសផ្សេងៗបញ្ឈប់ការគាំទ្រផ្នែកហិរញ្ញវត្ថុដល់ក្រុមយោធាមីយ៉ាន់ម៉ា និងអំពាវនាវជាថ្មីឲ្យនាំខ្លួនមេទ័ពធំៗយកមកកាត់ទោស។
ការអំពាវនាវនេះ ជាផ្នែកមួយនៃកិច្ចប្រឹងប្រែងដើម្បីឱ្យកងទ័ពមីយ៉ាន់ម៉ាទទួលខុសត្រូវចំពោះការរំលោភសិទ្ធិមនុស្សរបស់ពួកគេទៅលើជនជាតិភាគតិច រ៉ូហ៊ីងយ៉ា ក្នុងរដ្ឋរ៉ាឃីន។
ក្រុមមន្រ្តីបេសកកម្មស្វែងរកការពិតរបស់អង្គការសហប្រជាជាតិ បានលើកឡើងក្នុងសេចក្តីប្រកាសព័ត៌មានដែលចេញកាលពីម្សិលមិញ ថាមេបញ្ជាការយោធាមីយ៉ាន់ម៉ាត្រូវតែចូលខ្លួនឆ្លើយតបចំពោះឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងនឹងមនុស្សជាតិ និងអំពើប្រល័យពូជសាសន៍នៅក្នុងតុលាការមួយដែលអាចទុកចិត្តបាន។ ក្រុមមន្រ្តីអង្គការសហប្រជាជាតិទាំងនោះ បានចោទប្រកាន់ផងដែរថា មីយ៉ាន់ម៉ាមិនបានធ្វើឲ្យអស់ពីដៃពីជើងក្នុងការដោះស្រាយជម្លោះផ្ទៃក្នុងរបស់ជាតិ ឬការពារសិទ្ធិមនុស្សដែលក្នុងនោះក៏រាប់បញ្ចូលទាំងសិទ្ធរបស់ជនជាតិភាគតិច រ៉ូហ៊ីងយ៉ា ជាងមួយលាននាក់ដែលត្រូវបានគេបង្ខំឱ្យនិរទេសខ្លួនផងដែរ។
ប្រធានក្រុមមន្រ្តីបេសកកម្មស្វែងរកការពិតរបស់អង្គការសហប្រជាជាតិ លោក Marzuki Darusman ត្រូវបានដកស្រង់សម្តីមកចុះផ្សាយក្នុងសេចក្តីប្រកាសព័ត៌មានថា ស្ថានការណ៍នៅប្រទេសមីយ៉ានម៉ាគឺនៅទ្រឹងដដែល ដោយមិនមានសញ្ញាណាមួយឆ្ពោះទៅរកដំណោះស្រាយក្នុងការបញ្ចប់វិបត្តិនោះទេ។
តាមសេចក្តីប្រកាសព័ត៌មានដដែល មីយ៉ាន់ម៉ា មិនត្រឹមតែមិនធ្វើការដោះស្រាយវិបត្តិដែលកំពុងកើតមាននោះទេ តែបែរជាកាន់តែបង្កើតបញ្ហាថែម។ ប្រភពដដែលបន្តឲ្យដឹងថា អាជ្ញាធរមីយ៉ាន់ម៉ាបានកម្ចេចចោលទាំងស្រុងនូវភូមិដែលជនជាតិរ៉ូហ៊ីងយ៉ាបោះបង់ចោល ដែលជាការបំផ្លាញនូវភស្តុតាងនៃបទឧក្រិដ្ឋប្រកបដោយប្រសិទ្ធិភាព។
ក្នុងបេសកកម្មស្វែងរកការពិតរយៈពេល ១០ថ្ងៃ រដ្ឋាភិបាលមីយ៉ាន់ម៉ាមិនបានអនុញ្ញាតឲ្យមន្រ្តីអង្គការសហប្រជាតិទាំងនោះចូលប្រទេសខ្លួននោះទេ។ មន្រ្តីអង្គការសហប្រជាជាតិ បានត្រឹមតែចូលមើលស្ថានភាពរបស់ជនជាតិរ៉ូហ៊ីងយ៉ាដែលកំពុងរស់នៅក្នុងជំរុំក្នុងប្រទេសបង់ក្លាដេស ម៉ាឡេស៊ី ឥណ្ឌូនេស៊ី និងថៃ។
បេសកកម្មស្វែងរកការពិត ត្រូវបានបង្កើតឡើងនៅស្នាក់ការក្រុមប្រឹក្សាសិទ្ធិមនុស្ស នាទីក្រុងហ្សឺណែវ ប្រទេសស្វីស កាលពីខែមីនា ឆ្នាំ២០១៧។ បេសកកម្មនេះ មានភារកិច្ចស៊ើបអង្កេតការរំលោភបំពានដោយក្រុមយោធាទៅលើជនជាតិរ៉ូហ៊ីងយ៉ា និងជនជាតិភាគតិចផ្សេងទៀតនៅក្នុងជម្លោះផ្សេងៗជាមួយក្រុមប្រដាប់អាវុធនៅមីយ៉ាន់ម៉ា។
មីយ៉ាន់ម៉ា មិនបានទទួលស្គាល់បេសកកម្មស្វែងរកការពិតដែលបង្កើតឡើងក្រោមអាណត្តិរបស់ក្រុមប្រឹក្សាសិទ្ធិមនុស្សអង្គការសហប្រជាជាតិនោះទេ។
របាយការណ៍កម្រាស់ ៤៤៤ ទំព័រ ដែលបានដាក់ជូនក្រុមប្រឹក្សាសិទ្ធិមនុស្សអង្គការសហប្រជាតិ ដោយក្រុមមន្រ្តីបេសកកម្មស្វែងរកការពិត កាលពីខែកញ្ញា ឆ្នាំ២០១៨ បានចងក្រងឯកសារអំពីវិធីដែលយោធាមីយ៉ាន់ម៉ាបានរំលោភបំពានសិទ្ធិមនុស្សយ៉ាងឃោរឃៅ និងជាប្រព័ន្ធលើជនជាតិភាគតិចនៅទូទាំងប្រទេស។
មីយ៉ាន់ម៉ាបដិសេធការចោទប្រកាន់ទាំងនេះ ដោយថា យោធារបស់ខ្លួនមិនបានបង្ក្រាបលើស៊ីវិលនោះទេ ប៉ុន្តែ ពួកគេចាត់វិធានការតែពួកសកម្មប្រយុទ្ធរ៉ូហ៊ីងយ៉ា ដែលវាយប្រហារខ្លួនប៉ុណ្ណោះ៕
