អាជ្ញាធរមូលដ្ឋានម្នាក់ និងពលរដ្ឋនៅឃុំមួយក្នុងស្រុកគិរីសាគរ ខេត្តកោះកុង កំពុងព្រួយបារម្ភពីសុវត្ថិភាពរបស់ពួកគេ ក្រោយពីសមត្ថកិច្ចបានកោះហៅមេឃុំមា្នក់ទៅសាកសួរ បន្ទាប់ពីមានជម្លោះដីធ្លីជាមួយក្រុមហ៊ុនចិនមួយដែលកំពុងកាន់កាប់ដីសម្បទានសេដ្ឋកិច្ចនៅក្នុងខេត្តនេះ។
លិខិតកោះហៅចុះថ្ងៃទី៧ ខែឧសភា បានឲ្យដឹងថា មេឃុំព្រែកខ្សាច់ លោក រៀម រុំ ត្រូវបាននាយការិយាល័យកងរាជអាវុធហត្ថខេត្តកោះកុង លោក ខាត់ ខេមរ៉ា កោះហៅឲ្យចូលទៅការិយាល័យកងរាជអាវុធហត្ថខេត្ត ដើម្បីឆ្លើយបំភ្លឺករណីផ្ទាល់ខ្លួននៅថ្ងៃទី១៧ ខែឧសភាស្អែកនេះ។
មេឃុំព្រែកខ្សាច់ លោក រៀម រុំ ប្រាប់ វី.អូ.ឌី នៅថ្ងៃនេះថា លោកនឹងចូលទៅបំភ្លឺទៅតាមការកោះហៅ ប៉ុន្តែ លោកអះអាងថា រូបគាត់មិនធ្លាប់មានជម្លោះជាមួយនរណាឡើយ ហើយក៏មិនបានប្រព្រឹត្តកំហុសអ្វីនោះទេ។
មេឃុំរូបនេះបន្តថា កងរាជអាវុធហត្ថកោះហៅលោកឲ្យឆ្លើយបំភ្លឺបែបនេះ កើតឡើងក្រោយពីតំណាងក្រុមហ៊ុនចិន ញូញៀន បានព្រមានប្តឹងរូបលោកកាលពីថ្ងៃទី៨ ខែមេសាកន្លងមក ដោយចោទថា លោកជាអ្នកនៅពីក្រោយប្រជាពលរដ្ឋដែលធ្វើផ្លូវប៉ះពាល់ដីក្រុមហ៊ុន។
លោក រៀម រុំ ប្រាប់ថា៖ «ប្រសិនបើចោទខ្ញុំថា ចូលដៃចូលជើងជាមួយពលរដ្ឋ ខ្ញុំមានឯកសារបញ្ជក់ដែលប្រជាពលរដ្ឋគាត់ស្នើសុំធ្វើផ្លូវហ្នឹង។ ខ្ញុំក៏បានយកវាទៅដាក់មន្ទីរបរិស្ថាន ហើយមន្ទីរបរិស្ថានគាត់ថា មិនទាន់បានអនុញ្ញាតស៊ីញ៉េទទួលទេ។ អ៊ីចឹង ខ្ញុំក៏បានជូនពលរដ្ឋវិញថា កុំអាលធ្វើផ្លូវហ្នឹង ចាំខ្ញុំសុំគោលការណ៍ពីលោកជំទាវសិនថា គាត់ជួយអន្តរាគមន៍ដូចម្តេច? ប៉ុន្តែ ពលរដ្ឋមិនស្តាប់ គាត់ធ្វើ ហើយពេលគាត់ធ្វើ ក៏មិនបានប្រាប់ខ្ញុំ។ ខ្ញុំរវល់ទៅការប្អូនខ្ញុំ»។
តាមលិខិតកោះហៅ គឺកងរាជអាវុធហត្ថទទួលបានសំណុំរឿងពាក់ព័ន្ធមេឃុំព្រែកខ្សាច់នៅថ្ងៃទី១០ ខែមេសា តែ ២ថ្ងៃប៉ុណ្ណោះក្រោយក្រុមសន្តិសុខការពារដីសម្បទានរបស់ក្រុមហ៊ុន ញូញៀន បានចុះរារាំងពលរដ្ឋប្រហែល ៥០នាក់ មិនឲ្យកសាងផ្លូវចេញពីសហគមន៍ភ្ជាប់ទៅទីរួមស្រុក និងខេត្ត។
នាយការិយាល័យកងរាជអាវុធហត្ថខេត្តកោះកុង លោក ខាត់ ខេមរ៉ា បញ្ជាក់បន្ថែមថា ការកោះហៅលោកមេឃុំព្រែកខ្សាច់ឲ្យឆ្លើយបំភ្លឺនោះ មិនជាប់ពាក់ព័ន្ធនឹងវិវាទដីធ្លីរវាងប្រជាពលរដ្ឋ និងក្រុមហ៊ុនចិននោះឡើយ។
លោក ខាត់ ខេមរ៉ា បញ្ជាក់ថា សមត្ថកិច្ចកោះហៅមេឃុំរូបនេះ ឲ្យចូលបំភ្លឺក្នុងនាមជាសាក្សីក្នុងសំណុំរឿងគំរាមកំហែងរវាងបុគ្គល និងបុគ្គលផ្សេងទៀតប៉ុណ្ណោះ ប៉ុន្តែ លោកបដិសេធបញ្ចេញឈ្មោះអ្នកប្ដឹង ហើយបង្វែរឲ្យទៅសួរព្រះរាជអាជ្ញាសាលាដំបូងខេត្តកោះកុង លោក រស់ សារ៉ាំ វិញ។
លោក ខាត់ ខេមរ៉ា ប្រាប់ថា៖ «មិនមែនជាប់ពាក់ព័ន្ធរឿងដីធ្លីហ្នឹងទេ គឺពាក់ព័ន្ធនឹងការគំរាមកំហែងបុគ្គល ព្រោះគាត់ជាអ្នកដឹងរឿងហ្នឹង គាត់អត់ពាក់ព័ន្ធគាត់ទេ គ្រាន់តែជាអ្នកដឹងសាច់រឿងហ្នឹង»។
វិ.អូ.ឌី មិនអាចសុំការបញ្ជាក់ពីព្រះរាជអាជ្ញាអមសាលាដំបូងខេត្តកោះកុង លោក រស់ សារ៉ាំ បានទេជុំវិញរឿងនេះ។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា ប្រសិនបើកងរាជអាវុធហត្ថកោះហៅមេឃុំឲ្យឆ្លើយបំភ្លឺពាក់ព័ន្ធនឹងវិវាទដីធ្លីរវាងប្រជាពលរដ្ឋ និងក្រុមហ៊ុនមែននោះ វាគឺជាការគំរាមកំហែងបំបាក់ស្មារតីមិនឲ្យគាំទ្រពលរដ្ឋ។
លោកបន្ថែមថា៖ «អាជ្ញាធរឃុំដែលបានគាំទ្រប្រជាពលរដ្ឋឲ្យសាងសង់ផ្លូវ បែរជាត្រូវបានកងរាជអាវុធហត្ថកោះហៅគាត់ឲ្យទៅឆ្លើយបំភ្លឺទៅវិញ ខ្ញុំគិតថា វាគឺការគំរាមកំហែង និងមិនមែនជាការលើកទឹកចិត្តដល់អាជ្ញាធរឃុំដែលមានឆន្ទៈបម្រើប្រជាពលរដ្ឋទេ។ ខ្ញុំគិតថា ក្នុងនាមជាអាជ្ញាធរខេត្តដូចគ្នា បញ្ហាប៉ុណ្ណឹងមិនគួរណាដល់ថ្នាក់កងរាជអាវុធហត្ថកោះហៅគាត់ឲ្យទៅឆ្លើយបំភ្លឺនោះទេ»។
តំណាងពលរដ្ឋសហគមន៍ព្រែកខ្សាច់ អ្នកស្រី ទិត្យ តេន អះអាងថា លោកមេឃុំ រៀម រុំ តែងតែគាំទ្រ និងបម្រើផលប្រយោជន៍ប្រជាពលរដ្ឋក្នុងសហគមន៍ ហើយអ្នកស្រីបន្ថែមថា ប្រជាពលរដ្ឋនឹងនាំគ្នាទៅគាំទ្រលោកមេឃុំនៅថ្ងៃស្អែកនេះ។
អ្នកស្រី ទិត្យ តេន ប្រាប់ថា៖ «ពួកមីងនឹងទៅគាំទ្រគាត់ ព្រោះគាត់មានយុត្តិធម៌ណាស់ មេឃុំអាណត្តិនេះ គឺគាត់ល្អជាមួយប្រជាពលរដ្ឋ។ ពេលពួកយើងធ្វើអី គាត់ចុះតាមដាន គាត់ជួយពួកយើងគ្រប់សព្វបែបយ៉ាង ដូចថា សន្តិសុខក្រុមហ៊ុនចុះមកតាមមូលដ្ឋានធ្វើអីមិនសមហេតុផល គឺគាត់ចុះមកជួយពួកយើង ដោយថា រង់ចាំការដោះស្រាយសិន មិនឲ្យភាគីខាងនេះខាងនោះមកមានបញ្ហាមុននឹងចូលមក»។
កាលពីថ្ងៃទី៨ ខែមេសា ប្រជាពលរដ្ឋប្រមាណ ៥០នាក់នៅឃុំព្រែកខ្សាច់ បាននាំគ្នាសាងសង់ផ្លូវមួយខ្សែមានប្រវែង ២០០ម៉ែត្រ ភ្ជាប់សហគមន៍របស់ពួកគេទៅផ្លូវធំ ដែលនឹងជួយសម្រួលដល់ការធ្វើដំណើរពួកគាត់ទៅរកសេវាផ្សេងៗនៅទីរួមស្រុក និងខេត្ត ប៉ុន្តែ ត្រូវបានកម្លាំងសន្តិសុខជាច្រើននាក់របស់ក្រុមហ៊ុន ញូញៀន រារាំង និងគំរាមប្តឹងអ្នកពាក់ព័ន្ធទៀតផង។
ក្រុមហ៊ុនចិនមួយនេះ បានទទួលដីសម្បទានសេដ្ឋកិច្ចទំហំដល់ទៅ ៣ម៉ឺន ៦ពាន់ហិកតា នៅស្រុកបទុមសាគរ និងស្រុកគិរីសាគរ ពីរដ្ឋាភិបាលកម្ពុជាកាលពី ១១ឆ្នាំមុន ដើម្បីអភិវឌ្ឍមជ្ឈមណ្ឌលពាណិជ្ជកម្ម និងរមណីយដ្ឋានទេសចរណ៍ស្របតាមស្តង់ដារអន្តរជាតិ។
អ្នកភូមិអះអាងថា ការផ្តល់ដីសម្បទានសេដ្ឋកិច្ចនោះ បានធ្វើឲ្យប៉ះពាល់ដីធ្លីទំហំជាង ៦ពាន់ហិកតារបស់អ្នកភូមិជាង ២០០គ្រួសារ ប៉ុន្តែ ក្រុមហ៊ុន និងរដ្ឋាភិបាលដោះស្រាយជូនពលរដ្ឋបានមួយចំនួនធំ។
របាយការណ៍ និងការវិភាគផ្លូវច្បាប់របស់មជ្ឈមណ្ឌលអប់រំច្បាប់សម្រាប់សហគមន៍ (CLEC) ឆ្នាំ២០១២ បានរកឃើញថា គម្រោងផ្តល់ដីសម្បទានសេដ្ឋកិច្ចទៅឲ្យក្រុមហ៊ុនចិន ញូញៀន(UDG) បានធ្វើឲ្យប្រជាពលរដ្ឋ១,១៤៣គ្រួសារត្រូវបង្ខំឲ្យបោះបង់ចោលដីធ្លីប្រមាណជាង១០,០០០ហិកតា និងផ្ទះ១,៥០០ខ្នង ត្រូវបង្ខំឲ្យរុះរើ និងឈួសឆាយ៕
(អត្ថបទនេះ ធ្វើបច្ចុប្បន្នភាពនៅម៉ោង៥និង២៧នាទីល្ងាច ថ្ងៃទី១៧ ខែឧសភា ឆ្នាំ២០១៩។)
