ប្រជាសហគមន៍ជនជាតិដើមភាគតិចថ្នូន នៅខេត្តមណ្ឌលគិរី បាននាំគ្នាដាក់ពាក្យបណ្ដឹងទៅតុលាការខេត្តនៅថ្ងៃនេះ ដោយចោទមន្ត្រីបរិស្ថានថា បានគំរាមកំហែងពួកគេមិនឱ្យចុះល្បាតព្រៃនៅក្នុងដែនជម្រកសត្វព្រៃភ្នំព្រេចកាលពីខែមេសាកន្លងទៅ។
លោក ប្រង់ ណច ដែលអះអាងថាជាតំណាងសហគមន៍ជនជាតិដើមភាគតិចថ្នូន ១១០គ្រួសារស្ថិតនៅក្នុងឃុំរយ៉ ស្រុកកោះញែកនោះ ប្រាប់ វី.អូ.ឌី នៅថ្ងៃនេះថា ប្រជាសហគមន៍ជាង ៦០ នាក់បានជួបជុំគ្នា ដើម្បីចុះល្បាតព្រៃកាលពីថ្ងៃទី២៩ ខែមេសាកន្លងមកនេះ ប៉ុន្តែ ត្រូវបានប្រធានដែនជម្រកសត្វព្រៃភ្នំព្រេច លោក ហាន សាខន មិនអនុញ្ញាតឲ្យចុះល្បាត បើទោះបីជាពួកគាត់បានជូនដំណឹងទៅការិយាល័យបរិស្ថានស្រុកកោះញែក និងអាជ្ញាធរឃុំរួចហើយក៏ដោយ។
លោកបន្តថា ក្រៅពីមិនអនុញ្ញាតឱ្យចុះល្បាតហើយ ប្រធានដែនជម្រកសត្វព្រៃភ្នំព្រេចរូបនេះ ក៏បានគំរាមចាប់ពួកគាត់ដាក់ពន្ធនាគារ បើសិនជាពួកគាត់នៅតែធ្វើសកម្មភាពចុះល្បាតព្រៃ និងបង្កើតសហគមន៍ទៀត។
លោក ប្រង់ ណច ថា៖ «គំរាមមិនឱ្យបង្កើតសហគមន៍កន្លែងហ្នឹង មិនឱ្យទៅសែនព្រេន។ គាត់ថា នេះជាតំបន់របស់ខ្ញុំ ជាស្នូលសត្វព្រៃ ជម្រកសត្វរបស់ខ្ញុំ គាត់ថា អ៊ីចឹង។ ខ្ញុំជាអ្នកកាន់តំបន់នេះ ខ្ញុំមានសិទ្ធិដេញបងប្អូន ហើយគាត់អត់ឱ្យយើងទៅចុះល្បាត ហើយបើសិនយើងនិយាយខ្លាំងទៅ ចាប់ដាក់គុក ដាក់ខ្នោះ ចូលទៅតុលាការ គាត់និយាយគំរាមយើងអ៊ីចឹង»។
ជនជាតិដើមភាគតិចថ្នូនម្នាក់ទៀត លោក គីម សុភាព លើកឡើងថា ពួកគាត់ចុះល្បាតព្រៃដើម្បីការពារធនធានធម្មជាតិ ខណៈបច្ចុប្បន្នព្រៃឈើនៅក្នុងដែនជម្រកសត្វព្រៃភ្នំព្រេចកំពុងត្រូវគេកាប់បំផ្លាញជារៀងរាល់ថ្ងៃ។
លោក គីម សុភាព ប្រាប់ថា៖ «គេថា [មន្ត្រីបរិស្ថាន] បើសិនជាខ្លាំង គេនឹងចាប់ដាក់គុក ដាក់ខ្នោះ។ ខ្ញុំអត់ដឹងពីមូលហេតុអ្វីបានជាគេធ្វើអ៊ីចឹង។ ពេលពួកខ្ញុំចុះល្បាតសុទ្ធតែប្រាប់ដំណឹងដល់ពួកគាត់ទាំងអស់ ដើម្បីឱ្យគាត់ដឹងជាសាធារណៈ ហើយក៏ដើម្បីឱ្យជួយការពារព្រៃឈើទាំងអស់គ្នាដែរ។ មូលហេតុអីបានជាអ៊ីចឹង ខ្ញុំឆ្ងល់ដែរ»។
ប៉ុន្តែ ប្រធានដែនជម្រកសត្វព្រៃភ្នំព្រេច លោក ហាន សាខន បានច្រានចោលការចោទប្រកាន់នេះ ហើយថា លោកបានផ្សព្វផ្សាយដល់ជនជាតិដើមភាគតិចឲ្យយល់អំពីច្បាប់។
លោក ហាន សាខន ប្រាប់ថា៖ «ខ្ញុំបានទៅផ្សព្វផ្សាយច្បាប់ ខ្ញុំអត់បានគំរាមកំហែងគាត់ទេ សម្លុតកំហែងគាត់ណាមួយទេ គឺខ្ញុំទៅផ្សព្វផ្សាយប្រាប់អ្វីដែលយើងនិយាយ គឺនិយាយតាមផ្លូវច្បាប់ តែបើគាត់ប្រព្រឹត្តខុសពីផ្លូវច្បាប់ យើងត្រូវនិយាយពីមូលហេតុ វិធានការផ្លូវច្បាប់ មិនអ៊ីចឹង? មានអីត្រូវខុស»។
មន្ត្រីពង្រឹងសិទ្ធិអំណាចសហគមន៍នៃសមាគមការពារសិទ្ធិមនុស្សអាដហុក លោក ប៉ែន ប៊ុណ្ណារ៍ ចាត់ទុកទង្វើមន្ត្រីបរិស្ថានថា ជាការបំបាត់ស្មារតីប្រជាពលរដ្ឋកុំឱ្យនាំគ្នាចុះល្បាតព្រៃឈើបន្តទៀត។
លោក ប៉ែន ប៊ុណ្ណារ៍ ប្រាប់ថា៖ «អ្វីដែលសហគមន៍បានដាក់បណ្ដឹងជារឿងត្រឹមត្រូវ ពីព្រោះមានចែងនៅក្នុងរដ្ឋធម្មនុញ្ញ ដែលផ្ដល់សិទ្ធិទៅដល់ប្រជាពលរដ្ឋក្នុងការប្ដឹងបរិហារ ប្ដឹងតវ៉ាជាដើម។ អ៊ីចឹងឥឡូវនេះ គាត់ប្រើប្រាស់សិទ្ធិនៅពេលដែលគាត់ពឹង ឬមួយ សុំអន្តរាគមន៍ពីមន្ត្រីនគរបាលយុត្តិធម៌ទាំងអស់នោះ មិនជួយទប់ស្កាត់បទល្មើសព្រៃឈើ»។
ដែនជម្រកសត្វព្រៃភ្នំព្រេច ត្រូវបានបង្កើតឡើងកាលពីឆ្នាំ១៩៩៣ និងគ្របដណ្ដប់លើដីព្រៃទំហំជាង ២២ម៉ឺនហិកតា ស្ថិតនៅក្នុងស្រុកកោះញែក ក្នុងខេត្តមណ្ឌលគិរី និងស្រុកស្នួលរបស់ខេត្តក្រចេះ៕