មេនគរបាលកម្ពុជា បានព្យាករទុកថា សន្តិសុខ និងសណ្ដាប់ធ្នាប់សង្គមកម្ពុជា នឹងប្រឈមមុខនឹងការគំរាមកំហែងដែលលោកចោទថា បង្កឡើងដោយចលនាប្រឆាំង និងបញ្ហានៅក្នុងតំបន់។
ក្នុងពិធីរំឭកខួបនគរបាលជាតិនៅរាជធានីភ្នំពេញនាថ្ងៃព្រហស្បតិ៍នេះ អគ្គស្នងការនគរបាលជាតិ លោក នេត សាវឿន ថ្លែងថា បញ្ហាសន្តិសុខក្នុងតំបន់ និងពិភពលោក សម្ពាធនយោបាយពីបរទេស និងចលនាប៉ុនប៉ងផ្ដួលរំលំរដ្ឋាភិបាល កំពុងគំរាមកំហែងដល់សន្តិសុខកម្ពុជា ដែលលោកថា ទាមទារឲ្យកម្លាំងនគរបាលត្រៀមលក្ខណៈទប់ស្កាត់។
លោក នេត សាវឿន ថ្លែងថា៖ «ប្រឆាំងដាច់ខាតការធ្វើបដិវត្តពណ៌ប៉ុនប៉ងផ្តួលរំលំរាជរដ្ឋាភិបាលស្របច្បាប់។ ទប់ស្កាត់ការជ្រៀតជ្រែកផ្ទៃក្នុងជាតិ លើកស្ទួយសុខដុមនីយកម្ម ពង្រឹងសន្តិសុខផ្ទៃក្នុង រក្សាផ្ទៃក្នុងជាតិឱ្យបានរឹងមាំ ដោយមិនអនុញ្ញាតឱ្យកម្លាំងអមិត្តមួយណាឆ្លៀតប្រើទឹកដីកម្ពុជាធ្វើជាឈ្នាន់ ដើម្បីប្រឆាំងនឹងប្រទេសជិតខាងឡើយ»។
យ៉ាងនេះក្តី អតីតមេដឹកនំាបក្សប្រឆាំង លោក សម រង្ស៊ី បានសរសេរនៅលើហ្វេសប៊ុករបស់លោកកាលពីថ្ងៃទី១៤ ខែឧសភា ដោយស្នើឱ្យអង្គការសហប្រជាជាតិស៊ើបអង្កេតពីការសាងសង់មូលដ្ឋានសឹករបស់ប្រទេសចិននៅលើទឹកដីកម្ពុជា។
លោក សម រង្ស៊ី សរសេរថា៖ «ការសាងសង់មូលដ្ឋានសឹករបស់ប្រទេសក្រៅណាមួយលើទឹកដីប្រទេសកម្ពុជា គឺជាការរំលោភកិច្ចព្រមព្រៀងទីក្រុងប៉ារីសឆ្នាំ១៩៩១ ហើយជាការគំរាមដល់សន្តិភាព និងសន្តិសុខក្នុងតំបន់អាស៊ីភាគអាគ្នេយ៍ទាំងមូល»។
អ្នកវិភាគនយោយ លោក គឹម សុខ ផ្តល់ជាយោបល់ថា ប្រសិទ្ធភាពនៃការទប់ស្កាត់បញ្ហាសង្គម មិនមែនជ្រើសរើសយកការបង្ក្រាបទេ គឺត្រូវវិលទៅស្តារប្រជាធិបតេយ្យឡើងវិញ ហើយត្រូវបង្កើតឲ្យមានវប្បធម៌ផ្សះផ្សារជាតិដ៏ពិតប្រាកដមួយ។
លោក គឹម សុខ ប្រាប់ថា៖ «ប្រសិនបើលោក ហ៊ុន សែន នៅតែជម្នះមិនស្តាប់អនុសាសន៍របស់សហគមន៍អន្តរជាតិ និងមិនស្តាប់ឆន្ទៈរបស់ប្រជាពលរដ្ឋខ្មែរដែលចង់បានការវិលទៅរកប្រជាធិបតេយ្យ ខ្ញុំគិតថា លោក ហ៊ុន សែន នឹងក្លាយជាសត្រូវនៃកំហឹងរបស់ប្រជាពលរដ្ឋទូទាំងប្រទេស ហើយលទ្ធផលអាក្រក់នឹងដឹងនៅ ៣ឆ្នាំក្រោយពីកម្ពុជាបាត់បង់ EBA»។
ជម្លោះនយោបាយនេះ សហភាពអឺរ៉ុបបានដំណើរការព្យួរប្រព័ន្ធអនុគ្រោះពន្ធ EBA ក្រោយពីប្លុកលោកសេរីមួយនេះរកឃើញថា រដ្ឋាភិបាលបានបរាជ័យក្នុងការធ្វើឱ្យប្រសើរឡើងវិញនូវស្ថានភាពនៃការគោរពសិទ្ធិមនុស្ស និងលទ្ធិប្រជាធិបតេយ្យតាមលក្ខខណ្ឌរបស់ខ្លួន។
ការបាត់បង់ EBA នឹងធ្វើឱ្យកម្ពុជាខាតបង់ប្រាក់ប្រមាណជិត ៧០០លានដុល្លារក្នុង ១ឆ្នាំៗ ហើយកម្មករក្នុងវិស័យកាត់ដេរជាង ៧០ម៉ឺននាក់ ប្រឈមបាត់បង់ការងារ ពលរដ្ឋជាង ២លាននាក់ នឹងរងផលប៉ះពាល់ដោយប្រយោល។
ក្នុងដំណើរត្រួតពិនិត្យស្ថានភាពសិទ្ធិមនុស្សនៅកម្ពុជានៅដើមខែឧសភានេះ អ្នកជំនាញសិទ្ធិមនុស្សអង្គការសហប្រជាជាតិ លោកស្រី រ៉ូណា ស្មីត បានអំពាវនាវឱ្យបើកកិច្ចសន្ទនានយោបាយសម្រាប់ធានាដល់ការអភិវឌ្ឍប្រកបដោយចីរភាព និងសន្តិភាព៕
