មន្ត្រីជាន់ខ្ពស់អាល្លឺម៉ង់លើកឡើងថា ការគោរពសិទ្ធិមនុស្ស និងលទ្ធិប្រជាធិបតេយ្យទៅតាមច្បាប់អន្តរជាតិ មិនមែនជាកិច្ចការលំបាកសម្រេចបាននោះឡើយសម្រាប់កម្ពុជា ដើម្បីរក្សាបានជំនួយ និងភាពអនុគ្រោះខាងពាណិជ្ជកម្មរបស់អឺរ៉ុប។ នេះបើតាមសេចក្ដីប្រកាសព័ត៌មានមួយរបស់ស្ថានទូតអាល្លឺម៉ង់ប្រចាំនៅភ្នំពេញកាលពីថ្ងៃម្សិលមិញនេះ។
សេចក្ដីប្រកាសព័ត៌មាននោះ បានឲ្យដឹងថា អាល្លឺម៉ង់បានសម្រេចផ្ដល់កម្ចីទំហំជាង ៨០លានអឺរ៉ូ ឬជិត ៩០លានដុល្លារដល់កម្ពុជា សម្រាប់ការកសាងហេដ្ឋារចនាសម្ព័ន្ធនៅទីជនបទក្នុងប្រទេសកម្ពុជា។
ក្រៅពីកម្ចីនេះ អាល្លឺម៉ង់ក៏បានផ្ដល់ជំនួយទំហំ ៤៨.៦លានអឺរ៉ូ ឬជាង ៥៤លានដុល្លារ និងជំនួយ ១០លានអឺរ៉ូ ឬស្មើជាង ១១លានដុល្លារផ្សេងទៀត សម្រាប់គម្រោងលុបបំបាត់ភាពក្រីក្រផងដែរ។
ស្ថានទូតអាល្លឺម៉ង់ប្រចាំកម្ពុជាឲ្យដឹងថា កម្ពុជា និងអាល្លឺម៉ង់បានឈានដល់កិច្ចព្រមព្រៀងនេះនៅទីក្រុងប៊ែរឡាំង កាលពីថ្ងៃទី១៤ ដល់ថ្ងៃទី១៦ ខែឧសភានេះ នៅក្នុងជំនួបរវាងសមាជិកសហព័ន្ធអាល្លឺម៉ង់ និងជារដ្ឋលេខាធិការក្រសួងសហប្រតិបត្តិការ និងអភិវឌ្ឍសេដ្ឋកិច្ច លោក Nobert BARTHLE និងប្រតិភូជាន់ខ្ពស់កម្ពុជា លោក ឈៀង យ៉ាណារ៉ា អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា។
បើតាមសេចក្ដីប្រកាសព័ត៌មានដដែលនេះ លោក Nobert BARTHLE បានជំរុញឲ្យរដ្ឋាភិបាលរបស់លោក ហ៊ុន សែន ងាកទៅគោរពសិទ្ធិមនុស្ស និងស្ដារលទ្ធិប្រជាធិបតេយ្យឡើងវិញ ដែលជាមូលដ្ឋានគ្រឹះនៃកិច្ចសហប្រតិបត្ដិការរវាងប្រទេសទាំងពីរ។
លោក Nobert BARTHLE ក៏ជំរុញឲ្យរដ្ឋាភិបាលកម្ពុជាបើកលំហសិទ្ធិនយោបាយ និងសង្គមស៊ីវិល ដើម្បីបន្ដទទួលបានប្រព័ន្ធអនុគ្រោះពន្ធ EBA របស់អឺរ៉ុប។ លោកថា បញ្ហាសិទ្ធិមនុស្ស ដែលគេជំរុញនេះ គឺមិនពិបាកក្នុងការអនុវត្តនោះទេ។
ក្នុងសេចក្ដីប្រកាសព័ត៌មាន លោក Nobert BARTHLE បន្ដថា៖ «ប្រសិនបើលំហនយោបាយ និងសង្គមពិតជាត្រូវបានបើកចំហ កម្ពុជានឹងអាចគេចផុតពីការបាត់បង់នូវក្របខណ្ឌគាំពារពិសេសផ្នែកពាណិជ្ជកម្ម។ ច្បាប់ជាតិ និងការអនុវត្តជាក់ស្ដែងត្រូវស្របតាមកាតព្វកិច្ចសិទ្ធិមនុស្សអន្ដរជាតិ ដូចជា សេរីភាពនៃការបញ្ចេញមតិ និងសេរីភាពខាងការជួបជុំ និងប្រមូលផ្ដុំ។ ខ្ញុំជឿជាក់ថា វាមិនពិបាកនឹងសម្រេចទេ»។
VOD បានទាក់ទងអ្នកនាំពាក្យទីស្តីការគណៈរដ្ឋមន្ត្រី លោក ទិត សុធា និងអ្នកនាំពាក្យគណបក្សប្រជាជនកម្ពុជា លោក សុខ ឥសាន ប៉ុន្ដែ ពួកលោកសុំមិនធ្វើអត្ថាធិប្បាយ ដោយសារមិនបានដឹងរឿងនេះ។
ប្រធានផ្នែកស៊ើបអង្កេតរបស់អង្គការលីកាដូ លោក អំ សំអាត យល់ថា មកទល់ពេលនេះ រដ្ឋាភិបាលហាក់មិនមានឆន្ទៈពិតប្រាកដក្នុងការស្ដារលទ្ធិប្រជាធិបតេយ្យ និងគោរពសិទ្ធិមនុស្ស ដែលជាក្ដីកង្វល់របស់សហភាពអឺរ៉ុប និងក្រុមប្រទេសលោកសេរីនោះទេ។
អ្នកតាមដានរូបនេះជំរុញឲ្យរដ្ឋាភិបាលកែលម្អបញ្ហាសិទ្ធិមនុស្សរបស់ខ្លួន ដោយលោកថា លក្ខខណ្ឌទាំងនោះ មិនមែនជាការជ្រៀតជ្រែកកិច្ចការផ្ទៃក្នុង ឬអធិបតេយ្យភាពរបស់កម្ពុជានោះទេ។
លោក អំ សំអាត ប្រាប់ថា៖ «អ្វីដែលសំខាន់ គឺទង្វើ និងឆន្ទៈនៃការកែលម្អ។ នោះបានវាបង្ហាញអំពីឆន្ទៈពិតប្រាកដ។ ប្រសិនបើមិនទាន់មានទេ អាហ្នឹងហើយដែលសហគមន៍អឺរ៉ុប ឬប្រទេសអាល្លឺម៉ង់លោកមើលឃើញនៅមិនទាន់មានការកែលម្អត្រឹមត្រូវ បានជាគេជំរុញឲ្យមានការកែលម្អ»។
កាលពីថ្ងៃទី១១ ខែកុម្ភៈ ឆ្នាំនេះ សហភាពអឺរ៉ុបបានប្រកាសអំពីការចាប់ផ្ដើមដំណើរការដែលឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ពីកម្ពុជា បន្ទាប់ពីមើលឃើញការធ្លាក់ចុះនៃលទ្ធិប្រជាធិបតេយ្យ បញ្ហាសិទ្ធិមនុស្ស និងនីតិរដ្ឋ នៅក្នុងរយៈពេល ១៨ខែចុងក្រោយមកនេះ។
សហភាពអឺរ៉ុបគូសបញ្ជាក់ថា ខ្លួនបានជួបពិភាក្សាដោយស្មោះត្រង់ជាមួយភាគីកម្ពុជា និងរំពឹងថា រដ្ឋាភិបាលនឹងកែលម្អបញ្ហាទាំងអស់ដែលជាក្ដីកង្វល់ និងជម្រុញឲ្យរដ្ឋាភិបាលកម្ពុជា ចាត់វិធានការចាំបាច់នានាជាបន្ទាន់ ដើម្បីរក្សាប្រព័ន្ធអនុគ្រោះពន្ធ EBA របស់អឺរ៉ុបនេះ។
ក្នុងដំណើរទស្សនកិច្ចលើកទី៧ មកកាន់ប្រទេសកម្ពុជានៅដើមខែឧសភានេះ អ្នកជំនាញសិទ្ធិមនុស្សអង្គការសហប្រជាជាតិ លោកស្រី រ៉ូណា ស្មីត ក៏បានលើកឡើងអំពីបញ្ហានេះផងដែរ ដោយអ្នកស្រីថា រដ្ឋាភិបាលរបស់លោក ហ៊ុន សែន គឺជាអ្នកសម្រេចចិត្តជុំវិញការកែលម្អបញ្ហាសិទ្ធិមនុស្ស និងលទ្ធិប្រជាធិបតេយ្យ ជាថ្នូរនឹងការបន្ដទទួលបានប្រព័ន្ធអនុគ្រោះពន្ធ EBA របស់អឺរ៉ុបនេះ៕
(ថ្ងៃទី២១ ខែឧសភា ឆ្នាំ២០១៩ | ម៉ោង២និង១១នាទីរសៀល) កែតម្រូវ៖ VOD សូមធ្វើការកែតម្រូវនូវកថាខណ្ឌទី២នៃអត្ថបទខាងលើ ត្រង់ឃ្លាដែលសរសេរថា […] អាល្លឺម៉ង់បានសម្រេចផ្ដល់កម្ចីទំហំជាង ៨០លានអឺរ៉ូ […] ទៅជា […] ទីភ្នាក់ងារបារាំងសម្រាប់ការអភិវឌ្ឍ និងសហភាពអឺរ៉ុបបានសម្រេចផ្ដល់កម្ចីទំហំជាង ៨០លានអឺរ៉ូ […]។ ចំណុចមួយទៀត ត្រង់ឃ្លានៃកថាខណ្ឌទី៣ ដែលសរសេរថា៖ «ក្រៅពីកម្ចីនេះ អាល្លឺម៉ង់ក៏បានផ្ដល់ជំនួយទំហំ ៤៨.៦លានអឺរ៉ូ ឬជាង ៥៤លានដុល្លារ និងជំនួយ ១០លានអឺរ៉ូ ឬស្មើជាង ១១លានដុល្លារផ្សេងទៀត សម្រាប់គម្រោងលុបបំបាត់ភាពក្រីក្រផងដែរ» សូមកែតម្រូវមកដូច្នេះវិញ «កិច្ចប្រឹងប្រែងហិរញ្ញវត្ថុថ្មីរបស់អាល្លឺម៉ង់មានទំហំសរុបចំនួន៤៨.៦លានអឺរ៉ូសម្រាប់ឆ្នាំ២០១៩ និងឆ្នាំ២០២០។ អាល្លឺម៉ង់ នឹងផ្តល់ជំនួយហិរញ្ញវត្ថុ១០លានអឺរ៉ូផ្សេងទៀតសម្រាប់គម្រោងអាហាររូបត្ថម្ភកម្ពុជា ដែលជាគម្រោងរួមគ្នារវាងធនាគារពិភពលោក ស្ថាប័នហិរញ្ញវត្ថុអន្តរជាតិ ប្រទេសអូស្រ្តាលី និងប្រទេសអាល្លឺម៉ង់»។