សហរដ្ឋអាមេរិកបានស្នើឲ្យរដ្ឋាភិបាលរបស់លោកនាយករដ្ឋមន្ដ្រី ហ៊ុន សែន បញ្ឈប់ការគំរាមកំហែងលើអតីតមន្ដ្រីជាប់ឆ្នោតរបស់គណបក្សសង្គ្រោះជាតិ និងដោះលែងអតីតមេដឹកនាំបក្សប្រឆាំងកំពុងជាប់ឃុំ។
ក្នុងសេចក្ដីថ្លែងការណ៍កាលពីថ្ងៃទី១៧ ខែឧសភា ដែល VOD ទើបតែទទួលបាននៅថ្ងៃនេះ ការិយាល័យអ្នកនាំពាក្យនៃក្រសួងការបរទេសអាមេរិកបានសំដែងនូវក្ដីកង្វល់ពាក់ព័ន្ធនឹងចំណាត់ការរបស់តុលាការកម្ពុជា ដែលបានចេញកោះហៅ និងសាកសួរអតីតមន្ដ្រីគណបក្សសង្គ្រោះជាតិនៅថ្នាក់មូលដ្ឋានចំនួន ៦៥រូប ដោយពួកគេរងការចោទប្រកាន់ថា បានធ្វើសកម្មភាពបំពានទៅលើសាលដីកាតុលាការកំពូល។
តាមរយៈសេចក្ដីថ្លែងការណ៍ សហរដ្ឋអាមេរិកអំពាវនាវឲ្យបញ្ឈប់ការគំរាមកំហែងផ្នែកនយោបាយនេះ និងទាមទារជាថ្មីឲ្យដោះលែងអតីតប្រធានគណបក្សសង្គ្រោះជាតិ លោក កឹម សុខា ផងដែរ។
ក្រៅពីនេះ សហរដ្ឋអាមេរិកក៏ទាមទារឲ្យរដ្ឋាភិបាលបើកការស៊ើបអង្កេតឯករាជ្យ និងឥតលម្អៀងជុំវិញការស្លាប់របស់អតីតសមាជិកមន្ដ្រីគណបក្សសង្គ្រោះជាតិ លោក ទិត្យ រ៉ន នៅក្នុងពន្ធនាគារខេត្តកំពង់ចាម កាលពីថ្ងៃទី១៨ខែមេសា ជុំវិញភាពមិនច្បាស់លាស់នៃករណីឃាតកម្មមួយនេះ។
ក្នុងសេចក្ដីថ្លែងការណ៍ដដែល សហរដ្ឋអាមេរិកក៏រំលឹកឲ្យរដ្ឋាភិបាលរបស់លោក ហ៊ុន សែន អនុវត្តច្បាប់ និងសកម្មភាពរបស់ខ្លួន ឲ្យបានត្រឹមត្រូវស្របតាមកាតព្វកិច្ចសិទ្ធិមនុស្សនៅក្រោមច្បាប់អន្តរជាតិ។
សេចក្ដីថ្លែងការណ៍នោះបន្ដថា៖ «យើងមានកង្វល់ផងដែរទៅលើដំណើរការក្ដីរបស់តុលាការនាពេលថ្មីៗនេះ បង្កើតឡើងប្រឆាំងនឹងសមាជិករបស់គណបក្សសង្គ្រោះជាតិជាង៦៥នាក់។ យើងសូមអំពាវនាវដល់រដ្ឋាភិបាលកម្ពុជា ឲ្យលុបបំបាត់នូវការរឹតត្បិតលើមនុស្សទាំងអស់ក្នុងប្រទេសកម្ពុជា និងឲ្យដោះលែងអ្នកទោសទាំងឡាយណា ដែលត្រូវបានឃុំខ្លួនតាមអំពើចិត្ត និងខុសច្បាប់ រួមទាំងលោក កឹម សុខាផងដែរ»។
ក្នុងសន្និសីទបិទបញ្ចប់ដំណើរបេសកកម្មមកកាន់ប្រទេសកម្ពុជា កាលពីថ្ងៃទី៩ ខែឧសភាកន្លងទៅ អ្នករាយការណ៍ពិសេសអង្គការសហប្រជាជាតិ អ្នកស្រី រ៉ូណា ស្មីត បានជំរុញឲ្យរដ្ឋាភិបាលបើកចំហរសិទ្ធិសេរីភាពសង្គមស៊ីវិល និងសិទ្ធិនយោបាយបន្ថែមទៀត ដើម្បីស្របតាមគោលការណ៍អភិវឌ្ឍប្រកបដោយចីរភាព និងលទ្ធិប្រជាធិបតេយ្យនៅកម្ពុជា៕
