មន្ត្រីពាក់ព័ន្ធតាមផ្នែកបានហាត់សាកល្បងដើម្បីត្រៀមលក្ខណៈសម្រាប់ពិធីច្រត់ព្រះនង្គ័លដែលប្រព្រឹត្តទៅនៅថ្ងៃទី២២ ខែឧសភា នៅក្នុងខេត្តតាកែវ។
នៅក្នុងគេហទំព័រក្រសួងព័ត៌មាន បានបង្ហាញរូបភាព រោងពិធីធំៗជាច្រើនរៀបចំរួចរាល់ ហើយមានទាំងចងបដាផ្សេងៗ មានទង់ជាតិ ទង់និមិត្តសញ្ញាព្រះបរមរាជវាំង ជាដើម។
ក្រសួងក៏បានបញ្ជាក់ថា នៅព្រឹកថ្ងៃទី២០ ខែឧសភា មន្ត្រីតាមផ្នែកបានរៀបចំសាកល្បងភ្ជួររាស់ជាលើកទី២។
តាមគណៈកម្មាធិការជាតិរៀបចំបុណ្យជាតិ-អន្តរជាតិ នឹងរៀបចំព្រះរាជពិធីច្រត់ព្រះនង្គ័លនៅទីព្រះស្រែ (កីឡដ្ឋានគិរីវង់សុខសែនជ័យ) នៅក្នុងភូមិត្រពាំងអង្គ សង្កាត់រកាក្រៅ ក្រុងដូនកែវ ខេត្តតាកែវ។ ពិធីនេះប្រារព្ធក្រោមព្រះរាជាធិបតីភាព ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។