ស្នងការនគរបាលរាជធានីភ្នំពេញ បានប្រកាសច្រានចោលព័ត៌មានដែលថា ស្ថាប័ននេះមានបំណងបង្កើតក្រុមកុម្ម៉ង់ដូថ្មី ដោយថា វាជាព័ត៌មានដែលមិនគ្រប់ជ្រុងជ្រោយ។ ។
ទំព័រហ្វេសបុករបស់ស្នងការដ្ឋាននគរបាលរាជធានីភ្នំពេញ កាលពីម្សិលមិញ បានបកស្រាយថាស្នងការរាជធានីភ្នំពេញ លោក ស ថេត មិនមានបំណងក្នុងការបង្កើតក្រុមកុម្ម៉ង់ដូថ្មីឡើយ តែមានបំណងកែសម្រួល និងបំប៉នក្រុមអន្តរាគមន៍ដែលមានស្រាប់ឲ្យទៅជាក្រុមអន្តរាគមន៍ពិសេសដែលនឹងត្រូវទទួលវគ្គបំពាក់បំប៉នជំនាញបន្ថែមទាំងក្នុង និងក្រៅប្រទេស។
ប្រភពដដែល ឲ្យដឹងថា ក្នុងជំនួបមួយជាមួយប្រតិភូពីប្រទេសវៀតណាមនៅថ្ងៃទី២១ ខែឧសភា លោក ស ថេត បានស្នើដល់ប្រទេសវៀតណាម ឲ្យជួយបង្កើតវគ្គបណ្ដុះបណ្ដាលកងអន្តរាគមន៍ពិសេសមួយនេះ ដោយលោកលើកឡើងថា ចាប់ពីពេលនេះទៅ កម្ពុជានឹងមានកិច្ចប្រជុំធំៗជាច្រើនដែលត្រូវការកងអន្តរាគមន៍ពិសេសជួយការពារសន្តិសុខ និងសណ្ដាប់ធ្នាប់ក្នុងរាជធានីភ្នំពេញឲ្យបានល្អប្រសើរ។
បើតាមលោក ស ថេត លោកមានបំណងចង់បន្ថែមកងអន្តរាគមន៍បន្ថែមចំនួន៦០នាក់ ដែលកងអន្តរាគមន៍ពិសេសត្រូវចេះពីរបៀបបាញ់កាំភ្លើងវែង ខ្លី និងរបៀបការពារថ្នាក់ដឹកនាំផងដែរ៕
