ក្រុមហ៊ុនបច្ចេកវិទ្យាលំដាប់ពិភពលោក Panasonic របស់ជប៉ុន នៅថ្ងៃព្រហស្បតិ៍នេះ បានសម្រេចផ្អាកការធ្វើពាណិជ្ជកម្មជាមួយក្រុមហ៊ុនចិន Huawei និងបណ្តុំក្រុមហ៊ុនចំនួន៦៨ ជាសម្ព័ន្ធរបស់ក្រុមហ៊ុនចិនមួយនេះទៀត តាមបំរាមរបស់សហរដ្ឋអាមេរិក។ នេះបើតាមការចុះផ្សាយរបស់ CNA។
ក្រុមហ៊ុនជប៉ុនប្រកាសជំហររបស់ខ្លួននៅថ្ងៃនេះ គឺក្រោយមួយថ្ងៃដែលក្រុមហ៊ុនទូរសព្ទធំៗ ចំនួន៤ របស់អង់គ្លេស និងជប៉ុន បានសម្រេចពន្យារពេលដាក់ឱ្យប្រើប្រាស់កម្មវិធីអ៊ីនធឺណិត ជំនាន់ទី៥ របស់ក្រុមហ៊ុន Huawei។
អ្នកនាំពាក្យឱ្យក្រុមហ៊ុន Panasonic លោក Joe Flynn ថ្លែងថា ក្រុមហ៊ុនលោកសម្រេចផ្អាករាល់ប្រតិបត្តិការជាមួយក្រុមហ៊ុនចិន Huawei គ្រប់ផ្នែកទាំងអស់។ លោកថា ក្រុមហ៊ុនលោកបានផ្សព្វផ្សាយជាលក្ខណៈផ្ទៃក្នុងដល់បុគ្គលិកទាំងអស់កាលពីម្សិលមិញ។
លោក Joe Flynn ថ្លែងថា ក្រុមហ៊ុនលោកមានទំនាក់ទំនងជាមួយក្រុមហ៊ុន Huawei លើផ្នែកផ្គត់ផ្គង់សម្ភារអេឡិចត្រូនិចខ្លះ ប៉ុន្តែ លោកមិនបញ្ជាក់លម្អិតទេ។
តាមក្រុមហ៊ុនជប៉ុន បញ្ជាក់ថា ពេលនេះ រដ្ឋអំណាចវ៉ាស៊ីនតោនកំពុងតែរឹតបន្តឹងផលិតផលប្រើប្រាស់នៅសហរដ្ឋអាមេរិក ចំណែកក្រុមហ៊ុន Panasonic ក៏ជាអ្នកផ្គត់ផ្គង់ឧបករណ៍មួយចំនួនដល់ក្រុមហ៊ុន Huawei ដូច្នេះ ក្រុមហ៊ុនជប៉ុននេះក៏អាចប្រឈមមុខជាមួយអាមេរិកដែរ។
វិធានការបន្តបន្ទាប់ដាក់សម្ពាធលើក្រុមហ៊ុន Huawei គឺកើតឡើងក្រោយពេលដែលប្រធានាធិបតីអាមេរិក លោក ដូណាល់ ត្រាំ កាលពីសប្តាហ៍មុនបានប្រកាសដាក់សន្តិសុខជាតិក្នុងស្ថានភាពអាសន្ន ហើយរារាំងក្រុមហ៊ុនទូរគមនាគមន៍ក្នុងស្រុកផ្អាកការទំនាក់ទំនងពាណិជ្ជកម្មជាមួយក្រុមហ៊ុនបរទេស។
បើទោះជាវិធានការអាមេរិកហាក់សំដៅលើក្រុមហ៊ុនចិន Huawei ក៏ដោយ ប៉ុន្តែ សេតវិមានបញ្ជាក់ថា វិធានការរបស់លោក ដូណាល់ ត្រាំ នេះ ដើម្បីសុវត្ថិភាពរបស់ជាតិមិនសំដៅលើប្រទេស ឬក្រុមហ៊ុនណាមួយទេ។
ទោះយ៉ាងណា សេចក្តីសម្រេចអាមេរិកនេះហាក់ដូចជាយុទ្ធនាការមួយដែលប្រឆាំងក្រុមហ៊ុនចិន Huawei ដែលចាប់ផ្តើមដោយក្រុមអ៊ិនធឺណិតធំលំដាប់ពិភពលោករបស់អាមេរិក Google ដែលប្រតិបត្តិការលើប្រព័ន្ធទូរសព្ទទំនើបលើពិភពលោក។
សហរដ្ឋអាមេរិកបានដាក់ការសង្ស័យយូរណាស់មកហើយថា ក្រុមហ៊ុន Huawei ធ្វើការទំនាក់ទំនងជាមួយកងទ័ពចិនក្នុងការលួចយកព័ត៌មាន។
បញ្ហាស្រដៀងគ្នាជាមួយអាមេរិកនេះ ក៏មានការលើកឡើងយ៉ាងចម្រូងចម្រាស់ផងដែរនៅប្រទេសអង់គ្លេស ដែលមានការលេចធ្លាយព័ត៌មានថា ក្រុមប្រឹក្សាសន្តិសុខជាតិបានស្នើទៅរដ្ឋាភិបាលកាលពីខែមុនឱ្យរឹតបន្តឹងការប្រើប្រាស់អ៊ិនធឺណិតជំនាន់ទី៥របស់ក្រុមហ៊ុន Huawei។
ទោះយ៉ាងណា កាលពីថ្ងៃពុធម្សិលមិញ ក្រុមហ៊ុន Huawei បានថ្លែងថា ការដាក់សម្ពាធនេះគឺជារឿងគួរឱ្យសោកស្តាយ ហើយថា បញ្ហាទាំងនេះជារឿងនយោបាយ ហើយពិតជាអាចដោះស្រាយបាន។