អាជ្ញាធរខេត្តព្រះសីហនុ អះអាងថា ម្ចាស់កាស៊ីណូជាជនជាតិចិន ដែលបើកអាជីវកម្មលើកោះរ៉ុងសន្លឹម អាចនឹងត្រូវចាប់ខ្លួន បើនៅតែបំពានច្បាប់កម្ពុជា។
អ្នកនាំពាក្យសាលាខេត្តព្រះសីហនុ លោក ឃាង ភារម្យ ឱ្យ VOD ដឹងនៅថ្ងៃព្រហស្បតិ៍នេះ ថា ក្រុមការងារនឹងប្រើវិធានការលើកទី៣ ដើម្បីជំរុញឲ្យប្រធានគ្រប់គ្រងមជ្ឈមណ្ឌលកម្សាន្ត ជីន ទីង គោរពច្បាប់កម្ពុជា តាមរយៈការប្តឹងទៅតុលាការ ។ លោកព្រមានថា វិធានការចាប់ខ្លួននឹងត្រូវធ្វើឡើង បើបុគ្គលពាក់ព័ន្ធនៅតែបំពានលើការសម្រេចរបស់តុលាការ ។
អ្នកនាំពាក្យរូបនេះ បញ្ជាក់ថា មជ្ឈមណ្ឌលកម្សាន្តចិនមួយនេះ បានធ្វើអាជីវកម្មបំពានច្បាប់កម្ពុជា ដល់ទៅ ៣ករណី។ លោក បន្តថា ករណីទាំងបីនោះរួមមាន សាងសង់សំណង់គ្មានច្បាប់អនុញ្ញាត បើកអាជីវកម្មឱ្យលេងល្បែងហួសសុពលភាព និងបង្ហូរទឹកកខ្វក់ចូលសមុទ្រ។
លោកថា៖ «សំណង់ហ្នឹង នៅពេលដែលចាប់ផ្តើមធ្វើ អាជ្ញាធរយើងគ្រប់ជាន់ថ្នាក់បានទៅហាមឃាត់ជាបន្តបន្ទាប់។ ប៉ុន្តែ គាត់នៅតែលួចធ្វើ។ អានេះហើយដែលធ្វើឱ្យយើងមើលឃើញថា គាត់មានចេតនាមួយ មិនគោរពច្បាប់ [កម្ពុជា] តាំងពីដើមទី»។
បើតាមអ្នកនាំពាក្យរូបនេះ អាជ្ញាធរខេត្តបានជូនដំណឹងពីរដងរួចមកហើយ ចាប់ពីខែមីនាមក ដោយតម្រូវឱ្យមជ្ឈមណ្ឌលកម្សាន្ត ជីន ទីង នេះ ឈប់ធ្វើអាជីវកម្ម និងត្រូវរុះរើសំណង់របស់ខ្លួនចេញវិញ តែក្រុមហ៊ុននេះមិនព្រមអនុវត្តតាមការណែនាំរបស់អាជ្ញាធរដែនដីទេ។
ប៉ុន្តែ នៅពេលសួរថា តើហេតុអ្វីបានអាជ្ញាធរមិនអាចទប់ស្កាត់ការសាងសង់នេះបាន បើអាជ្ញាធរខេត្តដឹងថា ក្រុមហ៊ុនចិនមួយនេះគ្មានច្បាប់អនុញ្ញាតឱ្យសាងសង់ លោក ឃាង ភារម្យ ពន្យល់ថា អាចមកពីការខ្វះចន្លោះរបស់អាជ្ញាធរមូលដ្ឋាន និងខ្វះមធ្យោបាយធ្វើដំណើរសម្រាប់ឃ្លាំមើលលើវិធានការទប់ស្កាត់ ដោយថា ពីទីរួមខេត្តទៅកោះរ៉ុងត្រូវធ្វើដំណើរតាមផ្លូវទឹកក្នុងចម្ងាយផ្លូវជាង ២០គីឡូម៉ែត្រ ។
ក្រុមហ៊ុនកាស៊ីណូរបស់ចិនមួយនេះបើកអាជីវកម្មរបស់ខ្លួនក្រោមរូបភាពដាក់ឈ្មោះជាមជ្ឈមណ្ឌលកម្សាន្ត ជីន ទីង ស្ថិតនៅលើកោះរ៉ុងសន្លឹម។ បើតាមអ្នកនាំពាក្យ ក្រុមហ៊ុននេះបើកអាជីវកម្មចាប់ពីចុងឆ្នាំ២០១៨មក។
VOD មិនទាន់អាចរកប្រភពដើម្បីទាក់ទងសុំការបំភ្លឺពីក្រុមចិនដែលរងការចោទប្រកាន់នេះបាននៅឡើយទេ គិតត្រឹមរសៀលថ្ងៃព្រហស្បតិ៍នេះ។
ក្រុមយុវជនមាតាធម្មជាតិដែលតាមដានករណីនេះ បានចងក្រងជាវីដេអូបង្ហោះលើបណ្តាញសង្គម ដោយបង្ហាញពីសកម្មភាពរបស់ក្រុមហ៊ុននេះថា បានបង្ហូរទឹកកខ្វក់ចូលសមុទ្រ និងរូបភាពមនុស្សនាំគ្នាលែងល្បែងក្នុងមជ្ឈមណ្ឌលកម្សាន្តយីហោ ជីន ទីង នេះ ។
តាមវីដេអូឃ្លីបក្រុមយុវជនបរិស្ថាន អះអាងថា ខ្លួនគ្មានជឿថា អាជ្ញាធរកម្ពុជា នឹងចាប់ខ្លួនថៅកែក្រុមហ៊ុនចិនមួយនេះ ទៅកាត់ទោសតាមច្បាប់កម្ពុជានោះទេ។
យុវជនរូបនោះ ថា៖ «មិនត្រឹមតែល្មើសទៅនឹងបទបញ្ជារដ្ឋបាលខេត្តព្រះសីហនុប៉ុណ្ណោះទេមជ្ឈមណ្ឌលកម្សាន្ត និងកាស៊ីណូ ជីន ទីង ទំនងជាត្រូវបានគេរៀបចំឱ្យរួចផុតពីទោសទាក់ទិននឹងការសាងសង់រំលោភដីសាធារណៈរបស់រដ្ឋ ដែលជាបទល្មើសព្រហ្មទណ្ឌ ដែលអ្នកប្រព្រឹត្តអាចនឹងត្រូវផ្តន្ទាទោសពី១ឆ្នាំ ទៅ៥ឆ្នាំ នេះបើយោងតាមច្បាប់ភូមិបាលមាត្រា ២៥៩»។
មន្ត្រីសម្របសម្រួលសមាគមអាដហុកប្រចាំខេត្តព្រះសីហនុ លោកស្រី ជាប សុធារី មានប្រសាសន៍ថា ភាពចម្រូងចម្រាសរវាងអាជ្ញាធរកម្ពុជាជាមួយអ្នកវិនិយោគចិនទាក់ទិននឹងការបំពានច្បាប់កម្ពុជានេះ លោកស្រីថា មិនមែនជារឿងថ្មីទេសម្រាប់ខេត្តជាប់សមុទ្រមួយនេះ។ មន្ត្រីឃ្លាំមើលសិទ្ធិមនុស្សរូបនេះ ជំរុញទៅរដ្ឋាភិបាលឱ្យពង្រឹងប្រសិទ្ធភាពនៃការអនុវត្តច្បាប់ ដើម្បីជាសារព្រមានកុំឱ្យក្រុមហ៊ុនខិលខូចផ្សេងទៀតយកគម្រូតាម។
យ៉ាងនេះក្តី អ្នកនាំពាក្យសាលាខេត្ត លោក ឃាង ភារម្យ អះអាងថា អាជ្ញាធរខេត្តដែលជាសេនាធិការនឹងឱ្យរដ្ឋាភិបាលចាត់ធានការករណីនេះ ឱ្យមានប្រសិទ្ធភាព ដោយថា កម្ពុជាលើកទឹកចិត្តអ្នកវិនិយោគ ប៉ុន្តែ មិនអនុញ្ញាតឱ្យអ្នកវិនិយោគបំពានច្បាប់កម្ពុជាទេ៕
