មន្ត្រីជាន់ខ្ពស់កម្ពុជា អះអាងថា នៅតែបន្តការអភិវឌ្ឍរួមគ្នាជាមួយក្រុមហ៊ុនទូរសព្ទរបស់ចិន Huawei ទៅលើអ៊ីនធឺណិតជំនាន់ទី៥ ឬ5G ដោយមិនបារម្ភពីការលួចព័ត៌មានសម្ងាត់របស់ជាតិនោះទេ ព្រោះថា កម្ពុជាមានប្រព័ន្ធត្រួតពិនិត្យសុវត្ថិភាពដែលអាចទុកចិត្តបាន។
ក្រុមហ៊ុនទូរស័ព្ទធំៗ ចំនួន៤របស់អង់គ្លេស និងជប៉ុន កាលពីថ្ងៃទី២២ ខែឧសភា បានសម្រេចពន្យារពេលដាក់ឱ្យប្រើប្រាស់កម្មវិធីអ៊ីនធឺណិតជំនាន់ទី៥ ឬ5G របស់ក្រុមហ៊ុន Huawei ក្រោយពីសហរដ្ឋអាមេរិក បានប្រកាសថា Huawei បានយកការសម្ងាត់របស់អាមេរិក និងបានដាក់ក្រុមហ៊ុននេះចូលក្នុងបញ្ជីខ្មៅនៃការធ្វើពាណិជ្ជកម្ម។
ក្រុមហ៊ុនអ៊ីនធឺណិតលំដាប់ពិភពលោករបស់អាមេរិក Google និងក្រុមហ៊ុនបច្ចេកវិទ្យារបស់ជប៉ុនPanasonic បានផ្អាកការធ្វើពាណិជ្ចកម្មជាមួយ Huawei បន្តបន្ទាប់។
អ្នកនាំពាក្យនិយតករទូរគមនាគមន៍កម្ពុជា លោក អ៊ឹម វត្ថា មានប្រសាសន៍ថា រហូតមកដល់ពេលនេះ រាល់ទំនាក់ទំនងរវាងកម្ពុជា និងក្រុមហ៊ុន Hauwei គឺនៅតែរក្សាដដែល ដោយគ្មានការបារម្ភនោះទេ ខណៈការអភិវឌ្ឍរួមគ្នាលើប្រព័ន្ធអ៊ីនធឺណិតជំនាន់ទី៥ រវាងកម្ពុជា និងក្រុមហ៊ុននេះគឺនៅតែបន្តទៅមុខ។
លោកថា៖ «ជាអនុស្សរណៈយោគយល់គ្នាដើម្បីធ្វើឲ្យមានប្រព័ន្ធ 5G នេះ ហើយមកទាល់តែឥឡូវគ្មានការប្រែប្រួលនោះទេ គឺនៅដដែល គឺគ្មានអីប្រែប្រួលនោះទេ »។
ទោះជាយ៉ាងណា លោកមិនបានបញ្ជាក់ថា ការអភិវឌ្ឍរួមគ្នានេះឈានដល់កម្រិតណានៅឡើយទេ។
ក្នុងដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅប្រទេសចិន កាលពីចុងខែមេសា កន្លងទៅ ប្រទេសកម្ពុជាបានចុះហត្ថលេខាលើអនុស្សរណៈមួយចំនួននៅក្នុងនោះក៏មានការអភិវឌ្ឍរួមគ្នារវាងកម្ពុជា និង Huawei ទៅលើប្រព័ន្ធអ៊ីនធឺណិតជំនាន់ទី៥នេះ ដោយកម្ពុជាជាប្រទេសទី១ នៅតំបន់អាស៊ានដែលបានចុះហត្ថលេខានេះ។
អនុប្រធានបណ្ដាញយុវជនកម្ពុជា លោក ស ម៉ូរី មានប្រសាសន៍ថា ប្រសិនជាបច្ចេកវិទ្យារបស់ Huawei ពិតជាបង្កហានិភ័យដល់សន្ដិសុខជាតិមែននោះ វាជាហានិភ័យមួយដល់កម្ពុជា ប្រសិនជាប្រទេសនេះនៅទទួលយកបច្ចេកវិទ្យារបស់ក្រុមហ៊ុននេះមកអភិវឌ្ឍនៅប្រទេសខ្លួន។
លោកថា៖ «នៅពេលដែលព័ត៌មានសន្តិសុខ និងសម្ងាត់របស់ជាតិត្រូវបានគេយកបាន បានន័យថា ប្រទេសនោះស្ថិតក្នុងហានិភ័យដែលធ្វើឲ្យគេដឹងអំពីចំណុចខ្លាំងចំណុចខ្សោយរបស់យើង។ ហើយការសម្រេចរបស់ជាតិសំខាន់ៗគឺត្រូវបានគេតាមដាន អ៊ីចឹង បើសិនជារដ្ឋាភិបាលណាមួយដែលគេមានបំណងមិនល្អនៅពេលដែលគេដឹងព័ត៌មានសំងាត់ពីយើង គេអាចតាមដាន និងអាចយកព័ត៌មានទាំងអស់ហ្នឹងទៅធ្វើសកម្មភាពដែលជះឥទ្ធិពលដល់ដំណើរការ ឬការគ្រប់គ្រងសន្តិសុខជាតិ »។
បើតាមលោក ម៉ូរី រដ្ឋាភិបាលគួរមានកិច្ចព្រមព្រៀងជាក់លាក់មួយជាមួយក្រុមហ៊ុន ហើយបើសិនជាអាច គឺត្រូវធ្វើជាមួយរដ្ឋាភិបាលចិនតែម្ដង ដើម្បីធានាថា ព័ត៌មានឯកជនរបស់ពលរដ្ឋកម្ពុជា និងការសម្ងាត់របស់ជាតិមិនត្រូវបានបែកធ្លាយទៅកាន់ប្រទេសនេះ។
កាលពីសប្ដាហ៍មុន សហរដ្ឋអាមេរិកបានដាក់ក្រុមហ៊ុន Huawei ចូលក្នុងបញ្ជីខ្មៅដែលហាមឃាត់មិនឲ្យធ្វើពាណិជ្ជកម្មជាមួយ។ សហរដ្ឋអាមេរិកលើកឡើងថា បច្ចេកវិទ្យារបស់ Huawei លួចព័ត៌មានឱ្យយោធាចិន កំពុងធ្វើឲ្យប៉ះពាល់ដល់សន្ដិសុខជាតិអាមេរិក ខណៈចក្រភពអង់គ្លេសក៏កំពុងពិនិត្យមើលឡើងពីគោលនយោបាយ 5G របស់ខ្លួនជាមួយក្រុមហ៊ុននេះផងដែរ៕
