រដ្ឋមន្ត្រីក្រសួងកសិកម្ម បង្ហាញក្តីសង្ឃឹមថា នឹងមានការវិនិយោគបន្ថែម ដើម្បីពង្រឹង និងពង្រីកវិស័យកសិកម្ម រួមទាំងការកែច្នៃ និងវេចខ្ចប់ ហើយអាចនាំចេញយកទៅលក់នៅទីផ្សារសហភាពអឺរ៉ុប។
ការបង្ហាញក្តីសង្ឃឹមរបស់លោក វេង សាខុន ធ្វើឡើងនៅក្នុងជំនួបជាមួយលោក Vladimir Goshin ឯកអគ្គរដ្ឋទូតនៃសាធារណរដ្ឋបេឡារូស នៅថ្ងៃទី២៣ ខែឧសភា។
នៅក្នុងជំនួបនោះ លោករដ្ឋមន្ត្រីកសិកម្ម សង្ឃឹមថា នឹងពង្រីកប្រតិបត្តិការបន្ថែមទៀតរវាងប្រទេសទាំងពីរក្នុងការពង្រឹងវិស័យកសិកម្មកម្ពុជា ដើម្បីអាចយកទៅលក់នៅទីផ្សារអឺរ៉ុប។
ហ្វេសប៊ុកក្រសួងកសិកម្ម៖ «នាពេលអនាគត ឯកឧត្តមរដ្ឋមន្រ្តីសង្ឃឹមថា កិច្ចសហប្រតិបត្តិការនេះនឹងអាចពង្រឹង និងពង្រីកថែមទៀត ជាពិសេសលើការវិនិយោគ កែច្នៃ វេចខ្ចប់ និងធ្វើការនាំចេញផលិតផលកសិកម្មកម្ពុជាទៅកាន់ទីផ្សារសហភាពអឺរុប។»
ក្នុងឱកាសនោះ លោក វេង សុខុន ក៏បានស្នើឱ្យភាគីបេឡារូស ជួយសិក្សាពង្រឹងគ្រឿងយន្តក្នុងវិស័យកសិកម្មនៅកម្ពុជា ដោយលោកថា ពេលបច្ចុប្បន្នកម្ពុជាកំពុងតែខ្វះកម្លាំងពលកម្ម។
បច្ចុប្បន្ន កម្ពុជាទទួលបានសិទ្ធិអនុគ្រោះពន្ធអ្វីគ្រប់យ៉ាងលើកលែងតែអាវុធ (EBA) បានន័យថា កម្ពុជាអាចនាំទំនិញទាំងអស់លើកលែងតែអាវុធទៅលក់នៅអឺរ៉ុបដោយមិនជាប់ពន្ធ។ ការអនុគ្រោះបន្ធនេះធ្វើឱ្យកម្ពុជាចំនេញប្រមាណ ៧០០លានដុល្លារអាមេរិកក្នុង១ឆ្នាំ ជាប្រាក់មិនបាច់បង់ពន្ធ។
ប៉ុន្តែ ប្រព័ន្ធអនុគ្រោះពន្ធនេះកំពុងតែរង្គោះរង្គើ ដោយសារតែអឺរ៉ុបចោទថា រដ្ឋាភិបាលកម្ពុជាមិនគោរពលក្ខខណ្ឌ ដូចជា ការគោរពសិទ្ធិមនុស្ស និងការផ្តល់សេរីភាពនៃការធ្វើនយោបាយ ជាដើម។