អតីតមេដឹកនាំគណបក្សសង្គ្រោះជាតិ លោក សម រង្ស៊ី ហៅការបោះឆ្នោតជ្រើសរើសក្រុមប្រឹក្សាអាណត្តិទី៣ ដែលធ្វើឡើងនៅថ្ងៃអាទិត្យនេះ ថាជាការបោះឆ្នោតក្លែងក្លាយលើកទី៣ នាំមកនូវប្រព័ន្ធឯកបក្សដល់ការគ្រប់គ្រងអំណាចរបស់គណបក្សប្រជាជនកម្ពុជា ។
លោក សម រង្ស៊ី សរសេរនៅលើហ្វេសប៊ុករបស់លោក នាថ្ងៃអាទិត្យនេះថា៖ «នេះជាការបោះឆ្នោតក្លែងក្លាយ លើកទី៣នៅកម្ពុជា បន្ទាប់ពីរបប ហ៊ុន សែន បានរំលាយគណបក្សសង្គ្រោះជាតិ ដោយអត្តនោម័ត នៅថ្ងៃ ១៦ វិច្ឆិកា ២០១៧។ ការបោះឆ្នោតក្លែងក្លាយ លើកទី១ គឺការបោះឆ្នោតព្រឹទ្ធសភា នៅថ្ងៃ ២៥ កុម្ភៈ ២០១៨។ ការបោះឆ្នោតក្លែងក្លាយ លើកទី២ គឺការបោះឆ្នោតតំណាងរាស្ត្រ នៅថ្ងៃ ២៩ កក្កដា ២០១៨។ ការបោះឆ្នោតក្លែងក្លាយទាំង៣ លើកនោះ ធ្វើឱ្យគណបក្សកាន់អំណាចទទួលបានកៅអី ១០០ ភាគរយ នៅគ្រប់ស្ថាប័នរដ្ឋ ពីថ្នាក់ជាតិដល់ថ្នាក់មូលដ្ឋាន»។
សមាជិក គ.ជ.ប និងជាអ្នកនាំពាក្យ លោក ហង្ស ពុទ្ធា ចាត់ទុកការលើកឡើងរបស់លោក សម រង្ស៊ី ថាជាភាសានយោបាយ ប៉ុន្តែ ថា គ.ជ.ប បានរៀបចំការបោះឆ្នោតកន្លងទៅ ថាមានក្ខខណ្ឌសេរីត្រឹមត្រូវ និងយុត្តិធម៌ តាមយន្តការប្រជាធិបតេយ្យ។
លោកថា៖ «ពាក្យថា «ក្លែងក្លាយ» ជាសម្តីអ្នកនយោបាយទេ អ៊ីចឹង ក្នុងនាម គ.ជ.ប បានបំពេញតួនាទីទៅតាមច្បាប់ ហើយចំណែកការបោះផ្លោងសម្តីរបស់អ្នកនយោបាយជារឿងដោយឡែក តែ គ.ជ.ប ក៏មិនធ្វើឱ្យការផ្លោងសម្តីរបស់បុគ្គលម្នាក់ ឬពីរនាក់ បង្កឱ្យខូចដំណើរការប្រជាធិបតេយ្យនៅកម្ពុជាទេ»។
បើតាមសេចក្ដីប្រកាសព័ត៌មានរបស់ គ.ជ.ប ការបោះឆ្នោតក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ អាណត្តិទី៣ ប្រព្រឹត្តទៅនៅថ្ងៃអាទិត្យ ទី២៦ ខែឧសភានេះ ធ្វើឡើងជាអសកលដែលបោះឆ្នោតដោយអង្គបោះឆ្នោតចំនួន ១១ ៥៧២នាក់នៅទូទាំងប្រទេស។
ការបោះឆ្នោតអសកលនេះ មានគណបក្សនយោបាយចំនួន៧ ចូលរួមប្រកួត ដូចជា គណបក្សប្រជាជនកម្ពុជា គណបក្សហ្វ៊ុនស៊ិនប៉ិច គណបក្សខ្មែររួបរួមជាតិ គណបក្សខ្មែរសាធារណរដ្ឋ គណបក្សយុវជនកម្ពុជា គណបក្សឆន្ទៈខ្មែរ និងគណបក្សសញ្ជាតិកម្ពុជា។
ការបោះឆ្នោតនេះធ្វើឡើងខុសពីការបោះឆ្នោតផ្សេងៗទៀត ដោយសារ អ្នកបោះឆ្នោតត្រូវបោះពីរសន្លឹក ដើម្បីជ្រើសរើសក្រុមប្រឹក្សា ២ប្រភេទផ្សេងគ្នា ក្នុងការិយាល័យបោះឆ្នោតតែមួយ ហើយមានហិបឆ្នោតចំនួន ២ បន្ទប់សម្ងាត់ចំនួន២ និងត្រាសម្ងាត់ចំនួន ២ផងដែរ។