មន្ត្រីជាន់ខ្ពស់គណបក្សកាន់អំណាច បង្ហាញក្តីសង្ឃឹមថា គណបក្សរបស់លោកនឹងទទួលបានការគាំទ្រពីអង្គបោះឆ្នោតចេញពីបក្សនេះ ១០០ភាគរយ ដោយមិនសង្ស័យថា អង្គបោះឆ្នោតបក្សនេះទៅបោះគាំទ្របក្សផ្សេងនោះទេ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រាប់ វី.អូ.ឌី នៅថ្ងៃនេះ ថា គណបក្សរបស់លោកនឹងទទួលបានសំឡេងទាំងអស់ពីអង្គបោះឆ្នោតក្នុងបក្ស ចំពោះការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ អាណត្តិទី៣ ឆ្នាំ២០១៩នេះ។
លោកថា៖ «យើងសង្ឃឹម យើងជឿជាក់ថា លទ្ធផលនឹងចេញតាមតួលេខដែលមាននៅក្រុមប្រឹក្សាឃុំ-សង្កាត់ ដែលជាអង្គបោះឆ្នោត។ ទទួលបានទាំងអស់ អត់បាត់អង្គបោះឆ្នោតទេ បាទ! អត់បាត់សំឡេងទេ»។
គណៈកម្មាធិការជាតិរៀបចំការបោះឆ្នោត នៅថ្ងៃអាទិត្យ ទី២៦ ខែឧសភានេះ បានរៀបចំបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ ដែលមានគណបក្សនយោបាយចំនួន៧ចូលរួមប្រកួតប្រជែង។
គណបក្សនយោបាយចំនួន៧ ដែលចូលរួមប្រកួតប្រជែងការបោះឆ្នោតនេះ រួមមាន គណបក្សប្រជាជនកម្ពុជា គណបក្សហ្វ៊ុនស៊ិនប៉ិច គណបក្សខ្មែររួបរួមជាតិ គណបក្សខ្មែរសាធារណរដ្ឋ គណបក្សយុវជនកម្ពុជា គណបក្សឆន្ទៈខ្មែរ និងគណបក្សសញ្ជាតិកម្ពុជា។
