តំណាងអ្នកមានជម្លោះដីធ្លីនៅកោះកុង អះអាងថា មន្រ្តីស្ថានទូតចិនបានសន្យាថា នឹងកោះហៅភាគីក្រុមហ៊ុនចិន UDG មកជួបពិភាក្សា ដើម្បីស្វែងរកដំណោះស្រាយផលប៉ះពាល់តាមការទាមទាររបស់អ្នកភូមិ។
ការសន្យានេះ ធ្វើឡើងខណៈតំណាងពលរដ្ឋជិត២០នាក់មកពីស្រុកគិរីសាគរ និងបទុមសាគរ ដែលកំពុងមានជម្លោះដីធ្លីជាមួយក្រុមហ៊ុន ញូញៀន របស់ចិន បានប្រមូលផ្តុំគ្នាមុខស្ថានទូតនេះ ជាថ្មីទៀតនៅថ្ងៃនេះ ជំរុញទៅស្ថានទូតមួយនេះឱ្យដាក់សំពាធលើក្រុមហ៊ុនឱ្យផ្តល់សំណងជូនពួកគេ ដោយថា វិវាទនោះបានអូសបន្លាយជាង១០ឆ្នាំមកហើយ គ្មានដំណោះស្រាយ។
អ្នកស្រី សាំង ពុយ ដែលអះអាងថា ជាតំណាងពលរដ្ឋនៅឃុំកោះស្តេច ប្រាប់អ្នកសាព័ត៌មានក្រោយជំនួបជាមួយតំណាងស្ថានទូតចិនថា មន្រ្តីស្ថានទូតចិនបានប្រាប់ពួកគាត់ថា ពួកគេបានដឹងរឿងនេះ ប៉ុន្តែ ថា ភាគីក្រុមហ៊ុននោះប្រាប់វិញថា ដំណោះស្រាយនៃផលប៉ះពាល់បានដោះស្រាយហើយ ។
តំណាងពលរដ្ឋរូបនេះបន្តថា ក្រោយមន្រ្តីស្ថានទូតនិយាយបែបនេះ តំណាងពលរដ្ឋបានច្រានចោល ដោយថា អ្នកភូមិ ៧៧គ្រួសារទៀត គឺមិនទាន់ទទួលបានសំណងនោះទេ និងបានស្នើជាថ្មីទៅស្ថានទូតឱ្យជួយអន្តរាគមន៍ដោះស្រាយបញ្ចប់វិវាទផងដែរ។
អ្នកស្រីបន្ថែមថា៖ « ក្រុមហ៊ុន ញូញៀន នេះ ជាក្រុមហ៊ុនរបស់ចិន អ៊ីចឹង អគ្គរដ្ឋទូតចិនគាត់ត្រូវតែទទួលខុសត្រូវ គាត់ត្រូវណែនាំក្រុមហ៊ុនរបស់គាត់កុំឱ្យចូលមករំលោភសិទ្ធិប្រជាពលរដ្ឋខ្មែរ ក្រុមហ៊ុនមួយនេះធ្វើការអភិវឌ្ឍមិនបានគោរពតាមកិច្ចសន្យាទេ គឺគាត់រំលោភយកដីពលរដ្ឋទាំងស្រុង គាត់អត់ដោះស្រាយជូនពលរដ្ឋទេ។ ១១ឆ្នាំហើយដែលហាមប្រជាពលរដ្ឋមិនឱ្យចូលដី និងផ្ទះខ្លួនឯង អ៊ីចឹង ឱ្យពលរដ្ឋទៅណា»។
តំណាងពលរដ្ឋម្នាក់ទៀត អ្នកស្រី ឆៃ គឹមធុច និយាយថា តំណាងពលរដ្ឋសម្រេចឡើងមកតវ៉ាដល់ស្ថានទូតចិនម្តងទៀតនេះ ដោយសារតែថ្មីនេះ អ្នកភូមិបានចូលបង្កបង្កើនផល និងសាងសង់ផ្ទះលើដីរបស់ខ្លួន ប៉ុន្តែ ត្រូវក្រុមហ៊ុនហាមឃាត់ ដោយថា ដីនោះជាដីរបស់ក្រុមហ៊ុនទៅវិញ។
អ្នកស្រីបន្ថែមថា៖ «ពួកយើងរងភាពអយុត្តិធម៌១១ឆ្នាំហើយ ដោយសារចិនរំលោភយកដីធ្លីរបស់ពួកយើង។ ក្រុមហ៊ុនមួយនេះបានបណ្តេញម្ចាស់ប្រទេសដែលរស់នៅលើទឹកដីខ្លួនឯងធ្វើឱ្យពួកយើងបាត់បង់មុខរបរធ្វើស្រែបង្កបង្កើនផល ជំពាក់បំណុលគេ ឈូសឆាយផ្ទះសម្បែងពួកយើង កូនៗបាត់បង់ការសិក្សា។ អ៊ីចឹង សូមឱ្យស្ថានទូតចិនជួយមើលពូជសាសន៍ខ្លួនផង ដែលមកនៅប្រទេសគេហើយ រំលោភបំពាក់ដីធ្លីគេទៀត»។
វិ.អូ.ឌី មិនអាចសុំការបញ្ជាក់បន្ថែមពីស្ថានទូតចិន ជុំវិញការអះអាងរបស់អ្នកមានជម្លោះដីធ្លីនេះ នៅឡើយទេគិតត្រឹមថ្ងៃចន្ទនេះ។ ចំណែកក្រុមហ៊ុនចិន UDG នេះ ក៏មិនអាចទាក់ទងបានដែរ។
អភិបាលរងខេត្តកោះកុង លោក សុខ សុធី អះអាងថា ពលរដ្ឋដែលឡើងមកតវ៉ានេះ មួយចំនួនរស់ក្នុងតំបន់ការពារ និងមួយចំនួនទៀតជាពលរដ្ឋក្រៅមូលដ្ឋាន ដែលអាជ្ញាធរពិបាកក្នុងការអន្តរាគមន៍ផ្តល់ដំណោះស្រាយ។
លោកបន្ថែម៖ «បើគាត់រស់នៅតំបន់ការពារ គឺទាល់តែមានការសម្រេចពីរដ្ឋាភិបាល។ អ៊ីចឹងសម្រាប់អ្នកនៅឃុំព្រែកខ្សាច់ ឃុំថ្មស គឺការសម្រេចរបស់រដ្ឋាភិបាល។ ចំអ្នកនៅភ្ញីមាស តានី និងនៅឃុំផ្សេងទៀត ភាគច្រើនលើសលុបពួកគាត់ជាអ្នករស់នៅក្រៅមូលដ្ឋាន ជាគោលនយោបាយកន្លងមកគឺអាហ្នឹងគេអត់ដោះស្រាយឱ្យទេ»។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា ការអះអាងរបស់អាជ្ញាធរថាជាការដោះសារ ដើម្បីគេចចេញពីការទទួលខុសត្រូវ ។ លោកចោទជាសំណួរថា បើដីនៅតំបន់នោះជាដីការពារ ហេតុអ្វីក្រុមហ៊ុនចិននោះមានសិទ្ធិវិនិយោគលើដីនោះបាន ។
មន្រ្តីការពារសិទ្ធិមនុស្សរូបនេះ ជំរុញទៅស្ថានចិនត្រូវទទួលខុសត្រូវ និងដោះស្រាយសំណងផលប៉ះពាល់ជូនប្រជាពលរដ្ឋ ដើម្បីកុំឱ្យពលរដ្ឋខ្មែរក្លាយជាជនរងគ្រោះដោយសារការវិនិយោគរបស់ក្រុមហ៊ុនចិន ។
លោកបន្ថែមថា៖ «តាមខ្ញុំដឹង ក្រុមហ៊ុនចិនហ្នឹងគឺជាគម្រោងវិនិយោគដ៏ធំមួយរបស់រដ្ឋាភិបាលចិនដែលទទួលបានលុយពីរដ្ឋាភិបាលចិន។ អ៊ីចឹង បើសិនជាមានការអន្តរាគមន៍ពីស្ថានទូតចិន ទំនាស់ហ្នឹងនឹងអាចដោះស្រាយបាន ព្រោះថា ការដោះស្រាយទាំងប៉ុន្មានកន្លងមក គឺក្រុមហ៊ុនចិនជាអ្នកសម្រេចទេ អាជ្ញាធរគ្រាន់តែជួយសម្របសម្រលជាមួយប្រជាពលរដ្ឋទេ»។
កាលពីឆ្នាំ២០០៨ រដ្ឋាភិបាលបានសម្រេចផ្តល់ដីសម្បទានសេដ្ឋកិច្ចទំហំ ៣ម៉ឺន ៦ពាន់ហិកតា ស្ថិតនៅក្នុងស្រុកបទុមសាគរ និងស្រុកគិរីសាគរ ខេត្តកោះកុង ទៅដល់ក្រុមហ៊ុនចិន ញូញៀន ឌឹវើលុបមែន គ្រុប (Union Development Group) ដើម្បីធ្វើការអភិវឌ្ឍពាណិជ្ជកម្ម និងរមណីយដ្ឋានទេសចរណ៍ស្របតាមស្តង់ដារអន្តរជាតិ។
របាយការណ៍ និងការវិភាគផ្លូវច្បាប់របស់មជ្ឈមណ្ឌលអប់រំច្បាប់សម្រាប់សហគមន៍ (CLEC) ឆ្នាំ២០១២ បានរកឃើញថា គម្រោងផ្តល់ដីសម្បទានសេដ្ឋកិច្ចទៅឱ្យក្រុមហ៊ុនចិន ញូញៀន (UDG) បានធ្វើឱ្យប្រជាពលរដ្ឋ ១,១៤៣គ្រួសារ ត្រូវបង្ខំឱ្យបោះបង់ចោលដីធ្លីប្រមាណជាង ១០០០០ហិកតា និងផ្ទះ ១៥០០ខ្នង ត្រូវបង្ខំឱ្យរុះរើ និងឈូសឆាយ៕