មេដឹកនាំបក្សកាន់អំណាច លោកនាយករដ្ឋមន្ដ្រី ហ៊ុន សែន បានប្រកាសរៀបចំពិធីហូបនំបញ្ចុក នៅចំថ្ងៃតែមួយដែលលោកអះអាងថា ក្រុមអ្នកគាំទ្រអតីតមេដឹកនាំបក្សប្រឆាំងនៅក្នុង និងក្រៅប្រទេសគ្រោងរៀបចំពិធីដូចគ្នានេះ។
ក្នុងពិធីចែកសញ្ញាបត្រដល់និស្សិតសាកលវិទ្យាល័យភូមិន្ទភ្នំពេញនៅថ្ងៃនេះ លោក ហ៊ុន សែន បានអំពាវនាវដល់ប្រជាពលរដ្ឋ និងអ្នកគាំទ្រគណបក្សប្រជាជនកម្ពុជា ឲ្យចូលរួមពិធីហូបនំបញ្ចុក នៅថ្ងៃទី៩ ខែមិថុនាខាងមុខនេះ។
លោក ហ៊ុន សែន ថ្លែងថា ការរៀបចំពិធីហូបនំបញ្ចុកនៅស្រុកខ្មែរនេះ គឺជាពិធីមួយបង្ហាញពីសន្ដិភាព សាមគ្គីភាពជាតិ និងមិនមែនជាការបំបែកបំបាក់ជាតិនោះទេ។
ប៉ុន្ដែ លោក ហ៊ុន សែន អះអាងថា ការជួបជុំគ្នាហូបនំបញ្ចុករបស់អតីតមន្ដ្រីគណបក្សសង្គ្រោះជាតិនៅថ្នាក់មូលដ្ឋាននាពេលកន្លងមក គឺអាចមានជាប់ពាក់ព័ន្ធនឹងការប្រមូលគ្នាកសាងកម្លាំងប្រឆាំងរដ្ឋាភិបាលតាមការអំពាវនាវរបស់លោក សម រង្ស៊ី ទើបអាជ្ញាធរមានវិធានការជាបន្ដបន្ទាប់។
លោក ហ៊ុន សែន ថ្លែងក្នុងពិធីនោះថា៖ «យើងក៏ប្រកាសយកថ្ងៃ៩ មិថុនា ស៊ីនំបញ្ចុក ស៊ីឲ្យព្រាត ហើយបើវាខ្វះខាត ពួកអាផ្កាប់មុខ វាខ្វះខាតនំបញ្ចុកស៊ី ហៅវាមកចូលស៊ីមក ហើយបើវាហៅយើងទៅចូលស៊ី យើងក៏ទៅចូលស៊ីជាមួយវាទៅ។ នំបញ្ចុកសាមគ្គីជាតិ មិនមែននំបញ្ចុកបំបែកបំបាក់ជាតិទេ»។
អតីតសមាជិកជាប់ឆ្នោតរបស់បក្សប្រឆាំងដល់ទៅចំនួន ១៤៧នាក់នៅតាមបណ្ដាខេត្តនានា ត្រូវបានអាជ្ញាធរ និងតុលាការកោះហៅឲ្យបំភ្លឺ បន្ទាប់ពីពួកគេបានប្រមូលផ្ដុំគ្នាហូបនំបញ្ចុកនៅតាមមូលដ្ឋាន។
ក្រុមអតីតសមាជិកជាប់ឆ្នោតទាំងនោះ ត្រូវបានរដ្ឋាភិបាលចោទថា ប្រមូលផ្ដុំគ្នាបង្ហាញការគាំទ្រលោក សម រង្ស៊ី ដែលកំពុងរស់នៅនិរទេសខ្លួនឯងនៅក្រៅប្រទេស និងដែលកំពុងបង្ហាញជំហរវិលត្រឡប់ចូលមកប្រទេសកម្ពុជាវិញ។
អង្គការឃ្លាំមើលសិទ្ធិមនុស្ស (Human Rights Watch) បានទាមទារទៅរដ្ឋាភិបាលកម្ពុជាឲ្យបញ្ឈប់ការធ្វើទុក្ខបុកម្នេញពីសំណាក់អាជ្ញាធរទៅលើក្រុមសកម្មជនគាំទ្របក្សប្រឆាំងតទៅទៀត៕
