រដ្ឋាភិបាលស្វីសបានសន្យាផ្ដល់ជំនួយសម្រាប់សកម្មភាពដោះមីននៅកម្ពុជារយៈពេល ៥ឆ្នាំបន្តទៀតដែលមានតម្លៃប្រមាណជាង៦លានដុល្លារ។ នេះបើតាមអាជ្ញាធរមីនកម្ពុជា។
អាជ្ញាធរមីនបានលើកឡើងនៅលើទំព័រហ្វេសប៊ុករបស់ខ្លួនកាលពីថ្ងៃម្សិលមិញ ថា ក្នុងជំនួបរវាងនាយកទីភ្នាក់ងារស្វីសសម្រាប់ការអភិវឌ្ឍន៍ និងកិច្ចសហប្រតិបត្តិការប្រចាំកម្ពុជា លោកស្រី Carin Salerno និងអនុប្រធានទី១ អាជ្ញាធរមីនកម្ពុជា លោក លី ធុជ ប្រទេសស្វីសបានសន្យាថា ខ្លួននឹងផ្ដល់ថវិកាប្រមាណ៦លានដុល្លារអាមេរិកសម្រាប់គាំទ្រដល់ការបោសសម្អាតមីនកម្ពុជា ចាប់ពីឆ្នាំ២០២០ ដល់ឆ្នាំ២០២៥ បន្តទៀត។
បើតាមអាជ្ញាធរមីន ចាប់តាំងពីឆ្នាំ២០១៣ រហូតដល់ឆ្នាំ ២០១៩នេះ ប្រទេសស្វីសបានផ្ដល់ថវិកាគាំទ្រដល់ការបោសសម្អាតមីនប្រមាណជាង ៧លានដុល្លារសហរដ្ឋអាមេរិករួចមកហើយ។
ប្រទេសកម្ពុជាបានប្ដេជ្ញាបោសសម្អាតមីនឲ្យអស់ពីប្រទេសនៅត្រឹមឆ្នាំ២០២៥ខាងមុខ ដែលត្រូវការថវិកាប្រមាណ ៤០៦លានដុល្លារអាមេរិក៕