ប្រមុខការទូតកម្ពុជា ប្រាប់ប្រតិភូអឺរ៉ុបថា ប្រទេសកម្ពុជានឹងធ្វើអ្វីគ្រប់យ៉ាងដើម្បីរក្សាប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» (EBA) ហើយលោកក៏ស្នើដល់ប្រតិភូនេះ ឲ្យមើលឃើញពីការពិតជាក់ស្ដែងដែលកម្ពុជាធ្វើបានខ្លះផង។
នៅព្រឹកថ្ងៃទី៦ ខែមិថុនា រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានទទួលជួបជាមួយប្រតិភូអឺរ៉ុបដែលដឹកនាំដោយអគ្គលេខាធិការរងនៃមន្ទីរការបរទេសសហភាពអឺរ៉ុប លោក Jean-Christophe Balliard ដើម្បីពិភាក្សាលើទំនាក់ទំនងការទូតមួយចំនួន ក្នុងនោះក៏មានការពិភាក្សាពីប្រព័ន្ធអនុគ្រោះពន្ធរបស់អឺរ៉ុប EBA ផងដែរ។
អ្នកនាំពាក្យក្រសួងការបរទេសកម្ពុជា លោក កេត សោផាន់ ថ្លែងក្នុងសន្និសីទកាសែតបន្ទាប់ពីកិច្ចប្រជុំនេះថា ប្រមុខការទូតកម្ពុជានៅតែរក្សាជំហរធ្វើការជាមួយអឺរ៉ុបដើម្បីរក្សាប្រព័ន្ធអនុគ្រោះពន្ធនេះ តែបានបញ្ជាក់ថា កម្ពុជាមិនអាចយកអធិបតេយ្យទៅប្ដូរនោះទេ ខណៈស្នើឲ្យប្រតិភូរំលេចឲ្យឃើញពីការវិវត្តរបស់កម្ពុជាខ្លះផងក្នុងរបាយការណ៍ទស្សនកិច្ចរបស់ខ្លួន។
លោក កេត សោផាន់ ថ្លែងថា៖ «យើងកត់សម្គាល់ឃើញថា អ្វីដែលជារបាយការណ៍របស់គាត់មិនបានឆ្លុះបញ្ចាំងពីរដ្ឋាភិបាល ជាពិសេសដូចដែលយើងឆ្លើយតបទៅ EU វិញ ដែលមានកម្រាស់ ៨៣ទំព័រហ្នឹង ឃើញថា គាត់មិនបានឆ្លុះបញ្ចាំងអ្វីពីវឌ្ឍនភាពរបស់កម្ពុជានោះទេ។ អ៊ីចឹង គ្រប់ពេលដែលរដ្ឋាភិបាល ជាពិសេសនៅពេលដែលប្រមុខការទូតយើងជួប EU ហ្នឹង គឺតែងតែស្នើសុំឲ្យរំលេចពីអ្វីដែលជាការពិតជាក់ស្ដែងរបស់កម្ពុជាខ្លះផង»។
គិតចាប់ពីចុងឆ្នាំ២០១៨មក ប្រតិភូអឺរ៉ុបបានមកទស្សនកិច្ចនៅកម្ពុជាចំនួន ២ដងរួចមកហើយ តែបន្ទាប់ពីដំណើរទស្សនកិច្ចនេះ រដ្ឋាភិបាលកម្ពុជាមិនទទួលបានការវាយតម្លៃវិជ្ជមានពីតំណាងប្រតិភូមកពីតំបន់ចាយប្រាក់អឺរ៉ូនោះទេ។
អ្នកនាំពាក្យសមាគមសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ការវាយតម្លៃរបស់សហភាពអឺរ៉ុប ជាការវាយតម្លៃសុក្រឹតមួយ ហើយលោកថា រដ្ឋាភិបាលគួរតែពិនិត្យពីការអនុវត្តរបស់ខ្លួនវិញថា បានឆ្លើយតបទៅនឹងលក្ខខណ្ឌរបស់សហភាពអឺរ៉ុបបានកម្រិតណា។
លោក ស៊ឹង សែនកុរណា ប្រាប់ថា៖ «អ៊ីចឹង យើងគួរតែមើលលើលក្ខខណ្ឌទាំងអស់ហ្នឹង បើយើងទៅដោះស្រាយលើបញ្ហាផ្សេងៗដែលមិនត្រូវនឹងលក្ខខណ្ឌហ្នឹង វាស្មើនឹងគ្មានការដោះស្រាយអីទាំងអស់! តើយើងយកមកវាស់វែងរបៀបម៉េច? បានន័យថា យើងមិនទាន់យល់អំពីលក្ខខណ្ឌរបស់ EU ផងហ្នឹង។ ហើយយើងចេះតែមិនដោះស្រាយឲ្យត្រូវចំណុចស្មើហ្នឹងពាក្យចាស់ថា យើងអេះមិនចំរមាស់ ឬក៏ដាក់ថ្នាំមិនត្រូវជំងឺ ជាដើម។ អ៊ីចឹង វាមិនអាចដោះស្រាយបានទេក្នុងបញ្ហារឿងការអនុគ្រោះពន្ធ EBA នេះឯង»។
ប្រតិភូសហភាពអឺរ៉ុបបានធ្វើដំណើរទស្សនកិច្ចរបស់ខ្លួនកាលពីថ្ងៃទី៣ មិថុនា ក្នុងគោលបំណងស្វែងរកការពិតមួយ បន្ទាប់ពីប្រទេសនេះបានចាប់ផ្ដើមដំណើរការ ដែលនឹងឈានទៅដកហូតប្រព័ន្ធអនុគ្រោះពន្ធពីប្រទេសកម្ពុជា បន្ទាប់ពីរកឃើញថា រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន ពុំបានស្ដារស្ថានភាពសិទ្ធិមនុស្ស និងលទ្ធិប្រជាធិបតេយ្យនៅកម្ពុជាឡើងវិញនោះ។
ប្រព័ន្ធអនុគ្រោះពន្ធ EBA ត្រូវបានផ្ដល់មកកម្ពុជាជាមួយលក្ខខណ្ឌនៃការគោរពសិទ្ធិមនុស្ស និងប្រជាធិបតេយ្យ ហើយតាមរយៈប្រព័ន្ធអនុគ្រោះពន្ធនេះ កម្ពុជានាំចូលទំនិញគ្រប់យ៉ាងចូលទៅទីផ្សារសហភាពអឺរ៉ុបដោយរួចផុតពីកាតព្វកិច្ចបង់ពន្ធគយ ដែលមានតម្លៃជិត ៧០០លានដុល្លារក្នុងមួយឆ្នាំ៕