សហគមន៍ដីធ្លីចំនួន ៨នាក់នៅក្នុងស្រុកតំបែរ ខេត្តត្បូងឃ្មុំ ត្រូវបានតុលាការខេត្តនេះកោះហៅឲ្យចូលបំភ្លឺនៅសប្ដាហ៍ក្រោយនេះ បន្ទាប់ពីរងបណ្ដឹងពីពលរដ្ឋម្នាក់ដែលប្រជាសហគមន៍អះអាងថា បានចូលទៅកាប់ឈើក្នុងតំបន់ការពាររបស់សហគមន៍។
ក្នុងដីកាកោះចុះថ្ងៃទី២៣ ខែឧសភា ចៅក្រមស៊ើបសួរសាលាដំបូងខេត្តត្បូងឃ្មុំ អ្នកស្រី ហៃ ណៃហេង បានបង្គាប់ឱ្យប្រជាពលរដ្ឋចំនួន ៨នាក់ នៅភូមិស្រែប្រាំង ឃុំត្រពាំងព្រីង ចូលបំភ្លឺនៅតុលាការនៅថ្ងៃទី១០ ខែមិថុនា ឆ្នាំ២០១៩ ក្រោមការចោទថា បានគំរាមកំហែងអ្នកដទៃ។
តំណាងសហគមន៍ដីធ្លី លោក សែម ចំណាន ស្ថិតក្នុងចំណោមអ្នកភូមិ ៨រូបដែលរងបណ្ដឹងមកពីភូមិស្រែប្រាំង ស្ថិតក្នុងឃុំត្រពាំងព្រីង បានឲ្យដឹងថា ប្រជាពលរដ្ឋជាង ៣០នាក់ បានចូលទៅហាមឃាត់លោក ញ៉ សារឿន មិនឲ្យចូលទៅកាប់ឈើនៅក្នុងព្រៃសហគមន៍កាលពីខែកុម្ភៈកន្លងមក។ លោកបន្ថែមថា លោក ញ៉ សារឿន ចូលកាប់ឈើសម្រាប់ប្រយោជន៍ផ្ទាល់ខ្លួន។
លោក សែម ចំណាន ប្រាប់ថា៖ «វាមិនបានជួយដល់សហគមន៍ បើយើងទុកអុសហ្នឹងនៅ ដើម្បីឱ្យប្រជាពលរដ្ឋប្រើប្រាស់ វាល្អជាង។ ហើយម្យ៉ាងទៀត គាត់កាប់អុសហ្នឹងមិនមែនយកមកជួយសហគមន៍ណា គាត់លក់ជាឯកជន យកលុយចូលហោប៉ៅគាត់ហ្នឹង ហើយមានផលប៉ះពាល់ដល់ប្រជាពលរដ្ឋ»។
បុរសដែលអះអាងថាជាតំណាងសហគមន៍រូបនេះ បានបញ្ជាក់ថា លោក និងអ្នកភូមិផ្សេង នឹងចូលបំភ្លឺទៅតាមដីកាកោះហៅរបស់តុលាការនៅសប្ដាហ៍ក្រោយនេះ។
ពលរដ្ឋម្នាក់ទៀត លោក អាន ឃីស ដែលត្រូវតុលាការកោះហៅដែរ ឲ្យដឹងថា លោកនឹងទៅបំភ្លឺដោយមិនមានភ័យខ្លាចឡើយ ដោយសារ មិនបានប្រើប្រាស់អាវុធ ដូចការចោទប្រកាន់។
លោក អាន ឃីស ប្រាប់ថា៖ «យើងអត់ភ័យអត់ខ្លាចអីទេ ព្រោះយើងអត់មានកំហុសអ្វីផង គ្រាន់តែយើងទៅចាប់ម៉ាស៊ីនគេបំផ្លាញព្រៃឈើ។ អាហ្នឹងគេគិតយ៉ាងម៉េចដែរ?»។
ពលរដ្ឋរូបនេះ ឲ្យដឹងទៀតថា ប្រជាពលរដ្ឋទាំងអស់នៅក្នុងភូមិរបស់លោក នឹងឡើងទៅតវ៉ានៅមុខតុលាការ ដើម្បីទាមទារឱ្យទម្លាក់ចោលបណ្ដឹងនោះ។
មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តត្បួងឃ្មុំ អ្នកស្រី ធីម ណារីន មានប្រសាសន៍ថា តាមច្បាប់ ប្រជាពលរដ្ឋមានសិទ្ធិហាមឃាត់ និងចាប់យកវត្ថុតាងមួយចំនួនពីជនជាអ្នកប្រព្រឹត្តបទល្មើស បើសិនជាករណីនោះ ជាបទល្មើសជាក់ស្ដែង។
លោកស្រីស្នើទៅតុលាការឱ្យធ្លាក់បទចោទប្រកាន់លើប្រជាពលរដ្ឋ ៨នាក់វិញ ដោយចាត់ទុកសកម្មភាពរបស់អ្នកភូមិទាំងនោះថា ធ្វើឡើងដើម្បីការពារផលប្រយោជន៍របស់សហគមន៍តែប៉ុណ្ណោះ។
អ្នកស្រី ធីម ណារីន ប្រាប់ថា៖ «អ៊ីចឹងអត់មានជនណាដែលមិនមានសិទ្ធិក្នុងការឃាត់ទុក ឬក៏ឃាត់ខ្លួនជនប្រព្រឹត្តបទល្មើសបានទេ នៅក្នុងបទល្មើសជាក់ស្ដែង គឺមានសិទ្ធិយោងតាមក្រមព្រហ្មទណ្ឌ។ អ៊ីចឹង តុលាការគាត់គួរតែពិចារណាមើលលើចំណុច ដើម្បីរកភាពយុត្តិធម៌ឱ្យអ្នកទាំង ៨រូបហ្នឹង»។
លោក សែម ចំណាន អះអាងថា ដីព្រៃសហគមន៍ភូមិស្រែប្រាំង គ្រប់ដណ្ដប់លើផ្ទៃដីព្រៃទំហំ ៧៣៥ហិកតា ស្ថិតក្នុងឃុំត្រពាំងព្រីង ស្រុកតំបែរ ហើយបច្ចុប្បន្ននេះ មានប្រជាពលរដ្ឋចំនួន ១៣៩គ្រួសារ ប្រើប្រាស់ និងអាស្រ័យផលលើដីព្រៃសហគមន៍នោះ៕