លោកនាយករដ្ឋមន្ត្រី ហ៊ុន សែន ចាត់ទុកការលើកឡើងរបស់នាយករដ្ឋមន្ត្រីសឹង្ហបុរីថា ជាការប្រមាថដល់ការបូជាជីវិតរបស់កងទ័ពវៀតណាម ដែលបានចូលរួមរំដោះកម្ពុជាចេញពីរបបខ្មែរក្រហម។
នាយករដ្ឋមន្ត្រីសឹង្ហបុរី លី ស៊ានឡុង កាលពីថ្ងៃទី៣១ ខែឧសភា បានសរសេរលើកហ្វេសប៊ុករបស់លោកដែលរំឭកថា សឹង្ហបុរី និងប្រទេស៤ទៀតធ្លាប់បាន «រួមគ្នាប្រឆាំងការឈ្លានពានរបស់វៀតណាមមកលើកម្ពុជា និងប្រឆាំងរដ្ឋាភិបាលកម្ពុជាដែលបានជំនួសខ្មែរក្រហម»។
នាយករដ្ឋមន្ត្រីកម្ពុជា លោក ហ៊ុន សែន បានសរសេរនៅលើហ្វេសប៊ុករបស់លោក នៅថ្ងៃទី៦ ខែមិថុនា ថា លោកមានការខកចិត្តទៅនឹងការលើកឡើងរបស់នាយករដ្ឋមន្ត្រីសឹង្ហបុរីបែបនេះ។
មេដឹកនាំកម្ពុជា ហៅ «ការលើកឡើងនេះ បង្ហាញថា កាលនោះសឹង្ហបុរី បានគាំទ្ររបបប្រល័យពូជសាសន៏ និងចង់ឱ្យរបបប្រល័យពូជសាសន៏វិលត្រឡប់មកកម្ពុជាវិញដែរ»។ លោកបន្តថា សារនេះក៏ជាការប្រមាថដល់ពលីកម្មសាច់ស្រស់ឈាមស្រស់របស់កងទ័ពស្ម័គ្រចិត្តវៀតណាមដែលបានជួយរំដោះកម្ពុជាឱ្យរួចផុតពីរបបប្រល័យពូជសាសន៏ផងដែរ។
ភាគីវៀតណាម ក៏បានច្រានចោលការលើកឡើងរបស់នាយករដ្ឋមន្ត្រីសឹង្ហបុរីដែរ។ អ្នកនាំពាក្យក្រសួងការបរទេសវៀតណាម លោកស្រី Le Thi Thu Hang បានថ្លែងកាលពីថ្ងៃទី៤ ខែមិថុនា ថា អ្វីដែលនាយករដ្ឋមន្ត្រីសឹង្ហបុរី លោក Lee Hsien Loong អះអាង មិនបានឆ្លុះបញ្ចាំងពីសច្ចភាពនៃប្រវត្តិសាស្ត្រនោះទេ។ លោកស្រី បន្ថែមថា វៀតណាម បានរួមចំណែក និងការលះបង់ ជួយប្រជាជនកម្ពុជា ដើម្បីបញ្ចប់របបប្រល័យពូជសាសន៍ខ្មែរក្រហម ដែលគេទទួលស្គាល់យ៉ាងទូលំទូលាយ។
អតីតតំណាងរាស្ត្រគណបក្សប្រឆាំង លោក អ៊ូ ច័ន្ទរត័្ន មានប្រសាសន៍ថា ការលើកឡើងរបស់នាយករដ្ឋមន្ត្រីសឹង្ហបុរី បានបង្ហាញពីប្រវត្តិសាស្ត្រពិតរបស់កម្ពុជាដែលបានកើតឡើងអំឡុងឆ្នាំ១៩៧៩។
លោកថា៖ «ជាប្រវត្តិសាស្ត្រ យើងដឹងទាំងអស់គ្នាហើយ អ្នកដែលបានរៀននោះ។ អន្តរជាតិគេថា ជាការឈ្លានពានរបស់វៀតណាម។ ដូច្នេះ គេលើកឡើងហ្នឹង វាគ្មានអីខុសទេ»។
អ្នកវិភាគនយោបាយ លោក ឯម សុវណ្ណរ៉ា ថា វត្តមានរបស់កងទ័ពវៀតណាម ត្រូវបានសហគមន៍អន្តរជាតិមើលឃើញថា ជាការឈ្លានពានកម្ពុជា។ លោកបន្តថា ក្រោយវៀតណាមចូលវាយលុកបណ្តេញខ្មែរក្រហមចេញពីអំណាច វៀតណាមមិនព្រមប្រគល់ឯករាជ្យឲ្យរដ្ឋាភិបាលថ្មីរបស់កម្ពុជាទេ រហូតមានការថ្កោលទោសពីសហគមន៍អន្តរជាតិ ទើបវៀតណាមដកទ័ពចេញពីកម្ពុជា។
អ្នកវិភាគរូបនេះ បង្ហាញការព្រួយបារម្ភថា ប្រតិកម្មនេះអាចនឹងធ្វើឱ្យប៉ះពាល់ដល់យន្តការអាស៊ាន បើសារឆ្លើយឆ្លងនេះក្លាយជាជម្លោះការទូតមិនអាចដោះស្រាយបាន ។
លោកថា៖ «អាស៊ាន វាមានគោលការណ៍មួយគឺឯកភាពគ្នាជាឯកច្ឆន្ទ។ ការព្រមព្រៀងអីហ្នឹងត្រូវការសំឡេងរួម ហើយបើមានប្រទាំងប្រទើសគ្នាលើបញ្ហាណាមួយ ឬសមាជិកណាម្នាក់បដិសេធ អាស៊ានមិនអាចចេញសេចក្តីថ្លែងការណ៍រួមបានទេ ហើយធ្វើឱ្យអាស៊ានហ្នឹងជួបបរាជ័យក្នុងប្រវត្តិសាស្ត្ររបស់ខ្លួនក្នុងការចេញសេចក្តីថ្លែងការណ៍រួម»។
សាស្ត្រាចារ្យផ្នែកសិក្សាពីសហគមន៍អាស៊ាននៅសាកលវិទ្យាល័យនរេសួន ប្រទេសថៃ លោក ផូល ឆាំប៊ឺ (Paul Chambers) មានប្រសាសន៍ប្រាប់ VOD តាមសារអេឡិចត្រូនិច នៅថ្ងៃនេះថា លោក ហ៊ុន សែន ប្រាកដជាមានការប្រយ័ត្នប្រយែងដោយមិនចង់ធ្វើឱ្យវៀតណាមមិនសប្បាយចិត្ត។
សាស្ត្រាចារ្យរូបនេះ បន្តថា៖ «ប្រសិនបើលោក ហ៊ុន សែន យល់ស្របថា វាគឺជាការឈ្លានពាន នោះទំនាក់ទំនងរវាងប្រទេសកម្ពុជា និងវៀតណាម នឹងកាន់តែអាក្រក់ជាងពេលណាៗទាំងអស់ ជាពិសេសដោយសារតែប្រទេសចិនកំពុងមានឥទ្ធិពលលើប្រទេសកម្ពុជាកាន់តែខ្លាំងឡើង វានឹងប៉ះពាល់ដល់ឥទ្ធិពលប្រទេសវៀតណាមនៅកម្ពុជា»។
លោក ផូល ឆាំប៊ឺ (Paul Chambers) យល់ថា នាយករដ្ឋមន្ត្រីសិង្ហបុរីទំនងជាមិនបានបញ្ជាក់ឲ្យបានច្បាស់នៅពេលលោកប្រើពាក្យ «ឈ្លានពាន»។ ទោះបីជាយ៉ាងណា សាស្ត្រាចារ្យរូបនេះ យល់ថា ការលើកឡើងរបស់លោក លី ស៊ានឡុង នឹងមិនធ្វើឲ្យខូចស្មារតីរបស់អាស៊ាននោះទេ៕