ក្រសួងការងារ និងបណ្តុះបណ្តាលវិជ្ជាជីវៈ បានព្រមានបិទសិប្បកម្មផលិតឥដ្ឋទាំងឡាយណា ដែលអនុញ្ញាតឲ្យកុមារចូលទៅក្នុងបរិវេណខ្សែសង្វាក់ផលិតកម្មនៃសិប្បកម្មផលិតឥដ្ឋ។
ក្នុងសេចក្តីណែនាំចុះថ្ងៃទី៥ ខែមិថុនាកន្លងមក ដែល វី.អូ.ឌី ទើបទទួលបាននៅថ្ងៃនេះ ក្រសួងការងារបានប្រាប់ទៅមន្ទីរការងាររាជធានី និងខេត្ត ឲ្យចុះណែនាំដល់ម្ចាស់សិប្បកម្មទាំងអស់ ត្រូវហាមកុមារចូលទៅក្នុងបរិវេណខ្សែសង្វាក់ផលិតកម្មឥដ្ឋ ហាមកុំឲ្យកុមារធ្វើការងារក្នុងវិស័យនេះ និងហាមដាច់ខាតរាល់ទម្រង់នៃការកេងប្រវ័ញ្ចពលកម្មលើកុមារ រួមទាំងការបង្ខំឲ្យកុមារធ្វើការងារដើម្បីដោះបំណុល ជាដើម។
ក្នុងសេចក្តីណែនាំដដែលនេះ ក្រសួងការងារបានតម្រូវឲ្យម្ចាស់សិប្បកម្មផលិតឥដ្ឋទាំងអស់ ត្រូវរៀបចំកន្លែងស្នាក់នៅឲ្យឆ្ងាយពីខ្សែសង្វាក់ផលិតកម្ម និងត្រូវមានរបងការពារសុវត្ថិភាពដោយខណ្ឌចែកបរិវេណខ្សែសង្វាក់ផលិតកម្ម និងកន្លែងស្នាក់នៅឲ្យដាច់ពីគ្នា។
ក្រសួងការងារព្រមានថា ប្រសិនបើម្ចាស់សិប្បកម្មផលិតឥដ្ឋទាំងឡាយណាខកខានក្នុងការអនុវត្តសេចក្តីណែនាំនេះ នឹងត្រូវទទួលរងនូវការផាកពិន័យ ឬអាចការបិទអាជីវកម្ម និងប្រឈមនឹងបទល្មើសព្រហ្មទណ្ឌ។
អ្នកសម្របសម្រួលគម្រោងថ្នាក់ជាតិរបស់អង្គការពលកម្មអន្តរជាតិ (ILO) លោក វន វិត ចាត់ទុកសេចក្ដីណែនាំរបស់ក្រសួងការងារថា ជាវិធានការល្អមួយក្នុងការជំរុញ និងរំលឹកដល់ម្ចាស់សិប្បកម្មផលិតឥដ្ឋទាំងអស់ ឲ្យយល់ដឹងពីការប្រើប្រាស់កម្លាំងពលកម្មកុមារ ដើម្បីទប់ស្កាត់គ្រោះថ្នាក់ផ្សេងៗកើតមានទៅលើកុមារ។
ប៉ុន្តែ មន្រ្តីអង្គការសង្គមស៊ីវិលរូបនេះ បានជំរុញទៅរដ្ឋាភិបាល និងភាគីពាក់ព័ន្ធ ត្រូវបង្កើនការអនុវត្តផែនការយុទ្ធសាស្រ្ត និងគោលនយោបាយលុបបំបាត់ពលកម្មកុមារឲ្យបានម៉ឺងម៉ាតបន្ថែមទៀត។
លោក វន វិត បន្ថែមថា៖ «ក្រសួងការងារ គាត់ត្រូវបន្តតាមដាន ឬការត្រួតពិនិត្យទៅការអនុវត្តរបស់ម្ចាស់សិប្បកម្មឡឥដ្ឋ ដោយធ្វើយ៉ាងម៉េចជំរុញឲ្យគាត់ហ្នឹងរួមសហការឲ្យបានពេញលេញ និងត្រូវមានវិធានការពិន័យចំពោះសិប្បកម្មណាដែលគាត់មិនបានចូលរួមសហការ ឬអនុវត្តសេចក្តីណែនាំនេះ និងបទបញ្ញត្តិផ្សេងៗទៀតពាក់ព័ន្ធពលកម្មកុមារនេះ ត្រូវមានវិធានការម៉ឺងម៉ាត់ និងច្បាស់លាស់ ដើម្បីទប់ស្កាត់ និងផ្តល់សារទៅសិប្បកម្មផ្សេងៗទៀត គោរព និងអនុវត្តសេចក្តីណែនាំរបស់ក្រសួងនេះបានប្រសិទ្ធភាព»។
កាលពីខែមិនា ឆ្នាំ២០១៩នេះ កុមារីអាយុ ១០ឆ្នាំម្នាក់ មានស្រុកកំណើតនៅខេត្តកំពង់ចាម បានគ្រោះថ្នាក់ដាច់ដៃម្ខាង ខណៈនាង និងក្រុមគ្រួសារបំពេញការងារនៅសិប្បកម្មឡឥដ្ឋមួយកន្លែងក្នុងស្រុកខ្សាច់កណ្តាល ខេត្តកណ្តាល។ កុមារី ស្រីភ័ក្រ បានបាត់បង់ដៃស្តាំត្រឹមស្មា ដោយសារកៀបចូលចូលម៉ាស៊ីនកិនឥដ្ឋ។
អង្គការការពារសិទ្ធិមនុស្សលីកាដូ បានលើកឡើងនៅក្នុងរបាយការណ៍របស់ខ្លួនកាលពីចុងឆ្នាំ២០១៦កន្លងមក ថា ការបញ្ចាំខ្លួនដើម្បីដោះបំណុល និងពលកម្មកុមារក្នុងសិប្បកម្មផលិតផលឥដ្ឋនៅកម្ពុជា បានបង្ហាញនូវទម្រង់ទាសភាពសម័យទំនើបក្នុងឧស្សាហកម្មផលិតឥដ្ឋនៃប្រទេសមួយនេះ។
របាយការណ៍កាលពីឆ្នាំ២០១២ របស់អង្គការពលកម្មការងារអន្តរជាតិ ILO រកឃើញថា មានកុមារ ១៩ភាគរយក្នុងចំណោមកុមារកម្ពុជា ៤លាននាក់ បានជាប់ពាក់ព័ន្ធនឹងពលកម្មនានា។ ក្នុងចំណោមកុមារទាំងនេះ មានកុមារជាង ៧ម៉ឺននាក់ធ្វើការនៅក្នុងការិយាល័យ តូប ហាង និងមួយចំនួនទៀតធ្វើការក្នុងរោងចក្រ និងសិប្បកម្មឡឥដ្ឋ៕