សិស្សានុសិស្សរាប់សិបនាក់ បានអានអក្សរយ៉ាងកងរំពង ខណៈដែលលោកគ្រូអ្នកគ្រូកំពុងតែបង្ហាត់បង្ហាញពួកគេអំពីរបៀបអានអក្សរខ្មែរ ប៉ុន្តែ ទិដ្ឋភាពនៃការរៀន និងបង្រៀនមួយនេះ មិនមែននៅក្នុងបន្ទប់រៀននៃអគារសិក្សាទូទៅនោះឡើយ។
ក្រុមសិស្សានុសិស្សទាំងនោះ បានដំណើរការសិក្សារៀនសូត្ររបស់ពួកគេនៅក្រោមដំបូលវត្តអារាមមួយនៅក្នុងភូមិ បន្ទាប់ពីអគារសាលារៀនរបស់ពួកគេត្រូវបានភ្លើងឆេះអស់ទាំងស្រុងកាលពីចុងសប្តាហ៍មុន។
អគារចំនួន ៣ខ្នងនៃសាលាបឋមសិក្សាយុគន្ធរ ដែលមានទីតាំងស្ថិតក្នុងឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ត្រូវបានភ្លើងឆាបឆេះទាំងស្រុងកាលពីថ្ងៃទី៩ ខែមិថុនា ចំពេលពលរដ្ឋកម្ពុជាជួបជុំគ្នាហូបនំបញ្ចុក «សាមគ្គីជាតិ» ទៅតាមការអំពាវនាវពីលោកនាយករដ្ឋមន្ត្រី ហ៊ុន សែន។
នាយកសាលាបឋមសិស្សយុគន្ធ នៅភូមិឆ្នុកទ្រូ លោក នួន បូរ៉ា បានឲ្យដឹងថា សាលារៀនមួយនេះ កំពុងប្រឈមមុខនឹងកង្វះខាតគ្រប់បែបយ៉ាង ចាប់ពីសម្ភារសិក្សារហូតដល់បន្ទប់ថ្នាក់រៀន ក្រោយពីអគារសិក្សាត្រូវភ្លើងឆាបឆេះកាលពីសប្ដាហ៍មុននោះ។
លោកបន្ថែមថា៖ «ឥលូវ បើនិយាយពីផលលំបាកពេលនេះ គឺយើងលំបាកទាំងស្រុងដោយសារសាលាទាំងមូល គឺឆេះ សូម្បីតែឯកសារ សម្ភារ ឬប៉ិចមួយដើម ក៏មិនអាចយកចេញបានដែរ។ អ៊ីចឹង មានន័យថា សាលានេះដូចកើតថ្មីទាំងអស់ ព្រោះអ្វីក៏មិនសល់ដែរ»។
នាយកសាលារូបនេះបន្តថា ដើម្បីដោះស្រាយបញ្ហាចំពោះមុខ និងសម្រួលឲ្យសិស្សានុសិស្សបានកន្លែងសម្រាប់បន្តការសិក្សានោះ គណៈកម្មការសាលាបានស្នើសុំសាលាឆាន់វត្តយុគន្ធរ និងបរិវេណផ្សេងទៀត ដើម្បីសាងសង់កន្លែងសម្រាប់សិស្សរៀនបណ្តោះអាសន្ន។
កំពុងឈរមើលកម្ទេចកម្ទីផេះផង់នៃកាកសំណល់អគារសាលារៀនដែលបានឆេះរួចនោះ កុមារា ឈៀវ ឧត្តម រៀនថ្នាក់ទី៥ នៃសាលាបឋមសិក្សារយុគន្ធរ បានរៀបរាប់ថា រូបគេមានការសោកស្តាយចំពោះការបាត់សាលា ដែលបានតុបតែងស្អាត និងជាជម្រកធ្លាប់រៀនសូត្រ។
កុមារា ឈៀវ ឧត្ដម រៀបរាប់ថា៖ «អត់មានសាលារៀនត្រឹមត្រូវអ៊ឹងចឹង ពួកខ្ញុំដូចជាពិបាករៀនដែរ។ ខ្ញុំចង់ឲ្យជួយផ្តល់សាលារៀនដល់ពួកខ្ញុំ ឲ្យផុតទឹកនៅរដូវស្សា និងសៀវភៅ ប៉ិចកាតាប ព្រោះពួកយើងខ្លះក្រីក្រអត់មានទេ ហើយក៏ចង់ឲ្យជួយកូនសិស្សក្រីក្រនៅទីនេះដែរ ព្រោះគេអត់សៀវភៅប្រើប្រាស់ទេ»។
ជាឪពុកសិស្សរៀននៅសាលាបឋមសិក្សាយុគន្ធម្នាក់ លោក ស្រី សំណាង បានបារម្ភពីផលប៉ះពាល់ដល់ការសិក្សារបស់កូនៗ បន្ទាប់ពីសាលារៀនបានបាត់បង់ទៅតាមអណ្តាតភ្លើង ហើយការរៀបចំកន្លែងសិក្សាបណ្តោះអាសន្នពុំទាន់បានត្រឹមត្រូវ។
ឪពុកសិស្សរូបនេះបន្តថា កូនសិស្សដែលរៀននៅទីនេះភាគច្រើនឪពុកម្តាយជាអ្នកក្រីក្រ ពុំមានលទ្ធភាពច្រើន ដើម្បីជួយដល់សាលានោះទេ។
លោកបន្ថែមថា៖ «ខ្ញុំមានការសោកស្តាយដែរ ព្រោះអត់មានសាលាឲ្យកូនអ៊ីចឹង ប៉ុន្តែ មិនដឹងធ្វើយ៉ាងម៉េច។ ខ្ញុំសុំឲ្យគេជួយធ្វើសាលាថ្មីឲ្យបានឆាប់ មិនមែនសម្រាប់តែកូនខ្ញុំទេ គឺសម្រាប់កូនប្រជាសហគមន៍នៅទីនេះទាំងអស់ ព្រោះសហគមន៍នៅទីនេះក្រីក្រណាស់»។
ប្រធានការិយាល័យអប់រំស្រុក លោក សូរ ចំរើន មានប្រសាសន៍ថា ក្រោយទទួលបានដំណឹងហេតុការណ៍ភ្លើងឆេះសាលារៀននេះ ការិយាល័យអប់រំស្រុកបានជម្រាបជូនទៅមន្ទីរអប់រំខេត្ត និងអាជ្ញាធរពាក់ព័ន្ធឲ្យជួយដោះស្រាយបញ្ហាប្រឈមចំពោះមុខផងដែរ។
លោកបន្តថា អាជ្ញាធរពាក់ព័ន្ធ និងអង្គការដៃគូរបានជួយផ្តល់សម្ភារសិក្សា និងសម្ភារផ្សេងៗទៀតដល់គណៈកម្មការសាលា ដើម្បីជួយសិស្ស ហើយថា ការិយាល័យអប់រំស្រុកកំពុងរៀបសំណើផ្លូវការដាក់ទៅមន្ទីរអប់រំខេត្ត និងថ្នាក់ជាតិ រួមទាំងអង្គការដៃគូរផ្សេងៗ ដើម្បីសុំសាលារៀនថ្មី និងសម្ភារសិក្សាផ្សេងៗផងដែរ។
លោកបន្ថែមថា៖ «សូមមេត្តាជួយផ្តល់ជាអគារសិក្សា ១ខ្នង ចំនួន ៦បន្ទប់ សុំបង្គន់អនាម័យ ផ្ទះសំណាក់សម្រាប់លោកគ្រូអ្នកគ្រូដែលមកបង្រៀននៅទីនេះ និងឧបករណ៍ការពាររន្ទះជាដើម»។
នាយកប្រចាំប្រទេសនៃអង្គការ Aide et Action (AEA) លោក វន សំភាស់ មានប្រសាសន៍ថា ក្នុងករណីសាលារៀនមួយត្រូវបានភ្លើងឆេះអស់ និងពុំទាន់មានសាលារៀនជំនួសនោះ អាជ្ញាធរពាក់ព័ន្ធត្រូវតែរៀបចំកន្លែងបណ្តោះអាសន្នសម្រាប់បង្រៀនឲ្យបានសមស្រប ដោយមានបរិស្ថាន និងមានបរិយាកាសល្អ។
លោកបន្ថែមថា៖ «ដំណោះស្រាយបន្ទាន់ល្អបំផុតឲ្យក្មេងនៅតែរៀនចប់ចុងចប់ដើម គឺត្រូវមានកន្លែងបណ្តោះអាសន្នមួយ ត្រូវមានថ្នាក់រៀន មានគ្រូ មានសៀវភៅ មានវិធីសាស្រ្តបង្រៀន នោះជាអាទិភាពចម្បងគេ ហើយបន្តបន្ទាប់ទៀត យើងត្រូវគិតបរិស្ថានសាលា និងកត្តាផ្សេងៗទៀត»។
នាយកសាលាបឋមសិស្សយុគន្ធរ នៅភូមិឆ្នុកទ្រូ លោក នួន បូរ៉ា បានឲ្យដឹងថា សាលាបឋមសិក្សាយុគន្ធរ ត្រូវបានបង្កើតឡើងកាលពីឆ្នាំ២០០៥ ហើយសាលាបឋមសិក្សាមួយនេះ ផ្ដល់សេវាបង្រៀនដល់សិស្សានុសិស្សសរុប ២២៦នាក់ ដែលភាគច្រើនជាសិស្សក្រីក្រ ហើយសាលារៀនមួយនេះត្រូវលិចទឹករយៈពេល៦ខែនៅរដូវស្សារ។
លោកបន្ថែមថា៖ «ខ្ញុំសូមសំណូមពរទៅប្រមុខរដ្ឋាភិបាល សប្បុរសជននានា សូមជួយដល់សាលារៀនយើងខ្ញុំផង។ បើជួយមិនទាន់បានជាអគារសិក្សាថ្មីទេ សូមជួយជាសម្ភារសិក្សាសម្រាប់បម្រើការបង្រៀន សម្ភារអនាម័យសម្រាប់តម្រូវការបន្ទាន់នេះក៏បាន»៕