ឯកអគ្គរាជទូតកម្ពុជាប្រចាំប្រទេសសឹង្ហបុរី បានបង្ហាញការមិនពេញចិត្តជាខ្លាំងចំពោះការចុះផ្សាយអត្ថបទមួយរបស់សារព័ត៌មាន Channel News Asia ពាក់ព័ន្ធនឹងឥទ្ធិពល និងបញ្ហាអវិជ្ជមានមួយចំនួនរបស់ចិននៅកម្ពុជា។
កាលពីថ្ងៃទី១ ខែកុម្ភៈ ឆ្នាំ២០១៩ សារព័ត៌មាន Channel News Asia របស់សឹង្ហបុរី បានចុះផ្សាយនូវអត្ថបទស៊ីជម្រៅមួយក្រោមចំណងជើងថា«ការទូតមូលប្បទានប័ត្ររបស់ចិន»។
ក្នុងលិខិតផ្ញើទៅលោកស្រី ថាំ ឡុក ខេង ប្រធានប្រតិបត្តិសារជីវកម្មផ្សព្វផ្សាយសារព័ត៌មាន Channel News Asia ឯកអគ្គរាជទូតកម្ពុជាប្រចាំប្រទេសសឹង្ហបុរី លោក ងួន សុខវេង យល់ថាការផ្សាយរបស់សារព័ត៌មានសឹង្ហបុរីមួយនេះខុសពីការពិត ដោយឈរតែព័ត៌មានតែមួយផ្នែក និងការវិភាគមិនបានស៊ីជម្រៅ ជាពិសេសការអភិវឌ្ឍនៅក្រុងព្រះសីហនុ។ លោក បន្តថា ការចុះផ្សាយនេះនាំឲ្យសាធារណជនយល់ខុស និងប៉ះពាល់ដល់មុខមាត់ និងកិត្តិនាមរបស់ប្រទេសកម្ពុជា។
ឯកអគ្គរាជទូតកម្ពុជារូបនេះ លើកឡើងថា សេចក្តីរាយការណ៍របស់ Channel News Asia ស្តីពីបញ្ហាអវិជ្ជមាននៃការអភិវឌ្ឍក្រុងព្រះសីហនុ ដោយអ្នកវិនិយោគចិន និងកំណើនទេសចរចិន មិនបានឆ្លុះបញ្ចាំងពីតថភាពពិតនោះទេ។ លោក បន្ថែមថា វិនិយោគិន និងទេសចរចិន បានរួមចំណែកយ៉ាងសំខាន់ដល់ការរីកចម្រើនរបស់កម្ពុជា។
ក្នុងលិខិតដដែល លោក ងួន សុខវេង ក៏បានច្រានចោលចំពោះការចុះផ្សាយដែលថា កម្ពុជាកំពុងស្ថិតនៅក្នុងគ្រោះថ្នាក់បាត់បង់ភាពបត់បែន ក្នុងការកំណត់ក្របខណ្ឌនយោបាយការបរទេសឯករាជ្យ បន្ទាប់ពីធ្លាក់ជ្រៅទៅក្នុងរង្វង់ឥទ្ធិពលរបស់ចិន។
លោក ងួន សុខវេង បានទាត់ចោលសេចក្តីរាយការណ៍របស់ Channel News Asia ផងដែរដែលថា កម្ពុជាកំពុងធ្លាក់ចូលក្នុងអន្ទាក់បំណុលចិន។
ឯកអគ្គរាជទូតកម្ពុជារូបនេះ បានសរសេរក្នុងលិខិតនោះថា៖ «សេចក្តីរាយការណ៍របស់ CAN (Channel News Asia) ក៏បានអះអាងដោយគ្មានមូលដ្ឋានថា កម្ពុជាបាន ហើយនិងកំពុងតែត្រូវបានស្រូបចូលទៅក្នុងអន្ទាក់បំណុលដកខ្លួនមិនរួច តាមរយៈការទទួលឥណទានដ៏ច្រើនមហិមា ការវិនិយោគ និងជំនួយហិរញ្ញវត្ថុពីប្រទេសចិន។ អ្វីដែលជាការពិត គឺរដ្ឋាភិបាលកម្ពុជា មានសមត្ថភាពអាចគ្រប់គ្រងគោលនយោបាយសេដ្ឋកិច្ច និងហិរញ្ញវត្ថុរបស់ខ្លូនបាន។»
ឯកអគ្គរាជទូតកម្ពុជា លោក ងួន សុខវេង ស្នើឲ្យ Channel News Asia ចុះផ្សាយទាំងស្រុងនូវលិខិតដែលកម្ពុជាផ្ញើទៅនេះ។
វី.អូ.ឌី មិនទាន់អាចទាក់ទងសុំការឆ្លើយតពីលោកស្រី ថាំ ឡុកខេង ប្រធានប្រតិបត្តិសារជីវកម្មផ្សព្វផ្សាយសារព័ត៌មាន Channel News Asia បាននៅឡើយទេ។
អ្នកជំនាញគោលនយោបាយ និងជាសាស្ត្រាចារ្យរងផ្នែកការទូត និងកិច្ចការពិភពលោកនៃមហាវិទ្យាល័យ Occidental សហរដ្ឋអាមេរិក លោក អៀ សុផល យល់ថា ការផ្ញើលិខិតឲ្យ Channel News Asia ជុំវិញបញ្ហាចិននៅកម្ពុជានាពេលនេះ ពិតជាគួរធ្វើឲ្យមានចម្ងល់ណាស់ ព្រោះថា វាបានធ្វើឡើងក្រោយពីសឹង្ហបុរី និងកម្ពុជា ប៉ះសម្តីគ្នាជុំវិញការអត្ថាធិប្បាយរបស់នាយករដ្ឋមន្រ្តីសឹង្ហបុរី លោក លី សៀនឡុង។
លោក អៀ សុផល ដែលជាអ្នកនិពន្ធសៀវភៅ «ការពឹងផ្អែកលើជំនួយរបស់កម្ពុជា៖ ជំនួយបរទេសធ្វើឱ្យខូចខាតដល់ប្រជាធិបតេយ្យ» និង «រឿងនាគស្រេកឃ្លាន៖ ការស្វែងរកធនធានរបស់ប្រទេសចិនកំពុងផ្លាស់ប្តូរពិភពលោក» ផងដែរនោះ បន្តថា កម្ពុជាប្រើរឿងបញ្ហានេះដើម្បីជាប្រយោជន៍ក្នុងការវាយបកទៅលើសឹង្ហបុរីវិញ។
លោក អៀ សុផល មានប្រសាសន៍បន្ថែមថា វាមិនមែនជារឿងដ៏គួរឲ្យភ្ញាក់ផ្អើលនោះទេ ដែលរដ្ឋាភិបាលក្រុងភ្នំពេញបដិសេធការរិះគន់របស់សារព័ត៌មានសឹង្ហបុរីពាក់ព័ន្ធនឹងបញ្ហារបស់ចិននៅប្រទេសកម្ពុជា។ លោកយល់ថា រដ្ឋាភិបាលកម្ពុជាគឺខ្វះនូវការទទួលខុសត្រូវ ដោយមិនទទួលស្គាល់ចំណុចនោះទេ ហើយថែមទាំងចង់ឲ្យ Channel News Asia ធ្វើដូចខ្លួនទៀត។
លោក បន្ថែមទៀតថា៖ «បញ្ហាគឺថា ការគាបសង្កត់លើប្រព័ន្ធផ្សព្វផ្សាយដោយរដ្ឋាភិបាលក្រុងភ្នំពេញ មិនត្រួវបានយកមកអនុវត្តនៅសឹង្ហបុរីទេ។»
សាស្ត្រាចារ្យផ្នែកសិក្សាពីសហគមន៍អាស៊ាននៅសាកលវិទ្យាល័យនរេសួន ប្រទេសថៃ លោក ផូល ឆាំប៊ឺ (Paul Chambers) មានប្រសាសន៍ប្រាប់ VOD តាមសារអេឡិចត្រូនិច ថា ការបដិសេធណាមួយរបស់មន្រ្តីរដ្ឋាភិបាលកម្ពុជាតែងតែត្រូវបានបំផ្លាញដោយការពិត។
លោក មានប្រសាសន៍ថា៖ «ការវិនិយោគ និងការរកស៊ីរបស់ចិន បានកំពុងនឹងទាញកម្ពុជាឲ្យពឹងផ្អែកទៅលើចិន។ ទាំងនេះគឺជារឿងពិត។»
នៅដើមខែមិថុនា ឆ្នាំ២០១៩នេះ លោកនាយករដ្ឋមន្រ្តី ហ៊ុន សែន លោក ទៀ បាញ់ និងមន្រ្តីជាន់ខ្ពស់កម្ពុជាមួយចំនួនទៀត បានប្រតិកម្មជាបន្តបន្ទាប់ចំពោះការលើកឡើងរបស់នាយករដ្ឋមន្រ្តីសឹង្ហបុរី លោក លី សៀនឡុង ដែលថា វៀតណាមបានឈ្លានពានកម្ពុជានៅឆ្នាំ១៩៧៩។ ទោះយ៉ាងណាក៏ដោយ ការឆ្លើយឆ្លងរវាងមេដឹកកម្ពុជា និងសឹង្ហបុរី បានបញ្ចប់ក្រោយរដ្ឋមន្រ្តីក្រសួងការបរទេសប្រទេសទាំងពីរបានជជែកគ្នាតាមទូរសព្ទកាលពីថ្ងៃទី៧ ខែមិថុនា៕
